కామారెడ్డికి దక్షిణ మధ్య రైల్వే జీఎం.. అభివృద్ధి పనులపై ప్రత్యేక పరిశీలన
ప్రభ న్యూస్, కామారెడ్డి, సెప్టెంబర్ 22:
దక్షిణ మధ్య రైల్వే జనరల్ మేనేజర్ సంజయ్ కుమార్ శ్రీవాస్తవ ప్రత్యేక తనిఖీ రైలులో కామారెడ్డికి చేరుకున్నారు. ఈ సందర్భంగా రైల్వే అధికారులు, సిబ్బంది మరియు ఆయనకు స్వాగతం పలికారు. అనంతరం కామారెడ్డి పరిధిలో కొనసాగుతున్న రైల్వే భద్రత, సాంకేతికత, మౌలిక వసతుల అభివృద్ధి పనులను జీఎం పరిశీలించారు.రైళ్ల రాకపోకలను మరింత సురక్షితంగా నిర్వహించేందుకు చేపడుతున్న కవచ్‌ సాంకేతిక వ్యవస్థ అప్‌గ్రేడేషన్ పనులపై జీఎం ప్రత్యేకంగా దృష్టి సారించారు. ఆధునిక సాంకేతిక పరిజ్ఞానాన్ని వినియోగించడం ద్వారా రైళ్ల భద్రతను మరింత బలోపేతం చేసేందుకు చేపడుతున్న చర్యలను అధికారులు ఆయనకు వివరించారు.అదేవిధంగా అమృత్‌ స్టేషన్‌ పథకం కింద కామారెడ్డి, మెద్చల్, మల్కాజిగిరి రైల్వే స్టేషన్లలో కొనసాగుతున్న అభివృద్ధి పనుల పురోగతిని జీఎం పరిశీలించారు. ప్రయాణికులకు మెరుగైన సౌకర్యాలు కల్పించడం, స్టేషన్ల మౌలిక వసతులను ఆధునికీకరించడం, ప్రయాణికుల అవసరాలకు అనుగుణంగా సదుపాయాలను అభివృద్ధి చేయడం వంటి అంశాలపై అధికారులతో సమీక్షించారు.కామారెడ్డి ప్రాంతంలో రైల్వే మౌలిక వసతులను మరింత బలోపేతం చేయడంతో పాటు ప్రయాణికుల భద్రత, సౌకర్యాలకు ప్రాధాన్యతనిస్తూ వివిధ అభివృద్ధి కార్యక్రమాలు కొనసాగుతున్నాయి. ఆధునిక సాంకేతికతను అందుబాటులోకి తీసుకురావడం, రైల్వే స్టేషన్లను అభివృద్ధి చేయడం, ప్రయాణికులకు మెరుగైన వసతులు కల్పించడం వంటి అంశాలకు దక్షిణ మధ్య రైల్వే ప్రాధాన్యత ఇస్తోంది.
జీఎం పర్యటన సందర్భంగా రైల్వే అధికారులు ఆయా అభివృద్ధి కార్యక్రమాల పురోగతిని వివరించారు. భద్రతా ప్రమాణాలను పాటిస్తూ అభివృద్ధి పనులను సమన్వయంతో ముందుకు తీసుకెళ్లడంపై అధికారులు దృష్టి సారించారు.
ప్రభ న్యూస్.. కామారెడ్డి
మీ రిపోర్టర్ రాజు
