Last Updated:
అసలు ఆ శవంతో ఈ కోతికి ఉన్న బంధం ఏంటి? వైద్యులను సైతం కంటతడి పెట్టించిన దృశ్యం!
మూగజీవాలకు మనుషులతో ఉండే అక్షరాలా వర్ణించలేని అనుబంధం ఎంతో విడదీయరానిది. వాటికి మనలాగా మాటలు రాకపోయినా వాటి ప్రవర్తన, చేతలు ఎన్నో హృదయ విదారక కథలు చెబుతాయి. ఒడిశా రాష్ట్రంలో తాజాగా వెలుగుచూసిన ఒక అద్భుత ఘటనే దీనికి సజీవ సాక్ష్యంగా నిలుస్తోంది. దారిలో వెళ్తున్న వాహనాలను ఆపి మరీ ఒక అంబులెన్స్ ఎక్కిన అడవి కోతి నేరుగా ఆసుపత్రికి చేరుకుంది. అక్కడ ఒక మృతదేహాన్ని ఆలింగనం చేసుకుని కన్నీరు పెట్టుకున్న తీరు ప్రతి ఒక్కరి హృదయాన్ని తీవ్రంగా కలచివేసింది. అసలు ఆ కోతి ఎక్కడి నుంచి అక్కడికి వచ్చింది? చనిపోయిన అపరిచిత వ్యక్తితో దానికి ఉన్న అనుబంధం ఏంటి? అన్నది ఇప్పటికీ అందరికీ అంతుచిక్కని రహస్యంగానే మిగిలిపోయింది. మనిషికి జంతువుకు మధ్య ఉన్న ఈ అవినాభావ సంబంధం చూసి అందరూ కంటతడి పెడుతున్నారు.
కియోంజర్ జిల్లా ఆనంద్‌పూర్ ప్రాంతంలోని ఘాసిపుర ఝాదేశ్వర్ ఆలయం వద్ద ఉన్న ఒక హనుమాన్ లంగూర్ (కొండముచ్చు) ఉదయం నుంచి వింతగా ప్రవర్తించడం మొదలుపెట్టింది. రోడ్డుపై వెళ్తున్న ప్రయాణికుల భుజాల మీదకు ఎక్కేందుకు యత్నిస్తూ ఎవరి కోసమో తీవ్రంగా వెతుకుతున్నట్లు ఆరాటపడింది. దారిలో వెళ్తున్న నాలుగైదు వాహనాలను ఆపేందుకు అటూ ఇటూ పరుగులు తీసినా ఎవరూ దాన్ని పెద్దగా పట్టించుకోలేదు. చివరగా వెనుక నుంచి వేగంగా వస్తున్న ఒక ప్రభుత్వ అంబులెన్స్ డ్రైవర్ బిజయ్ కుమార్ సాహు దాన్ని గమనించి వాహనం ఆపాడు. వెంటనే ఆ కోతి ఒక సాధారణ మనిషిలాగా చాలా ప్రశాంతంగా అంబులెన్స్ ఎక్కి సీట్లో కూర్చుంది. డ్రైవర్ దారి పొడవునా దానితో ఎంతో ఆత్మీయంగా మాట్లాడుతూ మొబైల్ ఫోన్లో వీడియో తీశాడు. ఆ ప్రయాణంలో కోతి ఎంతో ఉత్కంఠగా తన గమ్యస్థానం కోసం ఎదురుచూస్తున్నట్లు కనిపించింది.
