భారత్ తన ప్రయోజనాల కోసం పోరాడుతుంది, కానీ మిత్రులు విభేదాలను అధిగమిస్తారు: అమెరికా వాణిజ్య ఒప్పందంపై మార్కో రూబియో |

“భారత్ మాత్రమే కాదు, మాతో సంబంధాలు కలిగి ఉన్న ప్రతి దేశం కూడా తమకు ప్రయోజనకరమైన అంశాల కోసం పోరాడుతుందని మేము ఆశిస్తున్నాం. అదే విధంగా, మేము కూడా మా దేశానికి మేలు చేసే అంశాల కోసం ప్రయత్నిస్తాం” అని రూబియో అన్నారు.

ఒక వాణిజ్య ఒప్పందం కుదుర్చుకోవడం వెనుక ప్రధాన ఉద్దేశం ప్రస్తుతం ఉన్న పరిస్థితుల కంటే మెరుగైన నిబంధనలను సాధించడమేనని ఆయన వివరించారు. అయితే, అంతకంటే ముఖ్యమైన విషయం ఇరు దేశాల మధ్య వాణిజ్య సంబంధాలు దీర్ఘకాలం కొనసాగేందుకు అవసరమైన పరిస్థితులను కల్పించడమని చెప్పారు. అమెరికా విదేశాంగ, వాణిజ్య విధానాలు ప్రతి దేశానికి సొంత జాతీయ ప్రయోజనాలు ఉంటాయనే వాస్తవాన్ని గుర్తించడం ఆధారంగా రూపొందుతాయని తెలిపారు.

మిత్రదేశాలు, భాగస్వాములుగా ఉన్నప్పుడు ఇరు దేశాల మధ్య అనేక ఉమ్మడి ప్రయోజనాలు ఉంటాయని రూబియో అన్నారు. ఈ ఉమ్మడి అంశాలు భిన్నాభిప్రాయాలను అధిగమించి, పరస్పర ప్రయోజనకరమైన పరిష్కారాలను కనుగొనడానికి సహాయపడతాయని వివరించారు. భారత్‌తోనే కాకుండా ఇతర దేశాలతో కుదుర్చుకునే వాణిజ్య ఒప్పందాలు కూడా దీర్ఘకాలం కొనసాగాలంటే ఇరు పక్షాలకు ప్రయోజనం చేకూర్చేలా ఉండాలని స్పష్టం చేశారు.

“ఒప్పందంలోని కొన్ని అంశాలు మీకు నచ్చకపోవచ్చు. అయినప్పటికీ, మొత్తంగా చూస్తే ఆ ఒప్పందం మీకు ప్రయోజనం చేకూర్చేదిగా ఉండాలి. మేము కూడా అదే లక్ష్యంతో ముందుకు సాగుతున్నాం. భారత్‌తో కలిసి పనిచేయాల్సిన అంశాలు చాలా ఉన్నాయి. అందుకే ఈ ఒప్పందం త్వరగా ఖరారు కావాలని నేను ఆసక్తిగా ఎదురుచూస్తున్నాను” అని రూబియో పేర్కొన్నారు.

‘త్వరలోనే భారత్-అమెరికా ఒప్పందం’

అమెరికా-భారత్ వాణిజ్య ఒప్పందం నెలల తరబడి సమయం తీసుకోకుండా, కొన్ని వారాల్లోనే ఖరారయ్యే అవకాశం ఉందని రూబియో ఆశాభావం వ్యక్తం చేశారు. ఇరు దేశాల మధ్య చర్చలు తుది దశకు చేరుకుంటున్నాయని ఆయన అభిప్రాయపడ్డారు.

“నేను స్వయంగా ఈ చర్చల్లో పాల్గొనడం లేదు. మా వాణిజ్య ప్రతినిధి ఈ ప్రక్రియను నిర్వహిస్తున్నారు. అయితే, జరుగుతున్న పరిణామాలను నేను నిశితంగా గమనిస్తున్నాను. ఈ ఒప్పందం ఖరారు కావడానికి నెలల సమయం పట్టకుండా, కొన్ని వారాల్లోనే పూర్తవుతుందని మేము ఆశిస్తున్నాం” అని రూబియో చెప్పారు.

ఒప్పందం ఖరారు కావడానికి ఎక్కువ సమయం పట్టకపోవచ్చని ఆయన సంకేతాలిచ్చారు. పరిష్కరించాల్సిన కొన్ని సాంకేతిక అంశాలు మాత్రమే ఇంకా మిగిలి ఉన్నాయని తెలిపారు. అయితే, ఒప్పందంలోని ప్రతి అంశానికి ఇరు దేశాలు ఒకే విధమైన అర్థాన్ని ఇచ్చుకోవడం చాలా ముఖ్యమని వివరించారు. నిబంధనల విషయంలో స్పష్టత లేకపోతే భవిష్యత్తులో సమస్యలు తలెత్తే అవకాశం ఉంటుందని పేర్కొన్నారు.

“ఒప్పందం ఇప్పుడు తుది దశకు చాలా దగ్గరగా ఉందని నేను భావిస్తున్నాను. పరిష్కరించాల్సిన కొన్ని సాంకేతిక అంశాలు మాత్రమే మిగిలి ఉన్నాయి. ఇవి కూడా ముఖ్యమైనవే. ఎందుకంటే, ఒక ఒప్పందం కుదరాలంటే అందులోని పదాలకు ఇరు పక్షాలు ఒకే అర్థాన్ని ఇచ్చుకోవాలి. ప్రస్తుతం చర్చలు ఆ స్థాయికి చేరుకున్నాయి” అని రూబియో వివరించారు.