Last Updated:
భారతీయ పరిశోధకులకు ఓపెన్ఏఐ అదిరిపోయే అవకాశం కల్పించింది. అర్హత ఉన్న వారికి 12 నెలల పాటు చాట్జీపీటీ ప్లస్ సబ్స్క్రిప్షన్ను ఉచితంగా అందించనుంది. ఈ ఆఫర్ ఎవరికి వర్తిస్తుంది? ఎలా దరఖాస్తు చేసుకోవాలి? పూర్తి వివరాలు తెలుసుకుందాం.
భారత్లోని పరిశోధకులకు ఓపెన్ఏఐ గుడ్ న్యూస్ చెప్పింది. అర్హత ఉన్న పరిశోధకులు 12 నెలల పాటు ఉచితంగా చాట్జీపీటీ ప్లస్ ఉపయోగించుకునే అవకాశం కల్పిస్తోంది. సైన్స్, మ్యాథమెటిక్స్, ఇంజినీరింగ్ రంగాల్లో పరిశోధనలు చేసే వారికి ఈ అవకాశం ఉపయోగపడనుంది. ఓపెన్ఏఐ మంగళవారం ఈ విషయాన్ని ప్రకటించింది. ‘చాట్జీపీటీ ఫర్ అకడమిక్ రీసెర్చర్స్’ పేరుతో చేపట్టిన ఈ కార్యక్రమాన్ని భారత్లోనూ అందుబాటులోకి తీసుకొచ్చింది. ఎంపిక చేసిన విద్యాసంస్థల్లో పనిచేస్తున్న అర్హత కలిగిన రీసెర్చ్ ఫ్యాకల్టీ, పోస్ట్డాక్టోరల్ పరిశోధకులు ఈ ఉచిత సదుపాయం కోసం దరఖాస్తు చేసుకోవచ్చు. ఈ కార్యక్రమంలో భాగంగా ప్రపంచవ్యాప్తంగా మరో 50 వేల కొత్త గ్రాంట్లను అందించనున్నట్టు ఓపెన్ఏఐ తెలిపింది. ముందుగా దరఖాస్తు చేసుకున్న వారికి ప్రాధాన్యం ఉంటుంది. నవంబర్ 30 నుంచి దరఖాస్తుల స్వీకరణ ప్రారంభం కానుంది.
ప్రతి కొత్త గ్రాంట్ ద్వారా ఒక రీసెర్చ్ వర్క్స్పేస్లో మూడు చాట్జీపీటీ ప్లస్ అకౌంట్లు అందుబాటులో ఉంటాయి. అంటే గ్రాంట్ పొందిన పరిశోధకుడితో పాటు మరో ఇద్దరు సహచరులు కూడా ఈ సదుపాయాన్ని ఉపయోగించుకోవచ్చు. ప్రపంచవ్యాప్తంగా 2 లక్షల మంది వరకు పరిశోధకులకు ఉచిత చాట్జీపీటీ యాక్సెస్ అందించాలని ఓపెన్ఏఐ లక్ష్యంగా పెట్టుకుంది. గత జులైలో ఈ పైలట్ కార్యక్రమాన్ని ప్రారంభించినప్పుడు ప్రకటించిన లక్ష్యానికి ఇది రెండింతలు కావడం విశేషం. ఈ కార్యక్రమంపై ఓపెన్ఏఐ ఇండియా, ఆసియా పసిఫిక్ ఎడ్యుకేషన్ హెడ్ రాఘవ్ గుప్తా స్పందించారు. పైలట్ కార్యక్రమం ప్రారంభమైన కొద్ది నెలల్లోనే చాట్జీపీటీ ఫర్ అకడమిక్ రీసెర్చర్స్ సేవలను ఉపయోగించుకోవడానికి భారతీయ విద్యాసంస్థల నుంచి భారీ స్పందన వచ్చిందని చెప్పారు. ప్రపంచవ్యాప్తంగా అత్యధిక ఆసక్తి చూపిన దేశాల్లో భారత్ కూడా ఒకటిగా నిలిచిందని తెలిపారు. విద్యారంగంలో తమ ప్రయత్నాలు కేవలం టెక్నాలజీని అందించడానికే పరిమితం కావని రాఘవ్ గుప్తా చెప్పారు. అవసరమైన నైపుణ్యాలు నేర్పించడం, విద్యాసంస్థలతో కలిసి పనిచేయడం, పరిశోధనలకు మద్దతు ఇవ్వడం కూడా తమ లక్ష్యంలో భాగమని వివరించారు. ఈ కొత్త కార్యక్రమం కూడా అదే ఉద్దేశంతో రూపొందించామని తెలిపారు.
