Last Updated:
పాకిస్థాన్‌లోని డేరా ఇస్మాయిల్ ఖాన్ జిల్లాలో శనివారం పోలీస్ చెక్‌పోస్ట్ లక్ష్యంగా జరిగిన ఆత్మహుతి బాంబు దాడిలో కనీసం 11 మంది ప్రాణాలు కోల్పోయారు. ఈ భారీ పేలుడులో పోలీసులతో సహా మరో 30 మంది తీవ్రంగా గాయపడ్డారు.
పాకిస్థాన్‌లోని ఖైబర్ పఖ్తుంఖ్వా ప్రావిన్స్‌లో శనివారం భారీ ఉగ్రవాద దాడి జరిగింది. డేరా ఇస్మాయిల్ ఖాన్ జిల్లా దరజిందా ప్రాంతంలోని అమన్ మేళా పోలీస్ చెక్‌పోస్ట్ లక్ష్యంగా ఓ ఆత్మహుతి బాంబర్ పేలుడు పదార్థాలతో నింపిన వాహనాన్ని వేగంగా వచ్చి ఢీకొట్టాడు. ఈ శక్తివంతమైన పేలుడు ధాటికి చెక్‌పోస్ట్ పరిసరాలు దద్దరిల్లిపోగా, అక్కడికక్కడే కనీసం 11 మంది దుర్మరణం పాలయ్యారు. మృతులతో పాటు గాయపడిన మరో 30 మందిలో పలువురు పోలీసు సిబ్బంది కూడా ఉన్నట్లు అధికారులు వెల్లడించారు.
సమాచారం అందుకున్న వెంటనే రెస్క్యూ 1122 బృందాలు ఆరు అంబులెన్సులతో ఘటనా స్థలానికి చేరుకుని సహాయక చర్యలు చేపట్టాయి. కరక్, హంగు జిల్లాల నుంచి అదనపు సహాయక సిబ్బందిని రప్పించి క్షతగాత్రులను సమీప ఆస్పత్రులకు తరలించినట్లు రెస్క్యూ విభాగం అధికార ప్రతినిధి బిలాల్ అహ్మద్ ఫైజీ తెలిపారు.
ఈ ఘోర ఆత్మహుతి దాడికి పాల్పడింది తామేనని నిషేధిత ఉగ్రవాద సంస్థ తెహ్రీక్-ఇ-తాలిబాన్ పాకిస్థాన్ (TTP) ప్రకటించినట్లు న్యూస్18 ఇంగ్లీష్ కథనం పేర్కొంది. మరోవైపు ఆఫ్ఘనిస్తాన్ కేంద్రంగా పనిచేసే హఫీజ్ గుల్ బహదూర్ నేతృత్వంలోని ఇత్తిహాదుల్ ముజాహిదీన్ పాకిస్థాన్ ముఠా సైతం ఈ పేలుడులో తమ ప్రమేయం ఉందని వెల్లడించింది.
ఈ దాడిని ఖైబర్ పఖ్తుంఖ్వా గవర్నర్ ఫైసల్ కరీం కుందీ తీవ్రంగా ఖండించారు. ఉగ్రవాదుల పిరికిపంద చర్యగా అభివర్ణించిన ఆయన, గాయపడిన వారికి మెరుగైన వైద్య చికిత్స అందించాలని అధికారులను ఆదేశించారు. భద్రతా బలగాలు ఆ ప్రాంతాన్ని పూర్తిగా తమ ఆధీనంలోకి తీసుకుని గాలింపు చర్యలు ముమ్మరం చేశాయి.
ఆఫ్ఘనిస్తాన్ సరిహద్దుకు సమీపంలో ఉండే ఖైబర్ పఖ్తుంఖ్వా ప్రాంతంలో ఇటీవల ఉగ్రదాడులు విపరీతంగా పెరిగిపోయాయి. గత వారం కోహాట్ పోలీస్ లైన్స్‌పై జరిగిన బాంబు దాడిలో 23 మంది మరణించిన ఘటన మరువకముందే మరోసారి పోలీసులనే లక్ష్యంగా చేసుకుని ఈ ఘాతుకానికి పాల్పడటం అక్కడ తీవ్ర భయాందోళనలు సృష్టిస్తోంది.
