ఈ కొత్త బ్రాంచ్ ప్రారంభంతో అమెరికాలో ఎస్‌బీఐసీ బ్యాంక్ శాఖల సంఖ్య ఏడింటి నుంచి ఎనిమిదికి పెరిగింది. ముఖ్యంగా కాలిఫోర్నియా రాష్ట్రం బయట ఈ బ్యాంకు ఏర్పాటు చేసిన తొలి శాఖ ఇదే కావడం విశేషం. ఇప్పటివరకు అమెరికాలో కాలిఫోర్నియాపైనే ప్రధానంగా దృష్టి పెట్టిన బ్యాంకు, ఇప్పుడు టెక్సాస్‌లోనూ తన కార్యకలాపాలను ప్రారంభించింది. దీంతో అమెరికాలో మరింత విస్తృతంగా వినియోగదారులకు బ్యాంకింగ్ సేవలు అందించే అవకాశం ఏర్పడింది. అమెరికాలో ఎస్‌బీఐకి ఇప్పటికే న్యూయార్క్, చికాగో, లాస్ ఏంజెల్స్ నగరాల్లో నేరుగా నిర్వహించే మూడు శాఖలు ఉన్నాయి. వాషింగ్టన్ డీసీలో ఒక ప్రతినిధి కార్యాలయం కూడా పనిచేస్తోంది. వీటికి అదనంగా ఎస్‌బీఐసీ బ్యాంక్ ఎనిమిది శాఖల ద్వారా సేవలు అందించనుంది. అమెరికా మార్కెట్‌కు ఎస్‌బీఐ ఎంత ప్రాధాన్యం ఇస్తోందో ఈ విస్తరణ తెలియజేస్తోంది.
అమెరికాలో వేగంగా అభివృద్ధి చెందుతున్న వ్యాపార, ఆర్థిక కేంద్రాల్లో డల్లాస్ కూడా ఒకటి. ఇక్కడ పెద్ద సంఖ్యలో ఉద్యోగులు, వృత్తి నిపుణులు, వ్యాపారవేత్తలు, పారిశ్రామిక సంస్థలు ఉన్నాయి. వీరి అవసరాలను దృష్టిలో పెట్టుకుని ఎస్‌బీఐ కొత్త శాఖను ప్రారంభించింది. స్థానిక అమెరికన్లతో పాటు అక్కడ నివసిస్తున్న భారతీయులకు కూడా ఈ బ్రాంచ్ ద్వారా బ్యాంకింగ్ సేవలు అందుబాటులోకి రానున్నాయి.
ఈ శాఖలో వ్యక్తిగత బ్యాంకింగ్, వ్యాపార బ్యాంకింగ్ సేవలు అందిస్తారు. రిటైల్ డిపాజిట్లు, వాణిజ్య రుణాలు, భారత్‌కు నగదు పంపించడం, ఇతర దేశాలకు అంతర్జాతీయ నగదు బదిలీలు వంటి సేవలు ఉంటాయి. ముఖ్యంగా ప్రవాస భారతీయులు (NRI) తమ ఆర్థిక అవసరాలకు అనుగుణంగా ప్రత్యేక బ్యాంకింగ్ సేవలు పొందవచ్చు. వ్యక్తిగత అవసరాల నుంచి వ్యాపార లావాదేవీల వరకు ఒకే చోట వివిధ సేవలు అందించడం ఈ శాఖ ప్రధాన లక్ష్యం.
