దీపావళి వేళ ఊహించని షాక్.. ఒక్కసారిగా స్వీట్లపైకి తేనెటీగల గుంపు దాడి.. లక్షల్లో నష్టం! |

హర్యానాలోని ఫతేబాద్ ప్రాంతంలో దీపావళి సందర్భంగా ఓ వ్యాపారి పెద్ద మొత్తంలో మిఠాయిలను తయారు చేయించాడు. పండుగ సమయంలో ఎక్కువ మంది కస్టమర్లు వస్తారని భావించి వాటిని విక్రయించేందుకు బహిరంగ ప్రదేశంలో ప్రత్యేక స్టాల్ ఏర్పాటు చేశాడు. వివిధ రకాల స్వీట్లను అందంగా అమర్చి అమ్మకానికి సిద్ధం చేశాడు. అయితే సమీపంలో ఉన్న తేనెటీగల గుంపు మిఠాయిల వాసనకు ఆకర్షితమైంది. కొద్దిసేపటికే పెద్ద సంఖ్యలో తేనెటీగలు అక్కడికి చేరుకుని స్వీట్లపై వాలాయి.

తేనెటీగలు ఒక్కసారిగా స్వీట్లపైకి రావడంతో స్టాల్‌లో పనిచేస్తున్న సిబ్బంది తీవ్ర ఆందోళనకు గురయ్యారు. వాటిని అక్కడి నుంచి వెళ్లగొట్టేందుకు పలుమార్లు ప్రయత్నించినప్పటికీ ఫలితం లేకుండా పోయింది. తేనెటీగలు గుంపులుగా ఉండటంతో వాటి దగ్గరకు వెళ్లేందుకు కూడా సిబ్బంది భయపడ్డారు. వాటి దాడిలో ముగ్గురు సిబ్బంది గాయపడినట్లు సమాచారం. దీంతో స్టాల్ వద్ద పరిస్థితి మరింత ఇబ్బందికరంగా మారింది.

మిఠాయిలన్నీ తేనెటీగలతో నిండిపోవడంతో వాటిని కొనుగోలు చేసేందుకు వచ్చిన వినియోగదారులు వెనక్కి తగ్గారు. సాధారణంగా దీపావళి సమయంలో స్వీట్ల దుకాణాల వద్ద కొనుగోలుదారులతో సందడి కనిపిస్తుంది. కానీ ఈ స్టాల్ వద్ద మాత్రం తేనెటీగల కారణంగా ఎవరూ మిఠాయిలను కొనుగోలు చేసేందుకు ముందుకు రాలేదు. దీంతో వ్యాపారి తీవ్ర ఇబ్బందులు ఎదుర్కొన్నాడు. పరిస్థితిని చక్కదిద్దేందుకు మిఠాయిల్లో కొన్నింటిని పలువురికి ఉచితంగా పంపిణీ చేయాలని కూడా ప్రయత్నించినట్లు సమాచారం.

ఈ అనూహ్య ఘటన కారణంగా సుమారు రూ.2 లక్షల మేర నష్టం వాటిల్లినట్లు వ్యాపారి తెలిపాడు. పండుగ కోసం ఎంతో ఆశతో తయారు చేయించిన మిఠాయిలు అమ్ముడుపోకపోవడంతో తీవ్ర నిరాశకు గురయ్యాడు. తేనెటీగలు స్వీట్లపై గుంపులుగా వాలిన దృశ్యాలు సోషల్ మీడియాలో వైరల్‌గా మారాయి. పండుగ సీజన్‌లో వ్యాపారులకు ఎదురైన ఈ వింత అనుభవంపై నెటిజన్లు వివిధ రకాలుగా స్పందిస్తున్నారు. బహిరంగ ప్రదేశాల్లో ఆహార పదార్థాలను విక్రయించే సమయంలో వాటిని తగిన విధంగా కప్పి ఉంచడం ఎంత ముఖ్యమో ఈ ఘటన మరోసారి గుర్తు చేస్తోంది.