Last Updated:
షాబాద్ ఆరు హత్యల కేసులో కీలక ఆధారం పోలీసుల చేతికి చిక్కింది. నిందితుడు రాజ్కుమార్ మృతదేహం వద్ద లభించిన మొబైల్లో హత్యలకు ముందు రికార్డ్ చేసిన సెల్ఫీ వీడియో బయటపడింది. జూలై 10 సాయంత్రం 4:55 గంటలకు రికార్డ్ చేసిన ఈ వీడియోలో తన మానసిక పరిస్థితి, ఆర్థిక ఇబ్బందులు, కేసు వెనుక కారణాలను వివరించినట్లు పోలీసులు తెలిపారు. వీడియోను ఫోరెన్సిక్ పరీక్షలకు పంపించి అన్ని కోణాల్లో దర్యాప్తు కొనసాగిస్తున్నారు.
రంగారెడ్డి జిల్లా షాబాద్ మండలంలో రాష్ట్రవ్యాప్తంగా సంచలనం సృష్టించిన ఆరు హత్యల కేసు దర్యాప్తులో పోలీసులు కీలక ఆధారాలను స్వాధీనం చేసుకున్నారు. ఈ కేసులో నిందితుడు రాజ్కుమార్ మృతదేహం లభ్యమైన ప్రాంతంలోనే అతడి మొబైల్ ఫోన్ కూడా దొరికింది. ఆ ఫోన్లో హత్యలకు ముందు రికార్డు చేసిన సెల్ఫీ వీడియో లభించడంతో కేసు దర్యాప్తుకు కొత్త దిశ లభించినట్లు ఫ్యూచర్ సిటీ పోలీస్ కమిషనర్ (సీపీ) తరుణ్ జోషి వెల్లడించారు. ఈ వీడియోలో నిందితుడు తన మానసిక పరిస్థితి, ఆర్థిక ఇబ్బందులు, ఈ ఘోర నిర్ణయం వెనుక ఉన్న కారణాలను వివరించినట్లు పోలీసులు తెలిపారు.
సీపీ వెల్లడించిన వివరాల ప్రకారం, రాజ్కుమార్ జూలై 10 సాయంత్రం 4:55 గంటలకు తన మొబైల్ ఫోన్లో ఈ సెల్ఫీ వీడియోను రికార్డు చేశాడు. ఈ వీడియోలో తన జీవితంలో ఎదురైన పరిణామాలు, తనకు జరిగిన అన్యాయం, ఆర్థికంగా ఎదుర్కొన్న నష్టాల గురించి భావోద్వేగంగా మాట్లాడినట్లు అధికారులు వెల్లడించారు. ప్రస్తుతం ఈ వీడియోను, మొబైల్ ఫోన్ను శాస్త్రీయ పరీక్షల కోసం ఫోరెన్సిక్ సైన్స్ ల్యాబ్కు పంపించినట్లు తెలిపారు.
Big Breaking News 🚨
ఆరు హత్యలకు ముందు రోజు హంతకుడు తీసుకున్న సెల్ఫ్ వీడియో
బాలికను నమ్ముకుని అన్నివిధాల మోసపోయానని.. అప్పులపాలయ్యానని
జీవితం మీద విరక్తి, సెల్ఫీ వీడియోలో చెప్పిన హంతకుడుమృతదేహం వద్ద లభించిన రాజ్ కుమార్ సెల్ ఫోన్ లో సెల్ఫ్ వీడియో ను గుర్తించిన పోలీసులు.… pic.twitter.com/k94zSJJKji
— Telangana365 (@Telangana365) July 13, 2026
వీడియోలో రాజ్కుమార్ మాట్లాడుతూ, తన సంపాదనలో సగం వరకు ఇతరుల కోసం ఖర్చు చేశానని, తన వద్ద నుంచి పెద్ద మొత్తంలో డబ్బులు తీసుకుని పూర్తిగా నష్టపరిచారని పేర్కొన్నట్లు పోలీసులు వెల్లడించారు. ఒక యువతిని నమ్మి తీవ్ర అప్పుల్లో కూరుకుపోయానని, చివరకు తన పిల్లలకు ఆస్తి కూడా మిగలకుండా పోయిందని ఆవేదన వ్యక్తం చేసినట్లు తెలిపారు. తనను ఆర్థికంగా దెబ్బతీసిన తర్వాత తనపైనే కేసు పెట్టి జైలుకు పంపించారని కూడా వీడియోలో పేర్కొన్నట్లు సీపీ వివరించారు.