ఈ కొత్త శాఖ ప్రారంభంపై ఎస్‌బీఐ చైర్మన్ చల్లా శ్రీనివాసులు శెట్టి మాట్లాడుతూ.. టెక్సాస్‌లో ఎస్‌బీఐసీ బ్యాంక్ శాఖ ఏర్పాటు చేయడం అంతర్జాతీయ విస్తరణలో ముఖ్యమైన ముందడుగు అని తెలిపారు. కాలిఫోర్నియా దాటి మరో రాష్ట్రంలో కార్యకలాపాలు ప్రారంభించడం ద్వారా కీలక మార్కెట్లలో బ్యాంకు ఉనికిని పెంచుకుంటున్నామని చెప్పారు. అమెరికాలో నివసిస్తున్న భారతీయులు, స్థానిక ప్రజలు, వ్యాపార సంస్థల బ్యాంకింగ్ అవసరాలను తీర్చడంలో ఈ శాఖ ఉపయోగపడుతుందని వివరించారు. అలాగే భారత్, అమెరికా మధ్య ఆర్థిక సంబంధాలు మరింత బలపడేందుకు ఈ విస్తరణ దోహదపడుతుందని పేర్కొన్నారు.
ఎస్‌బీఐ కేవలం భారత్‌కే పరిమితం కాకుండా ప్రపంచవ్యాప్తంగా తన బ్యాంకింగ్ సేవలను విస్తరించింది. ప్రస్తుతం 29 దేశాల్లో మొత్తం 245 విదేశీ కార్యాలయాలతో అంతర్జాతీయ నెట్‌వర్క్‌ను నిర్వహిస్తోంది. ఇందులో విదేశీ శాఖలు, ఉప కార్యాలయాలు, ప్రతినిధి కార్యాలయాలు, అనుబంధ సంస్థలు, జాయింట్ వెంచర్లు ఉన్నాయి. వ్యక్తిగత బ్యాంకింగ్, కార్పొరేట్ బ్యాంకింగ్, ట్రేడ్ ఫైనాన్స్, ఇన్వెస్ట్‌మెంట్ బ్యాంకింగ్ వంటి సేవలను ఆయా దేశాల్లో అందిస్తోంది.
అంతేకాకుండా 56 దేశాల్లోని 222 బ్యాంకులతో ఎస్‌బీఐకి కరస్పాండెంట్ బ్యాంకింగ్ సంబంధాలు ఉన్నాయి. వీటి ద్వారా అంతర్జాతీయ చెల్లింపులు, విదేశీ వాణిజ్య లావాదేవీలు, సరిహద్దులు దాటి జరిగే ఆర్థిక కార్యకలాపాలను సులభంగా నిర్వహించేందుకు వీలవుతోంది. మరోవైపు యోనో గ్లోబల్ డిజిటల్ బ్యాంకింగ్ సేవలు 14 విదేశీ కార్యాలయాలు, అనుబంధ సంస్థల్లో అందుబాటులో ఉన్నాయి. దీంతో విదేశాల్లో ఉన్న వినియోగదారులు డిజిటల్ మార్గంలోనూ బ్యాంకింగ్ సేవలు పొందుతున్నారు.
ఎస్‌బీఐ విదేశీ కార్యకలాపాల్లోనూ మంచి వృద్ధి నమోదైంది. 2026 సెప్టెంబర్ 30తో ముగిసిన త్రైమాసికంలో విదేశీ అడ్వాన్సులు గత ఏడాదితో పోలిస్తే 22.86 శాతం పెరిగి రూ.8,31,332 కోట్లకు చేరాయి. అంటే విదేశాల్లో బ్యాంకు ఇచ్చిన రుణాలు, అడ్వాన్సుల విలువ గణనీయంగా పెరిగింది. ఇదే సమయంలో విదేశీ కార్యాలయాల ద్వారా సేకరించిన డిపాజిట్లు కూడా 22.61 శాతం వృద్ధి చెందాయి. దీంతో మొత్తం విదేశీ డిపాజిట్లు రూ.2,83,319 కోట్లకు చేరాయి. విదేశాల్లో రుణాలు, డిపాజిట్లు రెండింటిలోనూ వృద్ధి కనిపించడం ఎస్‌బీఐ అంతర్జాతీయ వ్యాపారం విస్తరిస్తోందని సూచిస్తోంది. తాజాగా టెక్సాస్‌లో కొత్త శాఖ ప్రారంభించడం ఈ ప్రయాణంలో మరో కీలక అడుగుగా నిలిచింది.
