Last Updated:
Angel One | స్టాక్ బ్రోకింగ్ రంగంలో ప్రముఖ సంస్థగా ఉన్న ఏంజెల్ వన్ తన సేవలను మరింత విస్తరించేందుకు సిద్ధమవుతోంది. యాక్టివ్ మ్యూచువల్ ఫండ్స్, షేర్లపై రుణాలు, వెల్త్ మేనేజ్‌మెంట్ సేవలను అందుబాటులోకి తీసుకురావాలని ప్లాన్ చేస్తోంది. ఈ కొత్త మార్పుల గురించి పూర్తి వివరాలు తెలుసుకుందాం.
భారత్‌లో ప్రముఖ స్టాక్ బ్రోకరేజ్ సంస్థ ఏంజెల్ వన్ తన వ్యాపారాన్ని మరింత విస్తరించేందుకు సిద్ధమవుతోంది. ఇప్పటివరకు ప్రధానంగా స్టాక్ బ్రోకింగ్ సేవలపై దృష్టి పెట్టిన ఈ సంస్థ.. ఇకపై యాక్టివ్ మ్యూచువల్ ఫండ్స్ నిర్వహణలోకి కూడా అడుగుపెట్టాలని చూస్తోంది. అంతేకాకుండా, కస్టమర్లు తమ దగ్గరున్న షేర్లను తనఖాగా పెట్టి రుణాలు తీసుకునే సదుపాయాన్ని కూడా విస్తరించాలని భావిస్తోంది. ఈ విషయాలను సంస్థ సీనియర్ అధికారి ఒకరు వెల్లడించారు. రాయిటర్స్ కథనం ప్రకారం.. యాక్టివ్ క్లయింట్ల సంఖ్య పరంగా భారత్‌లో రెండో అతిపెద్ద స్టాక్ బ్రోకర్‌గా ఉన్న ఏంజెల్ వన్, బ్రోకింగ్ వ్యాపారంపై మాత్రమే ఆధారపడకుండా ఇతర ఆర్థిక సేవల్లోనూ తన పరిధిని పెంచుకోవాలని చూస్తోంది. ప్రస్తుతం సిస్టమాటిక్ ఇన్వెస్ట్‌మెంట్ ప్లాన్స్ (సిప్స్) ద్వారా ప్రతి నెలా సగటున 3 బిలియన్ డాలర్ల పెట్టుబడులు మ్యూచువల్ ఫండ్స్‌లోకి వస్తున్నాయి. దీంతో దేశీయ, అంతర్జాతీయ అసెట్ మేనేజ్‌మెంట్ సంస్థల మధ్య పోటీ పెరుగుతోంది.
మార్కెట్‌లో గత రెండేళ్లలో చాలా కాలం పాటు ఆశించిన స్థాయిలో రాబడులు లేకపోయినా, భారత ఈక్విటీ మ్యూచువల్ ఫండ్స్‌లోకి పెట్టుబడుల ప్రవాహం మాత్రం కొనసాగుతోంది. అక్టోబర్ వరకు వరుసగా 68 నెలల పాటు ఈ ఫండ్స్‌లోకి నికర పెట్టుబడులు వచ్చాయి. ఏంజెల్ వన్ గ్రూప్ చీఫ్ స్ట్రాటజీ ఆఫీసర్ అమిత్ మజుందార్ రాయిటర్స్‌కు ఇచ్చిన ఇంటర్వ్యూలో ఈ విషయాలను వెల్లడించారు. “మా ప్రధాన వ్యాపారంలో మ్యూచువల్ ఫండ్స్‌కు మరింత పెద్ద స్థానం కల్పించేందుకు చాలాకాలంగా పనిచేస్తున్నాం. ఇప్పటివరకు పాసివ్ ఫండ్స్‌పైనే ఎక్కువగా దృష్టి పెట్టాం. ఇప్పుడు యాక్టివ్ ఫండ్ మేనేజ్‌మెంట్‌లో ఉన్న అవకాశాలను పరిశీలిస్తున్నాం” అని ఆయన తెలిపారు. ప్రస్తుతం భారత్‌లో అసెట్ మేనేజ్‌మెంట్ పరిశ్రమ విలువ 883 బిలియన్ డాలర్లకు చేరింది. ఈ రంగంలో పోటీ కూడా గణనీయంగా పెరిగింది. 2020 మార్చిలో 42గా ఉన్న ఫండ్ హౌస్‌ల సంఖ్య ఇప్పుడు దాదాపు 60కి చేరింది. ప్రస్తుతం ఏంజెల్ వన్ మూడు పాసివ్ ఇండెక్స్ ఫండ్స్‌ను నిర్వహిస్తోంది. వీటిలో ఏంజెల్ వన్ నిఫ్టీ 50 ఇండెక్స్ ఫండ్ కూడా ఉంది.
