Last Updated:
ఆంధ్రప్రదేశ్ ప్రభుత్వ పాఠశాలల్లో మధ్యాహ్న భోజన పథకంలో కీలక మార్పులు చోటుచేసుకోనున్నాయి. విద్యార్థులకు ఇకపై నాణ్యమైన స్టీమ్ రైస్ అందించేందుకు ప్రభుత్వం చర్యలు చేపట్టింది.
ఆంధ్రప్రదేశ్ ప్రభుత్వ పాఠశాలల్లో చదువుతున్న విద్యార్థులకు మరింత నాణ్యమైన, రుచికరమైన పౌష్టికాహారం అందించేందుకు రాష్ట్ర ప్రభుత్వం కీలక నిర్ణయం తీసుకుంది. మధ్యాహ్న భోజన పథకంలో భాగంగా విద్యార్థులకు ఇకపై ముద్దగా కాకుండా నాణ్యమైన స్టీమ్ రైస్ అందించేందుకు చర్యలు వేగవంతం చేసింది. ఈ విషయాన్ని రాష్ట్ర మంత్రి నాదెండ్ల మనోహర్ వెల్లడించారు.
గుంటూరు జిల్లా మంగళగిరి మండలంలోని అక్షయపాత్ర కిచెన్ను మంత్రి సందర్శించి, విద్యార్థులకు సిద్ధం చేస్తున్న మధ్యాహ్న భోజనాన్ని స్వయంగా పరిశీలించారు. వంట నాణ్యత, పరిశుభ్రత, ఆహార తయారీ విధానాన్ని పరిశీలిస్తూ అధికారులు, అక్షయపాత్ర ప్రతినిధులతో సమీక్ష నిర్వహించారు.
ఈ సందర్భంగా పాఠశాలల్లో విద్యార్థులకు అందిస్తున్న అన్నం ముద్దగా వస్తోందనే ఫిర్యాదులపై మంత్రి స్పందించారు. దీనికి గల కారణాలపై అక్షయపాత్ర ప్రతినిధులను ప్రశ్నించగా, ప్రస్తుతం సరఫరా అవుతున్న కొత్త బియ్యం కారణంగానే అన్నం ముద్దగా తయారవుతోందని వారు వివరించారు. ఈ సమస్యను అధిగమించాలంటే పాత బియ్యం సరఫరా చేయాలని మంత్రికి విజ్ఞప్తి చేశారు.
వారి వివరణను విన్న మంత్రి నాదెండ్ల మనోహర్ వెంటనే స్పందిస్తూ, అక్షయపాత్రకు ప్రస్తుతం సరఫరా అవుతున్న బియ్యం రకం, నాణ్యత, సరఫరా విధానానికి సంబంధించిన పూర్తి వివరాలను వెంటనే సమర్పించాలని అధికారులను ఆదేశించారు. విద్యార్థులకు అందించే భోజనంలో నాణ్యత విషయంలో ఎలాంటి రాజీ ఉండబోదని స్పష్టం చేశారు.
ఇకపై ప్రభుత్వ పాఠశాలల్లో విద్యార్థులకు మెరుగైన నాణ్యత కలిగిన స్టీమ్ రైస్ అందించేందుకు ప్రభుత్వం ప్రత్యేక ప్రణాళికలు సిద్ధం చేస్తోందని మంత్రి తెలిపారు. ఈ అంశంపై ఇప్పటికే కేంద్ర ప్రభుత్వంతో చర్చలు జరిపినట్లు కూడా వెల్లడించారు. వీలైనంత త్వరగా స్టీమ్ రైస్ను మధ్యాహ్న భోజనంలో భాగంగా అందుబాటులోకి తీసుకురావడమే లక్ష్యంగా చర్యలు కొనసాగుతున్నాయని చెప్పారు.
ప్రభుత్వ పాఠశాలల్లో చదువుతున్న విద్యార్థులకు పోషక విలువలతో కూడిన, రుచికరమైన భోజనం అందించడం ప్రభుత్వ ప్రధాన లక్ష్యమని మంత్రి పేర్కొన్నారు. ప్రస్తుతం వస్తున్న ఫిర్యాదులను దృష్టిలో ఉంచుకుని సమస్యలకు శాశ్వత పరిష్కారం చూపేందుకు ప్రభుత్వం చర్యలు చేపడుతోందన్నారు. ముఖ్యంగా కొత్త బియ్యం వల్ల ఏర్పడుతున్న ఇబ్బందులను అధిగమించి, విద్యార్థులకు మెరుగైన భోజనం అందించేందుకు అవసరమైన మార్పులు తీసుకురానున్నట్లు తెలిపారు.
త్వరలోనే రాష్ట్రవ్యాప్తంగా అన్ని ప్రభుత్వ పాఠశాలల్లో స్టీమ్ రైస్ అందుబాటులోకి వస్తే విద్యార్థులు నాణ్యమైన ఆహారం పొందడంతో పాటు మధ్యాహ్న భోజన పథకంపై మరింత విశ్వాసం పెరుగుతుందని అధికారులు భావిస్తున్నారు. దీనివల్ల విద్యార్థుల ఆరోగ్యం మెరుగుపడటంతో పాటు పాఠశాలలకు హాజరు శాతం కూడా పెరిగే అవకాశాలు ఉన్నాయని ప్రభుత్వం అంచనా వేస్తోంది. ఈ నిర్ణయంతో తల్లిదండ్రులు కూడా సంతృప్తి వ్యక్తం చేస్తున్నట్లు అధికారులు తెలిపారు.
ఇదిలా ఉండగా, ప్రభుత్వ పాఠశాలలు, విద్యాసంస్థల్లో నాణ్యమైన పౌష్టికాహారం అందించడంలో అక్షయపాత్ర ఫౌండేషన్ దేశవ్యాప్తంగా విశేష సేవలు అందిస్తోంది. ఈ సంస్థ 25 ఏళ్ల సేవా ప్రయాణాన్ని పూర్తి చేసుకుని, ఇప్పటివరకు 500 కోట్ల (5 బిలియన్) మధ్యాహ్న భోజనాలను విద్యార్థులకు అందించి అరుదైన మైలురాయిని చేరుకుంది. ఆంధ్రప్రదేశ్, తెలంగాణతో పాటు దేశంలోని అనేక రాష్ట్రాల్లో వేలాది ప్రభుత్వ పాఠశాలలకు ఈ సంస్థ మధ్యాహ్న భోజనాన్ని అందిస్తోంది.
అక్షయపాత్ర ఫౌండేషన్ సాధించిన ఈ ఘనతకు గుర్తింపుగా, ఈ ఏడాది మార్చి 17న ఢిల్లీలో కేంద్ర ప్రభుత్వం నిర్వహించిన పీఎం పోషణ్ పథకం ప్రత్యేక కార్యక్రమానికి రాష్ట్రపతి నుంచి సంస్థకు గౌరవ ఆహ్వానం అందింది. విద్యార్థుల సంక్షేమం కోసం ప్రభుత్వాలు, స్వచ్ఛంద సంస్థలు కలిసి పనిచేస్తే మరింత మెరుగైన ఫలితాలు సాధించవచ్చనే విషయాన్ని అక్షయపాత్ర మరోసారి నిరూపించిందని అధికారులు పేర్కొన్నారు.
Hyderabad,Telangana
