గతంలో ఎక్కువ సంఖ్యలో దాడులు చేయడంపైనే దృష్టి ఉండేది. ఇప్పుడు మాత్రం నమ్మకమైన సాఫ్ట్వేర్లా కనిపించేలా నకిలీ ప్యాకేజీలను తయారు చేసి, నేరుగా డెవలపర్లను లక్ష్యంగా చేసుకుని, కోడ్ ప్రొడక్షన్లోకి వెళ్లే ముందే సాఫ్ట్వేర్ ఎంపికను ప్రభావితం చేసేలా దాడులు చేస్తున్నారు. ప్రపంచంలో వేగంగా ఎదుగుతున్న సాఫ్ట్వేర్ డెవలప్మెంట్ కేంద్రాల్లో భారత్ ఒకటి. అలాగే ఫిన్టెక్, డిజిటల్ ఇంజినీరింగ్, గ్లోబల్ కెపబిలిటీ సెంటర్స్ (జీసీసీలు)కి కూడా భారత్ కీలక కేంద్రంగా ఉంది. భారతీయ సంస్థలు, జీసీసీలు ఓపెన్ సోర్స్ సాఫ్ట్వేర్, థర్డ్ పార్టీ కంపోనెంట్స్, ఏఐ ఆధారిత డెవలప్మెంట్ను ఎక్కువగా ఉపయోగిస్తున్న నేపథ్యంలో, సాఫ్ట్వేర్ లైఫ్సైకిల్లోకి ఏ కంపోనెంట్లు ప్రవేశిస్తున్నాయో వాటిపై సరైన నియంత్రణ ఉండటం ఇప్పుడు వ్యాపారపరంగా అత్యంత ముఖ్యమైన అంశంగా మారుతోంది.
సోనాటైప్ సీనియర్ డైరెక్టర్ ఆఫ్ టెక్నాలజీ, ఇండియా కంట్రీ హెడ్ అభిషేక్ చౌహాన్ మాట్లాడుతూ, “ఏఐ వల్ల డెవలప్మెంట్ టీమ్లు సాఫ్ట్వేర్ను మరింత వేగంగా రూపొందిస్తున్నాయి. కానీ ఏ సాఫ్ట్వేర్ను నమ్మాలి అనే నిర్ణయాలు కూడా వేగంగా తీసుకోవాల్సి వస్తోంది. ఈ మార్పును దాడి చేసే వారు బాగా అర్థం చేసుకున్నారు. ఇప్పుడు వారు కేవలం పెద్ద ఎత్తున దాడులు చేయడం కాదు. నమ్మకమైన సాఫ్ట్వేర్లా కనిపించేలా కచ్చితమైన దాడులు చేస్తున్నారు. నేరుగా డెవలపర్లనే లక్ష్యంగా చేసుకుంటున్నారు. సంప్రదాయ భద్రతా వ్యవస్థలు స్పందించేలోపే దాడులను అమలు చేస్తున్నారు. భారతీయ సంస్థలు, జీసీసీలకు ఏఐ వినియోగాన్ని తగ్గించడం లక్ష్యం కాదు. సాఫ్ట్వేర్ డెవలప్మెంట్లోకి ప్రవేశించే దశలోనే నమ్మకమైన గవర్నెన్స్ ఏర్పాటు చేయడం అత్యంత ముఖ్యమైనది” అని చెప్పారు.
అభిషేక్ చౌహాన్ మరో ప్రకటన కూడా చేశారు. “సోనాటైప్ హైదరాబాద్ కార్యాలయంలో నియామకాలు చేపడుతోంది. హైదరాబాద్ ఆఫీసులో 100 మందికి పైగా ఏఐ ఫార్వర్డ్ ఇంజనీర్లను నియమించనున్నాం. ఈ ఏడాది డిసెంబర్ చివరి నాటికి హైటెక్ సిటీలోని మా కార్యాలయంలో మొత్తం 240 మంది పనిచేస్తారు. మేము ప్రపంచవ్యాప్తంగా విక్రయించే ఉత్పత్తులను అభివృద్ధి చేస్తున్నాం. ప్రస్తుతం మా వద్ద మొత్తం ఆరు ప్రధాన ప్రొడక్ట్స్ ఉన్నాయి. మా క్లైంట్లు సాఫ్ట్వేర్ డెవలపర్లు, ఆటోనమస్ ఏజెంట్లు” అని తెలిపారు.
