రాహుల్ గాంధీ నెట్టివేశారంటూ మహిళా జర్నలిస్టు ఆరోపణలు.. ఆసుపత్రిలో చికిత్స |

రాహుల్ గాంధీ బయటకు రాకముందే తాను ఆయనకు సమీపంలో నిలబడి వ్యాఖ్యలు తెలుసుకునేందుకు సిద్ధంగా ఉన్నానని రిచా చెప్పారు. ఇతర మీడియా సంస్థల ప్రతినిధులు ఆయన మాటలను రికార్డు చేస్తున్న సమయంలో తాను రెండోసారి మైక్‌ను ముందుకు చాచానని వివరించారు. అప్పుడు రాహుల్ తన చేతిని పట్టుకుని ఒకవైపునకు లాగారని ఆరోపించారు. ఈ పరిణామంతో ఆశ్చర్యానికి గురైన తాను.. తనను తోసవద్దని, పక్కకు వెళ్తున్నానని పదేపదే చెప్పినట్లు తెలిపారు. కొన్ని క్షణాల్లోనే రాహుల్ భద్రతా సిబ్బంది కూడా తనను తోసేయడంతో సుప్రీంకోర్టు వెలుపల మెట్లపై ముఖం కిందకు పెట్టుకుని పడిపోయానని రిచా ఆరోపించారు. తన కెమెరామన్‌ను రాహుల్ మోచేతితో కొట్టారని, దీంతో అతడు తనపై పడిపోయాడని చెప్పారు. ఆ గందరగోళంలో మరికొందరు కూడా తమపై పడినట్లు వెల్లడించారు.

కిందపడిన సమయంలో తన మైక్‌ గుర్తింపు చిహ్నం దూరంగా పడిపోయిందని, రాహుల్ తనను తోశారని తాను గట్టిగా చెబుతుండగా ఆయనతో వచ్చినవారు అబద్ధాలు చెబుతున్నానని అన్నారని రిచా పేర్కొన్నారు. అక్కడున్నవారిని కెమెరాలు ఆన్ చేసి జరిగినదాన్ని రికార్డు చేయాలని కోరినట్లు తెలిపారు. ఆ సమయంలో రాహుల్‌కు మద్దతుగా నినాదాలు చేశారని, తాను ఏడుస్తూ సహాయం కోసం అరిచినా వెంటనే ఎవరూ ముందుకు రాలేదని ఆరోపించారు. తర్వాత వన్‌ఇండియా బృందాన్ని సంప్రదించగా వారు తనకు మద్దతుగా నిలిచి దృశ్యాలను పంపాలని కోరినట్లు చెప్పారు. అనంతరం తన సోదరి, భర్త, కుటుంబ సభ్యులు ఆసుపత్రికి చేరుకున్నారని వెల్లడించారు.

ఆసుపత్రి నుంచి మాట్లాడిన రిచా.. మెడ, చేతుల్లో నొప్పి ఉందని, చీలమండ మెలికపడటంతో పాటు కింది కాలికి గాయమైందని తెలిపారు. వైద్యులు పరీక్షించి తీవ్రమైన అంతర్గత గాయాలు లేవని చెప్పినట్లు వివరించారు. తాను గర్భం దాల్చిన తొలి మూడు నెలల దశలో ఉన్నానని, పడిపోయేటప్పుడు చేతులతో పొట్టను కాపాడుకునేందుకు ప్రయత్నించానని వెల్లడించారు. అవసరమైన స్కాన్‌ పూర్తికాకపోవడంతో గర్భధారణ విషయాన్ని ఇంతకుముందు బహిరంగంగా ప్రకటించలేదని, ఆసుపత్రిలో వైద్యులు వెల్లడించడంతో ఈ విషయం బయటకు వచ్చిందని చెప్పారు.

రాహుల్ గాంధీపై వచ్చిన ఆరోపణలను కాంగ్రెస్ ఖండించింది. ఎన్డీటీవీ కథనం ప్రకారం, ఈ ఆరోపణలను అబద్ధాలుగా అభివర్ణించిన పార్టీ.. రిచా ఆసుపత్రికి వెళ్లిన సమయం, ఘటనకు సంబంధించిన పరిస్థితులపై ప్రశ్నలు లేవనెత్తింది. మరోవైపు, ఈ వ్యవహారంపై బీజేపీ రాహుల్‌ను లక్ష్యంగా చేసుకుని మహిళల భద్రతపై ఆయన వైఖరిని ప్రశ్నించింది.