ఈ ఉచిత చాట్జీపీటీ ప్లస్ సదుపాయంతో పరిశోధకులు ఎన్నో పనులు సులభంగా చేసుకోవచ్చు. సైన్స్కు సంబంధించిన పరిశోధనా పత్రాలను చదివి అర్థం చేసుకోవడం, కొత్త పరిశోధనా ఆలోచనలను రూపొందించడం, వాటిని పరీక్షించడం వంటి పనులకు ఉపయోగించుకోవచ్చు. అంతేకాదు, డేటాను విశ్లేషించడం, రీసెర్చ్కు అవసరమైన కోడ్ రాయడం, అందులోని తప్పులను గుర్తించి సరిచేయడం కూడా చేయొచ్చు. పరిశోధనల కోసం గ్రాంట్ దరఖాస్తులు సిద్ధం చేయడం, పరిశోధనా పత్రాలు (మాన్యుస్క్రిప్ట్స్) రాయడం వంటి పనుల్లోనూ చాట్జీపీటీ సాయం తీసుకోవచ్చు.
ఈ కార్యక్రమంలో కేవలం ఉచిత యాక్సెస్ మాత్రమే కాకుండా, పరిశోధకులకు ప్రత్యేక శిక్షణ, ప్రాక్టికల్ సపోర్ట్ కూడా అందిస్తారు. ఇతర పరిశోధకుల నుంచి కొత్త విషయాలు నేర్చుకునే అవకాశాలు కూడా కల్పిస్తారు. మరో ముఖ్యమైన విషయం ఏంటంటే.. ఈ కార్యక్రమం ద్వారా పరిశోధకులు షేర్ చేసే డేటాను సాధారణంగా తమ ఏఐ మోడల్స్కు శిక్షణ ఇవ్వడానికి ఉపయోగించబోమని ఓపెన్ఏఐ స్పష్టం చేసింది. భారత్లో ఇప్పటికే ఏఐ విద్యపై ఓపెన్ఏఐ పలు కార్యక్రమాలు చేపట్టింది. అందులో భాగంగానే ‘ఓపెన్ఏఐ లెర్నింగ్ యాక్సిలరేటర్’ కార్యక్రమాన్ని ప్రారంభించింది. ఏఐ టెక్నాలజీని అందుబాటులోకి తీసుకురావడం, శిక్షణ ఇవ్వడం, పరిశోధనలను ప్రోత్సహించడం ఈ కార్యక్రమం ముఖ్య ఉద్దేశం.
ఈ ప్రయత్నంలో భాగంగా ఐఐటీ మద్రాస్తో కలిసి ఓపెన్ఏఐ ప్రత్యేక పరిశోధన కార్యక్రమాన్ని కూడా చేపట్టింది. ఏఐ టెక్నాలజీ విద్యార్థుల అభ్యాసానికి, బోధనా పద్ధతులకు ఎలా ఉపయోగపడుతుందో తెలుసుకోవడం ఈ పరిశోధన లక్ష్యం. ఇందుకోసం ఓపెన్ఏఐ 5 లక్షల అమెరికన్ డాలర్లు (500,000 USD) నిధులు కేటాయించింది. మొత్తంగా చూస్తే, భారత్లోని పరిశోధకులకు 12 నెలల పాటు ఉచిత చాట్జీపీటీ ప్లస్ సదుపాయం కల్పించడం ద్వారా పరిశోధనలకు ఏఐని మరింత చేరువ చేయాలని ఓపెన్ఏఐ భావిస్తోంది. ముఖ్యంగా పరిశోధనా పత్రాల అధ్యయనం, డేటా విశ్లేషణ, కోడింగ్, కొత్త ఆలోచనల అభివృద్ధి వంటి పనుల్లో పరిశోధకులకు ఈ కార్యక్రమం ఉపయోగపడనుంది.

