పిల్లలు చిన్న విషయాలకే ఎందుకు ఏడుస్తారు?
పిల్లలు ఆడుకుంటున్నప్పుడు ఇంటికి వెళ్లమంటే ఏడవడం, టీవీ ఆపమంటే కోపం తెచ్చుకోవడం, స్కూల్‌కు వెళ్లే సమయంలో బట్టలు వేసుకోవడానికి నిరాకరించడం వంటివి సాధారణంగా కనిపిస్తుంటాయి. పెద్దవాళ్లకు ఒక పని ఆపి మరో పని చేయడం సులభంగా అనిపిస్తుంది. కానీ చిన్నపిల్లలకు అలా ఉండదు. వారు ఇష్టంగా ఆడుకుంటున్నప్పుడు ఒక్కసారిగా ఆపి మరో పని చేయాలంటే ఇబ్బందిగా భావిస్తారు. ముఖ్యంగా తమకు నచ్చిన పనిని మధ్యలో ఆపాల్సి వచ్చినప్పుడు నిరాశ, కోపం, బాధను ఏడుపు రూపంలో బయటపెడతారు.
దీనికి పిల్లల్లో మెదడు ఇంకా అభివృద్ధి చెందుతుండటం కూడా ఒక కారణం. ఒక పనిపై దృష్టిని మార్చుకోవడం, కోరికలను అదుపులో ఉంచుకోవడం, పరిస్థితులకు అనుగుణంగా ప్రవర్తించడం వంటి నైపుణ్యాలను ఎగ్జిక్యూటివ్ ఫంక్షన్స్ అంటారు. చిన్న వయసులో ఈ సామర్థ్యాలు పూర్తిగా అభివృద్ధి చెందవు. పిల్లలు పెరుగుతున్న కొద్దీ వీటిని నేర్చుకుంటారు. అలసటగా ఉన్నప్పుడు, ఆకలిగా ఉన్నప్పుడు లేదా ఇష్టమైన పనిని అకస్మాత్తుగా ఆపాల్సి వచ్చినప్పుడు భావోద్వేగాలను నియంత్రించుకోలేకపోవచ్చు.
తల్లిదండ్రులు తొందరపెడితే సమస్య ఎందుకు పెరుగుతుంది?
ఉదాహరణకు స్కూల్ బస్సు వచ్చే సమయం దగ్గరపడింది. తల్లిదండ్రులకు ఆఫీసుకు వెళ్లే హడావుడి ఉంది. పిల్లలు మాత్రం యూనిఫాం వేసుకోవడానికి ఇష్టపడటం లేదు. మొదట నచ్చజెప్పే తల్లిదండ్రులు సమయం గడిచేకొద్దీ గట్టిగా మాట్లాడటం మొదలుపెడతారు. దీంతో పిల్లలు మరింత ఏడవడం లేదా మొండిగా ప్రవర్తించడం చేస్తారు. ఇక్కడ తల్లిదండ్రులు ఆలస్యమవుతోందనే ఒత్తిడిలో ఉంటే, పిల్లలు తమకు ఇష్టమైన పనిని ఆపాల్సి వస్తోందనే బాధలో ఉంటారు. ఇద్దరూ ఒత్తిడికి గురైనప్పుడు సమస్య మరింత పెరుగుతుంది. అందుకే పిల్లల భావాలను అర్థం చేసుకుంటూనే అవసరమైన నియమాలను ప్రశాంతంగా చెప్పాలి.
పిల్లల మారాం గురించి పరిశోధనలు ఏం చెబుతున్నాయి?
2022లో Journal of Developmental and Behavioral Pediatrics జర్నల్‌లో ప్రచురితమైన ఒక అధ్యయనంలో ఒకటి నుంచి ఐదేళ్ల వయసున్న 861 మంది పిల్లల ప్రవర్తనను పరిశీలించారు. పిల్లల వయసు పెరుగుతున్న కొద్దీ టాంట్రమ్స్ తరచుదనం సాధారణంగా తగ్గుతుందని గుర్తించారు. అయితే అవి ఎంతసేపు కొనసాగుతున్నాయి, ఎంత తరచుగా వస్తున్నాయి అనే అంశాలు కూడా ముఖ్యమని పరిశోధకులు పేర్కొన్నారు. అలాగే 2023లో Research on Child and Adolescent Psychopathology జర్నల్‌లో ప్రచురితమైన మరో అధ్యయనంలో 94 మంది చిన్నపిల్లలను ఏడాది పాటు పరిశీలించారు. పిల్లలను క్రమశిక్షణలో పెట్టే సమయంలో తల్లిదండ్రులు అనుసరించే పద్ధతులు, పిల్లల్లో టాంట్రమ్స్ తీవ్రత మధ్య సంబంధం ఉన్నట్లు గుర్తించారు. అయితే ఈ ఫలితాలు ప్రతి పిల్లవాడికీ ఒకేలా వర్తించవు.
