Last Updated:
Punjab Da Crorepati: యువతలో సాధారణ పరిజ్ఞానాన్ని పెంపొందించడంతో పాటు, పోటీ పరీక్షలకు సిద్ధమయ్యేలా ప్రోత్సహించేందుకు పంజాబ్ ప్రభుత్వం ఒక వినూత్న కార్యక్రమానికి శ్రీకారం చుట్టింది.
ప్రముఖ టెలివిజన్ షో ‘కౌన్ బనేగా కరోడ్‌పతి’ (KBC) తరహాలో రాష్ట్రవ్యాప్తంగా యువత కోసం ‘పంజాబ్ దా కరోడ్‌పతి’ (Punjab Da Crorepati) పేరుతో భారీ క్విజ్ పోటీని ముఖ్యమంత్రి భగవంత్ మాన్ ప్రారంభించారు. ఈ పోటీలో విజేతగా నిలిచిన వారికి ఏకంగా రూ. కోటి నగదు బహుమతి అందజేయనున్నట్లు ప్రభుత్వం ప్రకటించింది.
పంజాబ్ రాష్ట్రంలోని 23 జిల్లాలకు చెందిన 15 నుండి 30 ఏళ్ల మధ్య వయసున్న యువతీ యువకులు ఈ పోటీలో పాల్గొనేందుకు అర్హులు. మొత్తం 11 దశల్లో ఈ క్విజ్ పోటీని నిర్వహించనున్నారు. ఇందులో మొదటి 9 రౌండ్లు ఆన్‌లైన్ పోర్టల్ లేదా మొబైల్ యాప్ ద్వారా జరుగుతాయి. ప్రతి ప్రశ్నకు నాలుగు ఆప్షన్లు ఉంటాయి, 20 సెకన్లలోపు సరైన సమాధానాన్ని ఎంచుకోవాల్సి ఉంటుంది. ఆన్‌లైన్ రౌండ్లలో అత్యధిక స్కోరు సాధించిన వారిని 10వ రౌండ్ (జిల్లా స్థాయి పోటీ)కు ఎంపిక చేస్తారు. అక్కడి నుంచి 23 జిల్లాల విజేతలు డిసెంబర్ 17న జరిగే రాష్ట్ర స్థాయి గ్రాండ్ ఫినాలే ‘హాట్ సీట్’కు అర్హత సాధిస్తారు.
ఈ క్విజ్ కోసం పంజాబ్ చరిత్ర, సంస్కృతి, భౌగోళిక అంశాలు, గణితం, కరెంట్ అఫైర్స్ మరియు ప్రభుత్వ పథకాలపై సుమారు 50 వేల ప్రశ్నలతో కూడిన ప్రత్యేక క్వశ్చన్ బ్యాంక్‌ను రూపొందించారు. కేవలం ప్రథమ విజేతకు రూ. కోటి మాత్రమే కాకుండా, నలుగురు రన్నరప్‌లకు రూ. 10 లక్షల చొప్పున, లీడర్‌బోర్డ్‌లో నిలిచిన మరో 8 మందికి రూ. 5 లక్షల చొప్పున బహుమతులు ఇస్తారు. వీరితో పాటు వివిధ దశల్లో ప్రతిభ కనబరిచిన మొత్తం 10,000 మందికి నగదు ప్రోత్సాహకాలు, డిజిటల్ సర్టిఫికెట్లు అందజేయనున్నారు.
ఆసక్తి గల యువత గూగుల్ ప్లే స్టోర్, యాపిల్ యాప్ స్టోర్‌లో అందుబాటులో ఉన్న ‘Punjab Da Crorepati’ మొబైల్ యాప్ లేదా అధికారిక వెబ్ పోర్టల్ ద్వారా ఉచితంగా రిజిస్ట్రేషన్ చేసుకోవచ్చు. ఆధార్ కార్డు మరియు మొబైల్ నంబర్ ఓటీపీ ద్వారా ఈ నెల (నవంబర్) 28వ తేదీ వరకు దరఖాస్తు చేసుకునేందుకు అవకాశం కల్పించారు. యువత చెడు వ్యసనాలకు దూరంగా ఉండి, పుస్తకాలు, విజ్ఞానం వైపు అడుగులు వేయాలనే లక్ష్యంతో ఈ కార్యక్రమాన్ని తీసుకొచ్చామని సీఎం భగవంత్ మాన్ తెలిపారు.
