Tanishq Robbery: షట్టర్ పగలగొట్టి.. గోడకు కన్నం వేసి రూ.50 కోట్ల నగలు దోచేశారు! |

షోరూమ్ నిర్వాహకులు ఇచ్చిన ఫిర్యాదు ప్రకారం.. దాదాపు 16 కిలోల బంగారంతో పాటు వజ్రాభరణాలు కూడా చోరీకి గురయ్యాయి. వీటి మొత్తం విలువ సుమారు రూ.50 కోట్లుగా అంచనా వేస్తున్నారు. బుధవారం అర్ధరాత్రి సమయంలో దుండగులు షోరూమ్‌లోకి చొరబడి ఈ దోపిడీకి పాల్పడినట్లు సమాచారం. షట్టర్‌ను బద్దలుకొట్టడంతో పాటు వెనుక వైపు నుంచి కూడా లోపలికి ప్రవేశించేందుకు ప్రయత్నించిన ఆనవాళ్లు కనిపించాయి.

11వ తేదీ ఉదయం షోరూమ్‌కు తిరిగి వచ్చిన నిర్వాహకులకు అక్కడి పరిస్థితి చూసి అనుమానం కలిగింది. వెనుక వైపు తలుపులు ధ్వంసమై ఉండటాన్ని గుర్తించారు. లోపలికి వెళ్లి పరిశీలించగా భారీగా నగలు కనిపించకుండా పోయినట్లు తెలుసుకున్నారు. వెంటనే పోలీసులను ఆశ్రయించి ఫిర్యాదు చేశారు. పోలీసులు కేసు నమోదు చేసి దర్యాప్తు ప్రారంభించారు.

ఈ షోరూమ్‌ను సుమారు 10 నుంచి 15 రోజుల క్రితమే ప్రారంభించినట్లు సమాచారం. స్టోర్ నిర్మాణ పనులు దాదాపు 70 శాతం పూర్తయిన దశలోనే ప్రారంభించినట్లు కూడా కథనాలు వెల్లడించాయి. ప్రారంభమైన కొద్ది రోజులకే ఇంత పెద్ద మొత్తంలో నగలు దోచుకెళ్లడం ఆందోళన కలిగిస్తోంది. దొంగలు ఎంతమంది వచ్చారు? ముందుగా రెక్కీ నిర్వహించారా? చోరీ చేసిన నగలను ఎక్కడికి తరలించారు? అనే కోణాల్లో పోలీసులు విచారణ చేపడుతున్నారు. తమిళనాడులో నగల దుకాణాలే లక్ష్యంగా జరుగుతున్న వరుస దొంగతనాల నేపథ్యంలో ఈ ఘటన ప్రాధాన్యం సంతరించుకుంది.