Last Updated:
సరైన పద్ధతిలో తయారు చేస్తే ఇంట్లో కూడా ఎంతో రుచికరమైన ఫ్రెంచ్ ఫ్రైస్ చేసుకోవచ్చు. ముఖ్యంగా బంగాళాదుంపలను కట్ చేసే విధానం, చల్లటి నీటిలో నానబెట్టడం, కార్న్‌ఫ్లోర్ ఉపయోగించడం, రెండుసార్లు వేయించడం వంటి చిన్న చిట్కాలు పాటిస్తే మంచి ఫలితం ఉంటుంది. మరి ఈ రెసిపీ ఎలా తయారు చేయాలో తెలుసుకుందాం.
ఫ్రెంచ్ ఫ్రైస్ పేరు వినగానే చిన్నపిల్లల నుంచి పెద్దల వరకు అందరికీ నోరూరిపోతుంది. ముఖ్యంగా హోటళ్లు, రెస్టారెంట్లలో లభించే బంగారు రంగులో, బయట కరకరలాడుతూ లోపల మెత్తగా ఉండే ఫ్రెంచ్ ఫ్రైస్ అంటే చాలామందికి ఇష్టం. అందుకే పిల్లలు సాయంత్రం స్నాక్స్‌గా వీటిని తినడానికి ఎక్కువగా ఇష్టపడుతుంటారు. అయితే రెస్టారెంట్లలో దొరికే రుచితో ఫ్రెంచ్ ఫ్రైస్‌ను ఇంట్లో తయారు చేయడం కష్టమని చాలామంది అనుకుంటారు. కానీ సరైన పద్ధతిలో తయారు చేస్తే ఇంట్లో కూడా ఎంతో రుచికరమైన ఫ్రెంచ్ ఫ్రైస్ చేసుకోవచ్చు. ముఖ్యంగా బంగాళాదుంపలను కట్ చేసే విధానం, చల్లటి నీటిలో నానబెట్టడం, కార్న్‌ఫ్లోర్ ఉపయోగించడం, రెండుసార్లు వేయించడం వంటి చిన్న చిట్కాలు పాటిస్తే మంచి ఫలితం ఉంటుంది. మరి ఈ రెసిపీ ఎలా తయారు చేయాలో తెలుసుకుందాం.
ఫ్రెంచ్ ఫ్రైస్ తయారీకి కావాల్సిన పదార్థాలు: ఈ రెసిపీ కోసం నాలుగు పెద్ద బంగాళాదుంపలు, తగినంత చల్లటి నీరు, రెండు టేబుల్ స్పూన్ల కార్న్‌ఫ్లోర్, రుచికి సరిపడా ఉప్పు, వేయించడానికి నూనె తీసుకోవాలి. రుచి కోసం చాట్ మసాలా లేదా ఫ్రెంచ్ ఫ్రైస్ మసాలా కూడా సిద్ధం చేసుకోవాలి. కావాలనుకుంటే పెరి పెరి మసాలా, పిజ్జా సీజనింగ్, మిరియాల పొడి కూడా ఉపయోగించవచ్చు.
బంగాళాదుంపలను సిద్ధం చేసుకోవడం: ముందుగా బంగాళాదుంపలను శుభ్రంగా కడిగి వాటి తొక్కలను తీసేయాలి. తర్వాత పొడవుగా, సన్నగా ఫ్రెంచ్ ఫ్రైస్ ఆకారంలో కట్ చేసుకోవాలి. అన్ని ముక్కలు ఒకే పరిమాణంలో ఉండేలా చూసుకోవాలి. అప్పుడే అవి సమానంగా వేగుతాయి. ఇప్పుడు కట్ చేసిన బంగాళాదుంప ముక్కలను ఒక గిన్నెలో వేసి చల్లటి నీటిని పోయాలి. వీటిని 20 నుంచి 30 నిమిషాల పాటు నానబెట్టాలి. ఇలా చేయడం వల్ల బంగాళాదుంపలపై ఉండే అదనపు పిండి పదార్థం తొలగిపోయి వేయించినప్పుడు ఫ్రైస్ మరింత కరకరలాడుతాయి.
