చివరకు పుష్పక విమానం ఏమైంది?
రామరావణ యుద్ధంలో రావణుడు మరణించిన తర్వాత లంకకు రాజైన విభీషణుడు శ్రీరాముడికి పుష్పక విమానాన్ని సమర్పించాడు. 14 ఏళ్ల వనవాసం ముగియడంతో అయోధ్యకు త్వరగా చేరుకోవాలని భావించిన శ్రీరాముడు సీతమ్మ, లక్ష్మణుడు, హనుమంతుడు, సుగ్రీవుడు తదితరులతో కలిసి ఈ విమానంలోనే అయోధ్యకు బయలుదేరాడు. వాల్మీకి రామాయణంలోని యుద్ధకాండ 124వ సర్గలో విభీషణుడు స్వయంగా ఈ విమానం కుబేరుడిదని, రావణుడు యుద్ధంలో అతడిని ఓడించి స్వాధీనం చేసుకున్నాడని శ్రీరాముడికి చెబుతాడు. ఇక్కడ మరో ఆసక్తికరమైన విషయం ఉంది. అయోధ్యకు చేరుకున్న తర్వాత శ్రీరాముడు పుష్పక విమానాన్ని తిరిగి కుబేరుడి దగ్గరకు పంపించాడు. అంటే రావణుడి నుంచి శ్రీరాముడి చేతికి వచ్చిన ఈ దివ్య విమానం చివరకు తన అసలు యజమాని దగ్గరకే చేరుకుంది.
