Last Updated:
బ్రేకప్ అయినప్పటికీ సంతోష్ ఆమెను వదలకుండా నిరంతరం ఫోన్ కాల్స్, రాతపూర్వక లేఖలతో వేధించడం మొదలుపెట్టాడు.
Viral: ప్రజా పాలనలో పారదర్శకత, జవాబుదారీతనాన్ని నిర్ధారించడానికి, ప్రభుత్వ విభాగాల్లో అవినీతికి అడ్డుకట్ట వేయడానికి తీసుకొచ్చిన సమాచార హక్కు (RTI) చట్టాన్ని కొందరు ఏ రీతిన దుర్వినియోగం చేస్తున్నారో తెలిపే విచిత్రమైన, విస్తుపోయే ఉదంతం తమిళనాడులో వెలుగుచూసింది. ఒక యువకుడు తన వ్యక్తిగత పగ, అనుమానాలతో మాజీ ప్రేయసి వివరాలు రాబట్టేందుకు ఏకంగా ఆర్టీఐ చట్టాన్ని ఆయుధంగా మలచుకున్నాడు. ఏకంగా 1,886 ప్రశ్నలతో 97 సార్లు దరఖాస్తులు సమర్పించి ప్రభుత్వ అధికారులకు చుక్కలు చూపించాడు.
వివరాల్లోకి వెళ్తే.. తమిళనాడులోని విళుప్పురం జిల్లాకు చెందిన సంతోష్ అనే యువకుడు 2021-2024 మధ్య కళాశాలలో చదువుకుంటున్న రోజుల్లో తోటి విద్యార్థినిని ప్రేమించాడు. అయితే అతడి తీరు, ప్రవర్తన నచ్చకపోవడంతో సదరు యువతి అతనికి పూర్తిగా దూరమైంది. బ్రేకప్ అయినప్పటికీ సంతోష్ ఆమెను వదలకుండా నిరంతరం ఫోన్ కాల్స్, రాతపూర్వక లేఖలతో వేధించడం మొదలుపెట్టాడు. ఈ వేధింపులు భరించలేక తీవ్ర మనస్తాపానికి గురైన ఆ యువతి గతంలో ఆత్మహత్యకు సైతం యత్నించింది.
అయినా అతడి తీరు మారకపోగా, ఆమె వ్యక్తిగత జీవితంపై ఆరా తీయడానికి సమాచార హక్కు చట్టాన్ని ఎంచుకున్నాడు. “నా మాజీ ప్రేయసి ప్రస్తుతం ఎవరితో ప్రేమలో ఉంది? గతంలో ఆమె ఎంతమందితో ప్రేమాయణం నడిపింది? ఆమెకు ఎవరితోనైనా పెళ్లయిందా? ఆమె ఇంకా బతికే ఉందా?” అంటూ అత్యంత అసంబద్ధమైన, వ్యక్తిగత విషయాలకు సంబంధించిన మొత్తం 1,886 ప్రశ్నలను సిద్ధం చేశాడు. వీటిని కడలూరు జిల్లా ఎస్పీ కార్యాలయంలోని సమాచార పౌరసంబంధాల విభాగానికి ఏకంగా 97 వేర్వేరు దరఖాస్తుల రూపంలో పంపించి సమాచారం ఇవ్వాలని ఒత్తిడి చేశాడు. చట్ట పరిధికి మించిన వ్యక్తిగత వివరాలు కావడంతో పోలీసులు వాటికి సమాధానం ఇవ్వకపోవడంతో, అతడు ఏకంగా జిల్లా ఎస్పీపైనే రాష్ట్ర సమాచార కమిషన్‌లో కేసు దాఖలు చేశాడు.
సమాచార కమిషన్ ఆగ్రహం.. కౌన్సెలింగ్‌కు ఆదేశంఈ వింత పిటిషన్‌పై తమిళనాడు రాష్ట్ర సమాచార కమిషనర్ వీపీఆర్ ఇళంపరిది తీవ్ర అసహనం వ్యక్తం చేస్తూ పిటిషనర్‌ను తీవ్రంగా మందలించారు. సమాచార హక్కు చట్టం అనేది ప్రజా ప్రయోజనాల కోసమని, ఇలాంటి అసంబద్ధమైన ప్రశ్నలతో ప్రభుత్వ ఉద్యోగుల అమూల్యమైన సమయాన్ని వృథా చేస్తూ తీవ్ర పనిభారాన్ని మోపడం నేరమని స్పష్టం చేశారు. సంతోష్ కనీసం ఏడాది పాటు ఎలాంటి ఆర్టీఐ దరఖాస్తులు చేయకుండా నిషేధం విధించారు. అంతేకాకుండా, అతడి మానసిక స్థితిని సరిదిద్దేందుకు ఆరోగ్య విభాగం అధికారుల సమక్షంలో తక్షణమే ప్రత్యేక కౌన్సెలింగ్ ఇప్పించాలని ఆదేశాలు జారీ చేశారు. చట్టాలను ఇలా వ్యక్తిగత ప్రతీకారాలకు వాడితే ఎదురయ్యే పరిణామాలకు ఈ ఘటన నిదర్శనంగా నిలిచింది.