సోనాటైప్ పరిశోధనలో వెలుగులోకి వచ్చిన ముఖ్యాంశాలు చూస్తే 2023లో కేవలం 28గా ఉన్న టార్గెటెడ్ మాలిషియస్ ప్యాకేజ్ అడ్వైజరీలు, 2025 నాటికి 1,576కు చేరాయి. అంటే రెండేళ్లలో 75 రెట్లు పెరిగాయి. ప్రస్తుతం 47 శాతం మాలిషియస్ ప్యాకేజీలు నమ్మకమైన సాఫ్ట్వేర్లా కనిపించేలా పరిచయమైన పేర్లు, ఇంటిగ్రేషన్లు, యుటిలిటీలను ఉపయోగిస్తున్నాయి. 2025లో విశ్లేషించిన మాలిషియస్ ప్యాకేజీల్లో 53 శాతం, సంప్రదాయ భద్రతా నియంత్రణలు పనిచేసేలోపే ఇన్స్టాలేషన్ దశలోనే డెవలపర్లను లక్ష్యంగా చేసుకున్నాయి. ప్రస్తుతం ప్రతి నాలుగు మాలిషియస్ ప్యాకేజ్ అడ్వైజరీల్లో ఒకటి కంటే ఎక్కువ అధునాతన పద్ధతులను ఉపయోగిస్తోంది. వీటిలో ఆబ్ఫస్కేషన్, మల్టీ-స్టేజ్ డ్రాపర్స్, బ్యాక్డోర్స్ వంటి టెక్నిక్స్ ఉన్నాయి. ఈ అధ్యయనం ప్రకారం, సంస్థలు సమస్య వచ్చిన తర్వాత స్పందించే విధానాన్ని వదిలి, సాఫ్ట్వేర్ కంపోనెంట్ బిల్డ్ ప్రక్రియలోకి రాకముందే భద్రతను నిర్ధారించే విధానాన్ని అవలంబించాల్సిన అవసరం ఉంది.
ఈ కార్యక్రమంలో ఫారెస్టర్ వైస్ ప్రెసిడెంట్, ప్రిన్సిపల్ అనలిస్ట్ అశుతోష్ శర్మ కూడా మాట్లాడారు. ఆయన మాట్లాడుతూ, “ఏఐ ప్రభావంతో సాఫ్ట్వేర్ డెవలప్మెంట్ కొత్త దశలోకి అడుగుపెడుతోంది. ఇప్పుడు కోడ్ ఎలా రాయాలి అన్నదే కాదు, సాఫ్ట్వేర్ కంపోనెంట్లను ఎలా గుర్తించాలి, ఎలా ఎంపిక చేయాలి, ఎలా ఇంటిగ్రేట్ చేయాలి అన్న విధానం కూడా మారుతోంది. సంస్థలు ఏఐ వినియోగాన్ని వేగంగా పెంచుతున్న నేపథ్యంలో, డెవలప్మెంట్ విధానాలతో పాటు గవర్నెన్స్ కూడా అభివృద్ధి చెందాలి. సాఫ్ట్వేర్పై నమ్మకం ఎలా ఏర్పడుతోంది? సాఫ్ట్వేర్ సప్లై చైన్ రిస్క్ ఎలా మారుతోంది? అన్న విషయాలను అర్థం చేసుకోవడం, కొత్త ఆవిష్కరణలతో పాటు బలమైన భద్రతను కొనసాగించాలని కోరుకునే సంస్థలకు మరింత అవసరం అవుతుంది” అని చెప్పారు.
భారత్లోని ఫైనాన్షియల్ సంస్థలు, డిజిటల్-నేటివ్ కంపెనీలు, జీసీసీలకు ఇది కీలక అవకాశం అని ఈ అధ్యయనం చెబుతోంది. ఏఐ ఆధారిత సాఫ్ట్వేర్ డెవలప్మెంట్లో తదుపరి దశకు నాయకత్వం వహించాలంటే, సాఫ్ట్వేర్ను ఎంత వేగంగా రూపొందిస్తున్నారో అదే స్థాయి క్రమశిక్షణతో, నియంత్రణతో దాన్ని నిర్వహించాలి. ఓపెన్ సోర్స్, ఏఐ ఆధారిత వర్క్ఫ్లోలు ఆవిష్కరణల్లో కీలకంగా మారుతున్న ఈ సమయంలో, సాఫ్ట్వేర్పై నమ్మకం కేవలం నిబంధనలు పాటించడం వరకే పరిమితం కాకుండా, పోటీదారుల కంటే ముందుండే బలంగా మారాలి. దాంతో వేగవంతమైన డెలివరీ, మెరుగైన భద్రత, మరింత విశ్వసనీయమైన ఏఐ వినియోగం సాధ్యమవుతుందని అధ్యయనం స్పష్టం చేసింది.
