8వ వేతన సంఘం ముందు ఉద్యోగ సంఘాలు వేర్వేరు ఫిట్‌మెంట్ ఫ్యాక్టర్లతో కనీస వేతనాల పెంపును ప్రతిపాదించాయి. MSA సంఘం 3.61 ఫిట్‌మెంట్ ఫ్యాక్టర్‌తో కనీస వేతనాన్ని రూ.65,000కు పెంచాలని కోరుతోంది. NC-JCM, భారత్ పెన్షనర్స్ సమాజ్ (BPS) రెండూ 3.833 ఫిట్‌మెంట్ ఫ్యాక్టర్‌ను ప్రతిపాదిస్తూ కనీస వేతనం రూ.69,000గా ఉండాలని సూచించాయి. మరోవైపు, BPMS సంఘం 4.00 ఫిట్‌మెంట్ ఫ్యాక్టర్‌తో కనీస వేతనాన్ని రూ.72,000కు పెంచాలని డిమాండ్ చేస్తోంది. అంటే ఈ ప్రతిపాదనల్లో అత్యధికంగా రూ.72,000 కనీస వేతనాన్ని BPMS కోరుతోంది. అయితే ఇవన్నీ ఉద్యోగ సంఘాలు చేసిన డిమాండ్లు మాత్రమే. వీటిపై కేంద్ర ప్రభుత్వం ఇంకా తుది నిర్ణయం తీసుకోవాల్సి ఉంది. ఈ ప్రతిపాదనల్లో కనీస, గరిష్ఠ వేతనాల మధ్య నెలకు సుమారు రూ.7,000 తేడా ఉంది. NC-JCM స్టాఫ్ సైడ్ వేతన మ్యాట్రిక్స్‌ను కూడా సూచించింది. దీని ప్రకారం లెవల్ 1 ఉద్యోగులకు రూ.69,000, లెవల్ 6కు రూ.1,35,700, విలీనం చేసిన లెవల్ 9, 10లకు రూ.2,15,100 ప్రాథమిక వేతనం ఉండాలని కోరింది. రైల్వే సీనియర్ సిటిజన్స్ వెల్ఫేర్ సొసైటీ మాత్రం నిర్దిష్ట ఫిట్‌మెంట్ ఫ్యాక్టర్‌ను సూచించలేదు. కేవలం డీఏ ప్రభావాన్ని సర్దుబాటు చేయడం కాకుండా, ఉద్యోగుల వాస్తవ ఆదాయం పెరిగేలా వేతనాల్లో మార్పులు ఉండాలని అభిప్రాయపడింది.