కొంత సమయం తర్వాత అంబులెన్స్ నేరుగా ఆనంద్‌పూర్ సబ్-డివిజనల్ ఆసుపత్రికి చేరుకోగానే కోతి హడావుడిగా కిందకు దిగింది. వెంటనే చుట్టుపక్కల ప్రతి మూలా వెతకడం ప్రారంభించింది. కొంతసేపు డాక్టర్ గది బయట విచారంగా కూర్చున్న ఆ మూగజీవి చూపు అకస్మాత్తుగా ఆరుబయట ఉన్న ఒక స్ట్రెచర్ పై పడింది. తెల్లటి గుడ్డతో పూర్తిగా కప్పి ఉన్న ఆ నిర్జీవ దేహం దగ్గరకు పరుగున వెళ్లింది. వెంటనే ఆ మృతదేహాన్ని గట్టిగా హత్తుకుని గుండెలు పగిలేలా రోదించినంత పని చేసింది. గుడ్డను పక్కకు తొలగించి ముఖాన్ని చూస్తూ తన ఆవేదనను వ్యక్తం చేసింది. ఆ దృశ్యం అక్కడున్న వైద్యులను, రోగులను తీవ్ర భావోద్వేగానికి గురిచేసింది. అడవిలో స్వేచ్ఛగా తిరిగే ఒక సాధారణ కోతి ఇలా ఆసుపత్రికి వచ్చి ఒక మృతదేహాన్ని అంటిపెట్టుకుని ఉండటం చూసి అందరూ ఆశ్చర్యపోయారు.
ఆ మృతదేహం వివరాలు ఆరా తీయగా హృదయ విదారక వాస్తవాలు వెలుగులోకి వచ్చాయి. మృతుడిని సోసో పోలీస్ స్టేషన్ పరిధిలోని ధెంకా గ్రామానికి చెందిన తులుకు రామ్ సోరెన్‌గా స్థానికులు గుర్తించారు. తీవ్ర అస్వస్థతకు గురైన అతన్ని కుటుంబ సభ్యులు మెరుగైన చికిత్స నిమిత్తం ఆనంద్‌పూర్ ఆసుపత్రికి హుటాహుటిన తీసుకువచ్చారు. కానీ అతన్ని నిశితంగా పరీక్షించిన వైద్యులు అప్పటికే మృతి చెందినట్లు అధికారికంగా నిర్ధారించారు. పోస్టుమార్టం ప్రక్రియ కోసం కుటుంబ సభ్యులు మృతదేహం వద్ద కన్నీరుమున్నీరుగా ఎదురుచూస్తున్న సమయంలో అనూహ్యంగా ఈ ఘటన చోటుచేసుకుంది. అయితే ఆ కోతి తమ పెంపుడు జంతువు కానే కాదని రామ్ సోరెన్ బంధువులు స్పష్టం చేశారు. ఆ మూగజీవికి చనిపోయిన వ్యక్తికి గతంలో ఎలాంటి బంధం ఉందో వాళ్లకు కూడా ఏమాత్రం అర్థం కాలేదు.
కేవలం ఒక అపరిచిత వ్యక్తి కోసం కోతి అంబులెన్స్ ఎక్కి ఇంత దూరం ప్రయాణించి రావడం స్థానికులను తీవ్ర విస్మయానికి గురిచేసింది. అతడు జీవించి ఉన్నప్పుడు ఆ కోతికి ఏదైనా సాయం చేసి ఉంటాడా లేదా అన్నం పెట్టి ఆదరించి ఉంటాడా అన్న కోణంలో ఆసుపత్రి ప్రాంగణంలో పెద్ద ఎత్తున చర్చలు జరుగుతున్నాయి. కారణం ఏదైనా మనుషుల్లో క్రమంగా కరువవుతున్న విశ్వాసం, నిస్వార్థ ప్రేమ మూగజీవాల్లో మెండుగా ఉన్నాయని ఈ సంఘటన ప్రపంచానికి మరోసారి నిరూపించింది. మృతదేహాన్ని పట్టుకుని వదలకుండా కోతి ప్రదర్శించిన అంతులేని ఆవేదనకు సంబంధించిన వీడియో సోషల్ మీడియాలో ప్రస్తుతం విపరీతంగా వైరల్ గా మారింది. దీన్ని చూసిన ప్రతి నెటిజన్ కంటతడి పెట్టుకుంటూ ఆ మూగజీవి అంతులేని ప్రేమకు ఆశ్చర్యపోతూ తమదైన శైలిలో స్పందిస్తున్నారు.
