న్యూస్18 ఇంగ్లీష్ కథనం ప్రకారం.. జోర్డాన్ దాడికి కారణమైన ఇరాన్ ఇస్లామిక్ రివల్యూషనరీ గార్డ్ కార్ప్స్ (IRGC) దళాలను, అలాగే ఇరాన్ తీరప్రాంత నిఘా వ్యవస్థలను, వైమానిక రక్షణ కేంద్రాలను, క్షిపణి మరియు డ్రోన్ నిల్వ కేంద్రాలను లక్ష్యంగా చేసుకుని ఈ దాడులు చేసినట్లు యుఎస్ సెంట్రల్ కమాండ్ (CENTCOM) తెలిపింది. హార్ముజ్ జలసంధి ద్వారా అంతర్జాతీయ నౌకాయానం, ఆయిల్ ట్యాంకర్ల రాకపోకలను అడ్డుకునే ఇరాన్ సామర్థ్యాన్ని దెబ్బతీయడమే లక్ష్యంగా అమెరికా ఈ ఆపరేషన్ చేపట్టింది.
మరోవైపు, తమ భూభాగంపై అమెరికా జరిపిన దాడులకు ప్రతీకారంగా ఇరాన్ సైన్యం కూడా విరుచుకుపడింది. కువైట్లోని రెండు ప్రధాన అమెరికా సైనిక స్థావరాలపై భారీ ఎత్తున ‘కామికేజ్ డ్రోన్’ దాడులు చేసినట్లు ఇరాన్ ప్రకటించింది. క్యాంప్ ఉదైరీలోని మందుగుండు సామగ్రి డిపోను, అలీ అల్ సలేం ఎయిర్ బేస్లోని నిఘా, పేట్రియాట్ రాడార్ వ్యవస్థలను ఇరాన్ టార్గెట్ చేసింది.
అమెరికాకు చెందిన అత్యంత కీలకమైన సైనిక స్థావరాలు, మౌలిక సదుపాయాలు మరియు వేలాది మంది సైనికులు జోర్డాన్, కువైట్ దేశాలలోనే ఉన్నారు. ఈ తాజా అమెరికా-ఇరాన్ యుద్ధంలో ఇరాన్కు చెందిన ఐఆర్జీసీ (IRGC) కావాలనే ఈ పొరుగు దేశాలపై దాడులు చేస్తోంది. అమెరికా దళాలపై నేరుగా ప్రతీకారం తీర్చుకోవడానికి, అమెరికా రవాణా (లాజిస్టిక్స్) వ్యవస్థను దెబ్బతీయడానికి మరియు వాషింగ్టన్కు సహకరిస్తున్న ప్రాంతీయ దేశాలను శిక్షించడానికి ఇరాన్ ఈ వ్యూహాన్ని అమలు చేస్తోంది.
జోర్డాన్: అమెరికాకు చెందిన అల్-అజ్రాక్ ఎయిర్ బేస్ వంటి కీలక ఆస్తులను దెబ్బతీసేందుకు ఇరాన్ తీవ్రంగా ప్రయత్నిస్తోంది. ఇటీవల జోర్డాన్లో జరిగిన డ్రోన్ దాడిలోనే ఇద్దరు అమెరికా సైనికులు మరణించగా, పలువురు గాయపడ్డారు. అమెరికా సైనిక కార్యకలాపాలను అడ్డుకునేందుకు జోర్డాన్లోని కీలక ఇంధన నిల్వ కేంద్రాలు, సైనిక కమ్యూనికేషన్ హబ్లపై ఇరాన్ దళాలు దాడులు చేశాయి.
కువైట్: అమెరికాకు చెందిన అత్యంత కీలక వ్యూహాత్మక కేంద్రాలు కువైట్లోనే ఉన్నాయి. ఇక్కడి క్యాంప్ ఉదైరీలోని మందుగుండు డిపో, మినా అబ్దుల్లాలోని లాజిస్టిక్స్ సెంటర్ మరియు అలీ అల్ సలేం ఎయిర్ బేస్లపై ఐఆర్జీసీ భారీగా కామికేజ్ డ్రోన్లు, క్రూయిజ్ మిస్సైళ్లతో దాడులు చేసింది. కేవలం సైనిక స్థావరాలనే కాకుండా, కువైట్కు చెందిన విద్యుత్, నీటి శుద్ధి ప్లాంట్తో పాటు కువైట్ పెట్రోలియం కార్పొరేషన్కు చెందిన చమురు కేంద్రాన్ని కూడా ఇరాన్ దెబ్బతీసింది. దీనివల్ల అక్కడి పౌర మౌలిక సదుపాయాలు పూర్తిగా స్తంభించిపోయాయి.
అమెరికా సెంట్రల్ కమాండ్ (CENTCOM) వరుసగా 8వ రాత్రి కూడా ఇరాన్ లోపల ఉన్న ఫోర్డో, నతాంజ్ వంటి అణు విద్యుత్ కేంద్రాలు, కమాండ్ సెంటర్లు, తీరప్రాంత నిఘా కేంద్రాలపై భారీ బాంబింగ్ దాడులను పూర్తి చేసింది. అమెరికా దాడులకు ప్రతిస్పందనగా, వాటికి ఆశ్రయం ఇస్తున్న కువైట్, జోర్డాన్ వంటి దేశాలను లక్ష్యంగా చేసుకోవడమే ఇరాన్ తన ప్రధాన వ్యూహంగా మార్చుకుంది.
అమెరికా దిగ్బంధనాలు, వైమానిక దాడుల నేపథ్యంలో ఇరాన్ ఇప్పటికే వ్యూహాత్మక హార్ముజ్ జలసంధిని బలవంతంగా మూసివేసింది. కువైట్, బహ్రెయిన్, జోర్డాన్ వంటి పొరుగు దేశాలకు యుద్ధాన్ని విస్తరించడం ద్వారా.. ప్రాంతీయ స్థిరత్వాన్ని పణంగా పెట్టి, అమెరికా తన వైమానిక దాడులను నిలిపివేసేలా ఒత్తిడి తెచ్చేందుకు టెహ్రాన్ ప్రయత్నిస్తోంది.