కార్న్‌ఫ్లోర్ కలపడం: నానబెట్టిన బంగాళాదుంప ముక్కలను నీటిలో నుంచి బయటకు తీసి శుభ్రమైన కిచెన్ టవల్‌తో పూర్తిగా తుడవాలి. వాటిపై ఏమాత్రం తేమ ఉండకూడదు. ఆ తర్వాత ఒక గిన్నెలోకి తీసుకుని రెండు టేబుల్ స్పూన్ల కార్న్‌ఫ్లోర్ చల్లి మెల్లగా కలపాలి. కార్న్‌ఫ్లోర్ ప్రతి ముక్కకు సమానంగా పట్టేలా చూసుకోవాలి. ఇది ఫ్రైస్ బయట పొర కరకరలాడటానికి సహాయపడుతుంది.
రెండుసార్లు వేయించడం అసలు రహస్యం: ఇప్పుడు బాణలిలో నూనె పోసి మీడియం మంటపై వేడి చేయాలి. నూనె మరీ వేడిగా ఉండకూడదు. బంగాళాదుంప ముక్కలను ఒకేసారి కాకుండా కొద్దికొద్దిగా వేసి సుమారు 3 నుంచి 4 నిమిషాలు తేలికగా వేయించాలి. ఈ సమయంలో అవి పూర్తిగా గోధుమ రంగులోకి మారకూడదు. ఆ తర్వాత వాటిని బయటకు తీసి సుమారు 10 నిమిషాలు చల్లారనివ్వాలి. ఇప్పుడు నూనెను మరోసారి వేడి చేసి, ముందుగా వేయించిన బంగాళాదుంప ముక్కలను మళ్లీ అందులో వేయాలి. ఈసారి బంగారు రంగులోకి మారి కరకరలాడే వరకు వేయించాలి. రెండుసార్లు వేయించడం వల్ల బయట క్రిస్పీగా, లోపల మెత్తగా ఉంటాయి.
మసాలా కలిపి వేడివేడిగా సర్వ్ చేయండి: ఫ్రెంచ్ ఫ్రైస్ వేగిన తర్వాత వాటిని టిష్యూ పేపర్‌పైకి తీసి అదనపు నూనె పోయేలా చూడాలి. ఆ తర్వాత రుచికి సరిపడా ఉప్పు, చాట్ మసాలా చల్లాలి. మసాలా ఫ్రైస్‌కు బాగా పట్టేలా మెల్లగా కలపాలి. అంతే.. ఎంతో రుచికరమైన రెస్టారెంట్ స్టైల్ ఫ్రెంచ్ ఫ్రైస్ సిద్ధం. వీటిని టొమాటో కెచప్, మయోన్నైస్ లేదా చీజ్ డిప్‌తో కలిపి తింటే మరింత రుచిగా ఉంటాయి. పిల్లలకు అందించేటప్పుడు తక్కువ మసాలాతో తయారు చేసుకోవచ్చు.
ఫ్రెంచ్ ఫ్రైస్ కరకరలాడాలంటే ఈ చిట్కాలు పాటించండి: బంగాళాదుంప ముక్కలను ఒకే పరిమాణంలో కట్ చేయాలి. నానబెట్టిన తర్వాత పూర్తిగా ఆరబెట్టాలి. నూనెలో ఒకేసారి ఎక్కువ ముక్కలు వేయకూడదు. ఇలా చేస్తే నూనె ఉష్ణోగ్రత తగ్గి ఫ్రైస్ మెత్తబడవచ్చు. వేయించిన వెంటనే మసాలా కలిపి వేడివేడిగా సర్వ్ చేయాలి. ఈ చిన్న చిట్కాలు పాటిస్తే బయట కొనుక్కునే అవసరం లేకుండానే ఇంట్లోనే కరకరలాడే ఫ్రెంచ్ ఫ్రైస్ తయారు చేసుకోవచ్చు.