ఈ వీడియో ఆధారంగా ప్రాథమికంగా చూస్తే, తనకు అత్యంత సన్నిహితులుగా భావించిన వారే మోసం చేశారనే భావన, తనపై నమోదైన పోక్సో కేసు కారణంగా రాజ్కుమార్ తీవ్ర మనస్తాపానికి గురైనట్లు దర్యాప్తు అధికారులు అనుమానిస్తున్నారు. అయితే ఈ వీడియోలో చేసిన ఆరోపణల నిజానిజాలను కూడా అన్ని కోణాల్లో పరిశీలిస్తున్నామని పోలీసులు స్పష్టం చేశారు.
ఈ కేసు దర్యాప్తులో మరో కీలక అంశం కూడా వెలుగులోకి వచ్చింది. రాజ్కుమార్ తన భార్య, పిల్లలను హత్య చేసిన సమయంలో ఒక మైనర్ బాలిక కారులోనే ఉన్నట్లు విచారణలో గుర్తించినట్లు పోలీసులు తెలిపారు. ఈ అంశంపై కూడా ప్రత్యేకంగా దర్యాప్తు కొనసాగుతోందని, ప్రతి ఆధారాన్ని శాస్త్రీయంగా పరిశీలిస్తున్నామని అధికారులు వెల్లడించారు.
ఇక ఈ కేసు నేపథ్యాన్ని పరిశీలిస్తే, తనపై పోక్సో కేసు నమోదు కావడంతో రాజ్కుమార్ తీవ్ర కక్ష పెంచుకున్నట్లు పోలీసులు భావిస్తున్నారు. జూలై 10న మొదట షాబాద్ పట్టణంలో మైనర్ బాలిక తల్లి, నాయనమ్మపై దాడి చేసి హత్య చేసినట్లు దర్యాప్తులో తేలింది. అనంతరం తన సొంత భార్య, పిల్లలను కూడా దారుణంగా హత్య చేశాడు. తర్వాత ఆ మైనర్ బాలికను కారులో తీసుకెళ్లి అఖిల్ సాగర్ చెరువు సమీపంలో గొంతు కోసి హత్య చేసినట్లు పోలీసులు వెల్లడించారు.
ఈ ఘటన తర్వాత రాష్ట్రవ్యాప్తంగా తీవ్ర కలకలం రేగడంతో పోలీసులు ప్రత్యేక బృందాలతో నిందితుడి కోసం విస్తృత గాలింపు చేపట్టారు. దర్యాప్తు కొనసాగుతున్న సమయంలో రాజ్కుమార్ విషం సేవించి ఆత్మహత్య చేసుకున్నట్లు పోలీసులు గుర్తించారు. అతడి మృతదేహం లభించిన ప్రాంతంలోనే మొబైల్ ఫోన్ కూడా స్వాధీనం కావడంతో దర్యాప్తుకు కీలక ఆధారాలు లభించాయి.
ప్రస్తుతం సెల్ఫీ వీడియో, మొబైల్ డేటా, ఇతర డిజిటల్ ఆధారాలను ఫోరెన్సిక్ నిపుణులు విశ్లేషిస్తున్నారు. ఆ నివేదికల ఆధారంగా కేసులోని అన్ని అంశాలను సమగ్రంగా పరిశీలించి పూర్తి నిజాలను వెలికితీసేందుకు దర్యాప్తు కొనసాగుతోందని ఫ్యూచర్ సిటీ పోలీసులు వెల్లడించారు.
Hyderabad,Telangana
