Ramayana: బాక్సాఫీస్ వద్ద ‘రామాయణం’ ప్రభంజనం.. వారం రోజుల్లోనే రూ.900 కోట్ల వసూళ్లు, ఆస్కార్ రేసులోకి మూవీ | తెలుగు సినిమా వార్తలు

సాక్‌నిల్క్ (Sacnilk) నివేదిక ప్రకారం.. ఈ సినిమా తొలి రోజు భారత్‌లో రూ.64.85 కోట్ల నెట్ వసూళ్లతో ఘనంగా ప్రారంభమైంది. రెండో రోజు రూ.48 కోట్లు రాబట్టింది. దీపావళి పండుగ వారాంతం కావడంతో శనివారం రూ.69.80 కోట్లు, ఆదివారం రూ.56.15 కోట్లు వసూలు చేసింది. ఇక ఐదో రోజు రూ.107.50 కోట్లు, ఆరో రోజు రూ.94.10 కోట్ల నెట్ వసూళ్లను సాధించింది. ఏడో రోజు మరో రూ.70 కోట్లు ఖాతాలో వేసుకుంది. ముఖ్యంగా మంగళవారం కలెక్షన్లు పెరగడం విశేషంగా చెప్పుకోవచ్చు. సాధారణంగా వారాంతపు రోజుల్లో టికెట్ ధరలు తగ్గడం వల్ల థియేటర్లకు వచ్చే ప్రేక్షకుల సంఖ్య పెరుగుతుంది. ఈ ప్రభావం సినిమా వసూళ్లపై స్పష్టంగా కనిపించినట్లు తెలుస్తోంది.

ప్రపంచవ్యాప్తంగా రూ.934 కోట్లకు పైగా వసూళ్లు: భారత్‌లోనే కాకుండా అంతర్జాతీయ బాక్సాఫీస్ వద్ద కూడా ‘రామాయణ: పార్ట్ 1’ సత్తా చాటుతోంది. ఇప్పటివరకు ప్రపంచవ్యాప్తంగా రూ.934.55 కోట్ల గ్రాస్ వసూళ్లు సాధించినట్లు నివేదికలు వెల్లడిస్తున్నాయి. దీంతో ఈ ఏడాది అత్యధిక వసూళ్లు సాధించిన చిత్రాల్లో ఒకటిగా నిలిచింది.

ఆస్కార్ బరిలోకి రామాయణం: మరోవైపు ఈ సినిమా తాజాగా ఆస్కార్ రేసులోకి కూడా అడుగుపెట్టింది. 99వ అకాడమీ అవార్డుల కోసం చిత్ర నిర్మాతలు ‘రామాయణ: పార్ట్ 1’ను పరిశీలనకు సమర్పించినట్లు ఎన్డీటీవీ నివేదిక వెల్లడించింది. ఇప్పటికే మరాఠీ చిత్రం ‘గోంధల్’ ఆస్కార్‌లో ఇంటర్నేషనల్ ఫీచర్ ఫిల్మ్ విభాగంలో భారత అధికారిక ఎంట్రీగా ఎంపికైంది. అయితే భారత అధికారిక ఎంట్రీగా ఒక సినిమా ఎంపికైనంత మాత్రాన ఇతర భారతీయ చిత్రాలు ఆస్కార్ పరిశీలనకు వెళ్లే అవకాశం ఉండదని కాదు. అకాడమీ నిబంధనలు, అర్హత ప్రమాణాలకు అనుగుణంగా ఇతర సినిమాలు కూడా వివిధ విభాగాల్లో పోటీకి తమ పేర్లను సమర్పించవచ్చు.

నితేశ్ తివారీ దర్శకత్వంలో నమిత్ మల్హోత్రా నిర్మించిన ఈ చిత్రంలో రాముడిగా రణ్‌బీర్ కపూర్, సీతగా సాయి పల్లవి, రావణుడిగా యశ్, లక్ష్మణుడిగా రవి దూబే నటించారు. రెండు భాగాలుగా తెరకెక్కుతున్న ఈ చిత్రంలో మొదటి భాగం ప్రేక్షకుల ముందుకు వచ్చింది. రెండో భాగాన్ని 2027లో విడుదల చేసేందుకు మేకర్స్ ప్లాన్ చేస్తున్నారు.