శుభ్రం చేసే ముందు ఈ విషయాలు తెలుసుకోండి
ముందుగా మీ వాచ్ పట్టీ ఏ రకమైన పదార్థంతో తయారైందో తెలుసుకోవాలి. అది అసలైన లెదర్, సింథటిక్ లెదర్ లేదా స్వెడ్‌తో తయారైందా అనేది నిర్ధారించుకోవాలి. ఎందుకంటే ఒక్కో రకమైన పట్టీని శుభ్రం చేసే విధానం వేరుగా ఉంటుంది. లెదర్ పట్టీలను నీటిలో నానబెట్టి ఉతకకూడదు. ఎక్కువ నీరు, తేమ, ఎండ నేరుగా తగలడం వల్ల వాటి నాణ్యత దెబ్బతింటుంది.
ముందుగా మృదువైన మైక్రోఫైబర్ గుడ్డతో పట్టీకి ఉన్న దుమ్మును సున్నితంగా తుడవాలి. పట్టీ పైభాగంతో పాటు కిందిభాగం, అంచులు, బకిల్ దగ్గర కూడా శుభ్రం చేయాలి. కుట్ల మధ్య లేదా చిన్న రంధ్రాల్లో దుమ్ము పేరుకుపోతే మెత్తటి బ్రష్‌తో నెమ్మదిగా తొలగించవచ్చు. చెమట లేదా సాధారణ మరకలు ఉంటే శుభ్రమైన గుడ్డను కొద్దిగా నీటితో తడిపి, అదనపు నీటిని పిండేసి పట్టీని తుడవాలి. అవసరమైతే లెదర్‌కు అనుకూలమైన క్లీనర్‌ను తయారీదారు సూచనల ప్రకారం ఉపయోగించాలి.
ఈ పొరపాట్లు అస్సలు చేయకండి
లెదర్ పట్టీపై మరకలు తొలగించడానికి సబ్బు, డిటర్జెంట్, బ్లీచ్, ఆల్కహాల్ లేదా వెనిగర్ వంటి వాటిని ఉపయోగించకూడదు. ఇవి తోలుపై ఉండే సహజ రక్షణ పొరను దెబ్బతీసి రంగు మారడానికి కారణమవుతాయి. శుభ్రం చేసిన తర్వాత పొడి మైక్రోఫైబర్ గుడ్డతో తేమను తొలగించి, గాలి బాగా తగిలే నీడ ఉన్న ప్రదేశంలో ఆరనివ్వాలి. హెయిర్ డ్రైయర్‌తో ఆరబెట్టడం, నేరుగా ఎండలో ఉంచడం వంటివి చేయకూడదు. అధిక వేడి వల్ల లెదర్ ఎండిపోయి పగుళ్లు ఏర్పడవచ్చు. అలాగే కొబ్బరి నూనె, ఆలివ్ ఆయిల్, వంట నూనె లేదా పెట్రోలియం జెల్లీ రాయకూడదు. ఇవి జిడ్డు మరకలను కలిగించవచ్చు. అవసరమైతే మాత్రమే లెదర్‌కు ప్రత్యేకంగా తయారు చేసిన కండీషనర్‌ను ఉపయోగించాలి.
దుర్వాసన రాకుండా ఇలా చూసుకోండి
లెదర్ వాచ్ పట్టీకి చెమట ఎక్కువగా పట్టినప్పుడు దుర్వాసన రావచ్చు. అందుకే వాచీని తీసిన ప్రతిసారీ పొడి, మెత్తటి గుడ్డతో పట్టీ లోపలి భాగాన్ని తుడవాలి. వ్యాయామం చేసేటప్పుడు, ఈత కొట్టేటప్పుడు లేదా స్నానం చేసేటప్పుడు లెదర్ పట్టీ వాచీని ధరించకపోవడం మంచిది. పెర్ఫ్యూమ్, బాడీ లోషన్, సన్‌స్క్రీన్ రాసుకున్న వెంటనే వాచీ పెట్టుకోకూడదు. అవి పట్టీపై మరకలు ఏర్పడటానికి కారణం కావచ్చు.
వాచీని ఉపయోగించనప్పుడు పొడి, గాలి ఆడే ప్రదేశంలో భద్రపరచాలి. తేమ ఎక్కువగా ఉండే బాత్‌రూమ్‌లో లేదా వేడి తగిలే ప్రదేశాల్లో ఉంచకూడదు. జపాన్‌కు చెందిన సైకో వాచ్ కార్పొరేషన్ మార్గదర్శకాల ప్రకారం తేమ, చెమట, ప్రత్యక్ష సూర్యరశ్మి లెదర్ పట్టీలను దెబ్బతీయవచ్చు. ఉష్ణోగ్రత, తేమ, అతినీలలోహిత కిరణాలు కూడా తోలు నాణ్యతపై ప్రభావం చూపుతాయి. కాబట్టి ఈ చిన్న చిన్న జాగ్రత్తలు పాటిస్తే మీ లెదర్ వాచ్ పట్టీని ఎక్కువ కాలం శుభ్రంగా, అందంగా ఉంచుకోవచ్చు.