పిల్లలు మారాం చేస్తున్నప్పుడు తల్లిదండ్రులు ఏం చేయాలి?
పిల్లలు ఏడుస్తున్నప్పుడు వెంటనే కోపం తెచ్చుకోకుండా ముందుగా వారి భావాలను అర్థం చేసుకోవాలి. ఉదాహరణకు.. ఇంకా ఆడుకోవాలని ఉందని నాకు తెలుసు. కానీ ఇప్పుడు ఇంటికి వెళ్లాల్సిన సమయం వచ్చింది అని ప్రేమగా చెప్పాలి. ఇలా మాట్లాడటం వల్ల పిల్లలు తమ భావాలను తల్లిదండ్రులు అర్థం చేసుకుంటున్నారని భావిస్తారు. అదే సమయంలో నిర్ణయాన్ని కూడా స్పష్టంగా తెలియజేయాలి.
పిల్లలకు చిన్న చిన్న ఎంపికలు ఇవ్వడం మరో మంచి పద్ధతి. ఉదాహరణకు నీలం రంగు షూస్ వేసుకుంటావా? ఎరుపు రంగువి వేసుకుంటావా? అని అడగవచ్చు. దీనివల్ల పిల్లలకు తమ నిర్ణయానికి కూడా ప్రాధాన్యం ఉందనే భావన కలుగుతుంది. అలాగే పార్కులో ఆడుకుంటున్నప్పుడు ఒక్కసారిగా ఇంటికి వెళ్లిపోదామని చెప్పకుండా ఐదు నిమిషాల ముందే తెలియజేయాలి. మరో ఐదు నిమిషాలు ఆడుకున్నాక ఇంటికి వెళ్దామని చెప్పడం వల్ల వారు మానసికంగా సిద్ధమవుతారు.
పిల్లలు తీవ్రంగా ఏడుస్తున్నప్పుడు ఎక్కువగా మాట్లాడటం, పెద్ద పెద్ద వివరణలు ఇవ్వడం మంచిది కాదు. ఆ సమయంలో చిన్న మాటలతో భరోసా ఇవ్వాలి. వారు ప్రశాంతంగా మారిన తర్వాత ఎందుకు అలా ప్రవర్తించారో వివరించాలి. ఉదయం హడావుడి తగ్గించడానికి స్కూల్ బ్యాగ్ సర్దడం, యూనిఫాం సిద్ధం చేయడం, వాటర్ బాటిల్ నింపడం వంటి పనులను ముందు రోజే పూర్తి చేసుకోవాలి. దీనివల్ల పిల్లలను పదేపదే తొందరపెట్టాల్సిన అవసరం తగ్గుతుంది.
నలుగురిలో పిల్లలు ఏడిస్తే ఏం చేయాలి?
పిల్లలు ఇతరుల ముందు ఏడుస్తుంటే చుట్టూ ఉన్నవారు ఏమనుకుంటారోనని చాలామంది తల్లిదండ్రులు ఆందోళన చెందుతారు. ఆ ఒత్తిడితో పిల్లలపై గట్టిగా అరవడం లేదా కొట్టడం చేస్తుంటారు. కానీ అలా చేయడం వల్ల పరిస్థితి మరింత కష్టమవుతుంది. వీలైతే పిల్లలను ప్రశాంతమైన ప్రదేశానికి తీసుకెళ్లి నెమ్మదిగా మాట్లాడాలి. వారు ఏడుస్తున్నారని ప్రతిసారీ వారి కోరిక తీర్చాల్సిన అవసరం లేదు. అయితే ఎందుకు ఆ పని చేయలేమో ప్రేమగా వివరించాలి.
ఎప్పుడు నిపుణులను సంప్రదించాలి?
పిల్లల్లో అప్పుడప్పుడు మారాం చేయడం, ఏడవడం సాధారణమే. కానీ తరచూ తీవ్రమైన కోపంతో ప్రవర్తించడం, ఎక్కువసేపు ఏడుస్తూ ఉండటం, తమను తాము లేదా ఇతరులను గాయపరచుకోవడం, రోజువారీ పనులకు ఆటంకం కలిగించడం వంటి లక్షణాలు కనిపిస్తే వైద్యులను లేదా పిల్లల మానసిక ఆరోగ్య నిపుణులను సంప్రదించడం మంచిది.
చివరిగా తల్లిదండ్రులు గుర్తుంచుకోవాల్సిన విషయం ఏమిటంటే.. పిల్లలు మారాం చేస్తున్న ప్రతిసారీ వారిని మొండివాళ్లుగా భావించకూడదు. వారి వయసు, భావోద్వేగాలు, అవసరాలను అర్థం చేసుకుని ఓపికగా వ్యవహరించాలి. ప్రేమతో పాటు సరైన హద్దులు, ప్రశాంతమైన సంభాషణ అలవాటు చేస్తే పిల్లలు క్రమంగా తమ భావాలను నియంత్రించుకోవడం నేర్చుకుంటారు.