అయితే, గత కొన్నేళ్లుగా ప్రధాన స్టాక్ మార్కెట్ ఇండెక్స్‌ల నుంచి పెద్దగా రాబడులు రాకపోవడంతో, పెట్టుబడిదారులు సొంతంగా మంచి షేర్లను ఎంపిక చేసుకునే యాక్టివ్ ఫండ్ స్ట్రాటజీలపై ఆసక్తి చూపిస్తున్నారని మజుందార్ చెప్పారు. అందుకే యాక్టివ్ ఫండ్స్‌ను కూడా ప్రారంభిస్తే, పెట్టుబడిదారుల అభిరుచుల్లో వచ్చే మార్పులకు అనుగుణంగా తమ సంస్థ సేవలను మార్చుకునే అవకాశం ఉంటుందని ఆయన వివరించారు. సెప్టెంబర్ 30 నాటికి ఏంజెల్ వన్ అసెట్ మేనేజ్‌మెంట్ విభాగం నిర్వహణలో ఉన్న ఆస్తుల విలువ (ఏయూఎం) రూ.570 కోట్లుగా ఉంది. మొత్తం 11 స్కీమ్స్ ద్వారా ఈ పెట్టుబడులను నిర్వహిస్తోంది. అసోసియేషన్ ఆఫ్ మ్యూచువల్ ఫండ్స్ ఇన్ ఇండియా (ఏఎంఎఫ్ఐ) గణాంకాల ప్రకారం ఈ వివరాలు వెల్లడయ్యాయి.
షేర్లను తనఖా పెట్టి రుణాలు.. మార్జిన్ ట్రేడింగ్‌పై దృష్టి
మ్యూచువల్ ఫండ్స్ వ్యాపారంతో పాటు, షేర్లను తనఖా పెట్టి రుణాలు ఇచ్చే సేవను కూడా ఏంజెల్ వన్ పరీక్షిస్తోంది. ఈ సదుపాయం ద్వారా కస్టమర్లు తమ దగ్గర ఇప్పటికే ఉన్న షేర్లు, మ్యూచువల్ ఫండ్ యూనిట్లను తనఖాగా పెట్టి డబ్బు అప్పుగా తీసుకోవచ్చు. అంటే, తమ పెట్టుబడులను వెంటనే అమ్మకుండా వాటి ఆధారంగా రుణం పొందే అవకాశం ఉంటుంది. ప్రస్తుతం ఈ సేవ బీటా దశలో ఉందని మజుందార్ తెలిపారు. అంటే, పరిమిత స్థాయిలో పరీక్షిస్తున్నారు. ఈ వ్యాపారానికి సంస్థ ఇప్పటికే అందిస్తున్న స్టాక్ బ్రోకింగ్ సేవలు, మార్జిన్ ట్రేడింగ్ ఫెసిలిటీ (ఎంటీఎఫ్)తో మంచి అనుసంధానం ఉందని చెప్పారు. ఎంటీఎఫ్ ద్వారా ఇన్వెస్టర్లు తమ దగ్గరున్న డబ్బు కంటే ఎక్కువ విలువైన షేర్లను కొనుగోలు చేయవచ్చు. ఇందుకోసం బ్రోకరేజ్ సంస్థ కొంత మొత్తాన్ని నిధుల రూపంలో అందిస్తుంది.
దేశవ్యాప్తంగా గత మూడేళ్లలో ఎంటీఎఫ్ ద్వారా అందించే రుణాల మొత్తం మూడు రెట్లకు పైగా పెరిగింది. ఈక్విటీ డెరివేటివ్స్ ట్రేడింగ్‌పై నియంత్రణలు పెరగడంతో, రిటైల్ ట్రేడర్లు ఎక్కువగా రుణ సాయంతో క్యాష్ మార్కెట్‌లో షేర్ల కొనుగోళ్ల వైపు మళ్లడమే ఇందుకు ఒక కారణం. ఏంజెల్ వన్ విషయంలోనూ ఇదే ధోరణి కనిపిస్తోంది. 2024 ఆర్థిక సంవత్సరం నుంచి ఇప్పటివరకు కస్టమర్లకు సంస్థ అందిస్తున్న సగటు ఫండింగ్ దాదాపు ఐదు రెట్లు పెరిగింది.
భవిష్యత్తులో తమ సేవల పరిధిని మరింత పెంచాలని ఏంజెల్ వన్ భావిస్తోంది. ఇందులో భాగంగా బాండ్లను కూడా తన ప్లాట్‌ఫామ్‌పై అందుబాటులోకి తీసుకురావాలని యోచిస్తోంది. వెల్త్ మేనేజ్‌మెంట్ సేవలు, అమెరికా స్టాక్ మార్కెట్‌లో పెట్టుబడులు పెట్టే అవకాశం, ఇతర ఆర్థిక ఉత్పత్తులపైనా దృష్టి కొనసాగించనుంది. కస్టమర్లు పెట్టుబడులు పెట్టడం, వాటిని నిర్వహించడం, ఇతర ఆర్థిక అవసరాల కోసం వేర్వేరు యాప్‌లు లేదా ప్లాట్‌ఫామ్‌లను ఉపయోగించకుండా.. ఒకే ప్లాట్‌ఫామ్‌లో అన్ని సేవలు పొందేలా చేయడమే సంస్థ లక్ష్యమని అమిత్ మజుందార్ తెలిపారు. మొత్తంగా చూస్తే, ఏంజెల్ వన్ తన వ్యాపారాన్ని స్టాక్ బ్రోకింగ్‌కే పరిమితం చేయకుండా మ్యూచువల్ ఫండ్స్, రుణాలు, వెల్త్ మేనేజ్‌మెంట్, బాండ్లు, విదేశీ స్టాక్ పెట్టుబడుల వరకు విస్తరించాలని చూస్తోంది. దీనివల్ల కస్టమర్లకు ఒకే ప్లాట్‌ఫామ్‌లో మరిన్ని ఆర్థిక సేవలు అందుబాటులోకి వచ్చే అవకాశం ఉంది.
