Last Updated:
Uddhav Thackeray: మహారాష్ట్ర రాజకీయాల్లో ఉద్ధవ్ థాక్రే నేతృత్వంలోని శివసేన (యూబీటీ)కు మరో పెద్ద ఎదురుదెబ్బ తగిలింది.
ఉద్ధవ్ వర్గం నుంచి విడిపోయిన ఆరుగురు ఎంపీలు, మహారాష్ట్ర డిప్యూటీ సీఎం ఏక్నాథ్ షిండే నేతృత్వంలోని శివసేనలో విలీనమైనట్లు లోక్సభ స్పీకర్ ఓం బిర్లా అధికారికంగా గుర్తించారు. ఈ నిర్ణయంతో సదరు ