Cancer Symptoms: పిల్లల్లో ఈ లక్షణాలు క్యాన్సర్ సంకేతాలు కావొచ్చు.. అస్సలు నిర్లక్ష్యం చేయొద్దంటున్న వైద్యులు..! | వరంగల్ వార్తలు (Warangal News)

పిల్లల్లో క్యాన్సర్ రావడానికి ప్రధాన కారణాల్లో జన్యుపరమైన లోపాలు ముఖ్యమైనవని నిపుణులు చెబుతున్నారు. కుటుంబంలో జన్యుపరమైన వ్యాధుల చరిత్ర ఉన్నట్లయితే ప్రమాదం కొంత పెరిగే అవకాశం ఉంటుంది. అలాగే డీఎన్‌ఏలో జరిగే సహజ మార్పులు, కణాల విభజన సమయంలో ఏర్పడే యాదృచ్ఛిక లోపాలు కూడా కొన్ని రకాల క్యాన్సర్లకు కారణమవుతాయని వైద్యులు వివరిస్తున్నారు. పెద్దల్లో కనిపించే ధూమపానం, మద్యం, జీవనశైలి వంటి కారణాల కంటే పిల్లల్లో జన్యుపరమైన అంశాలే ఎక్కువ ప్రభావం చూపుతాయని పేర్కొంటున్నారు.

ఈ వ్యాధి ప్రారంభ దశలో కొన్ని హెచ్చరిక లక్షణాలు కనిపించవచ్చు. ఎలాంటి ఇన్ఫెక్షన్ లేకపోయినా చాలా రోజుల పాటు జ్వరం రావడం, మెడ, చంకలు లేదా పొత్తికడుపు ప్రాంతంలో నొప్పి లేని గడ్డలు లేదా వాపులు కనిపించడం, ఎప్పుడూ చురుకుగా ఉండే పిల్లలు ఒక్కసారిగా తీవ్రమైన అలసటకు గురికావడం వంటి లక్షణాలను నిర్లక్ష్యం చేయకూడదని వైద్యులు సూచిస్తున్నారు.

అలాగే చర్మం, పెదవులు, కళ్లలో పాలిపోయినట్లు కనిపించడం, సరైన కారణం లేకుండానే బరువు తగ్గిపోవడం, పిల్లల ఆరోగ్యం రోజురోజుకూ క్షీణించడం వంటి లక్షణాలు కూడా అప్రమత్తం చేసే సంకేతాలుగా భావించాలి. సాధారణ మందులు వాడినా సమస్య తగ్గకపోతే ఆలస్యం చేయకుండా చిన్నారులను నిపుణులైన వైద్యులను సంప్రదించి అవసరమైన పరీక్షలు చేయించుకోవడం ఎంతో ముఖ్యమని వైద్యులు సూచిస్తున్నారు.

పెద్దలతో పోలిస్తే పిల్లల్లో వచ్చే అనేక క్యాన్సర్లు చికిత్సకు త్వరగా స్పందించే అవకాశం ఉంటుందని నిపుణులు చెబుతున్నారు. వ్యాధిని ప్రారంభ దశలోనే గుర్తిస్తే పూర్తిగా కోలుకునే అవకాశాలు గణనీయంగా పెరుగుతాయి. క్యాన్సర్ రకాన్ని బట్టి కీమోథెరపీ, శస్త్రచికిత్స, రేడియేషన్ థెరపీ, స్టెమ్ సెల్ మార్పిడి వంటి చికిత్సలను వైద్యులు అందిస్తారు. అయితే ఈ లక్షణాలు కనిపించాయని మాత్రమే క్యాన్సర్ ఉందని భావించకూడదని, సరైన నిర్ధారణ కోసం వైద్య పరీక్షలు తప్పనిసరిగా చేయించుకోవాలని నిపుణులు స్పష్టం చేస్తున్నారు.