Lawrence Bishnoi: టైగర్ ష్రాఫ్‌పై ఎందుకు కాల్పులు? కారణం సల్మాన్ ఖాన్! బాలీవుడ్‌ను వణికిస్తోన్న బిష్ణోయ్ గ్యాంగ్! | తెలుగు సినిమా వార్తలు

ఈ మొత్తం వివాదానికి కేంద్ర బిందువు 1998 నాటి కృష్ణజింకల వేట కేసు. రాజస్థాన్‌లో షూటింగ్ సమయంలో సల్మాన్ ఖాన్ కృష్ణజింకలను వేటాడారనే ఆరోపణలు వచ్చాయి. బిష్ణోయ్ వర్గం కృష్ణజింకలను తమ దైవ సమానంగా, పవిత్రంగా భావిస్తుంది. తమ మత విశ్వాసాలను సల్మాన్ దెబ్బతీశారని భావించిన లారెన్స్ బిష్ణోయ్, ఆయన్ను అంతమొందించడమే లక్ష్యంగా పెట్టుకున్నాడు. సల్మాన్ ఖాన్ తమ ఆలయానికి వచ్చి బహిరంగ క్షమాపణ చెప్పాలని, లేనిపక్షంలో ప్రాణాలు తీస్తామని పలుమార్లు హెచ్చరించాడు.

సల్మాన్ ఖాన్‌కు భారీగా కమాండోలు, వై-ప్లస్ కేటగిరీ భద్రత ఉండటంతో ఆయన్ను నేరుగా చేరుకోవడం దుండగులకు కష్టతరంగా మారింది. దీంతో ఆయనకు సన్నిహితంగా మెలిగేవారిని, కలిసి పని చేసే నటీనటులను, నిర్మాతలు, దర్శకులను బిష్ణోయ్ గ్యాంగ్ లక్ష్యంగా చేసుకుంటోంది. సల్మాన్‌తో సంబంధాలు కొనసాగిస్తే తీవ్ర పరిణామాలుంటాయని హెచ్చరిస్తూ సినీ ప్రముఖులను భయభ్రాంతులకు గురిచేస్తోంది. టైగర్ ష్రాఫ్, రోహిత్ శెట్టి, కపిల్ శర్మ వంటి వారిపై వచ్చిన బెదిరింపులు, దాడులు ఈ కోవకు చెందినవేనని దర్యాప్తు వర్గాలు భావిస్తున్నాయి.

సాధారణ వ్యాపారులను లేదా స్థానిక ప్రత్యర్థులను బెదిరిస్తే వచ్చే గుర్తింపు కంటే బాలీవుడ్ ప్రముఖులను టార్గెట్ చేస్తే దేశవ్యాప్తంగా మీడియా దృష్టి ఆకర్షించవచ్చనేది ఈ ముఠా ప్రధాన ఎత్తుగడ. ప్రముఖ సినీ తారలపై ఒక్క కాల్పుల ఘటన జరిగినా అంతర్జాతీయ స్థాయిలో వార్తల్లో నిలుస్తుంది. ఈ ప్రచారం ద్వారా దేశవ్యాప్తంగా క్రిమినల్ ప్రపంచంలో తమ ఆధిపత్యాన్ని, భయాన్ని సులభంగా చాటవచ్చని బిష్ణోయ్ భావిస్తున్నాడు.

1990ల కాలంలో ముంబై అండర్‌వరల్డ్ నడిపినట్లుగానే.. సినీ ప్రముఖులను, బడా వ్యాపారులను భయపెట్టి కోట్లాది రూపాయల ‘ప్రొటెక్షన్ మనీ’ (కప్పం) వసూలు చేయాలనేది ఈ సిండికేట్ అసలు వ్యూహం. భారత్, కెనడా, అమెరికాల్లో విస్తరించిన తన నెట్‌వర్క్ ద్వారా హవాలా, బెదిరింపుల దందా నడపడానికి ముంబై సినీ పరిశ్రమను ఆర్థిక వనరుగా మార్చుకోవాలని చూస్తున్నారు. ఇప్పటికే పలువురు ప్రముఖులకు కోట్ల రూపాయల డిమాండ్‌తో కూడిన వాయిస్ మెసేజ్‌లు రావడం ఈ దోపిడీ నెట్‌వర్క్‌ను స్పష్టం చేస్తోంది.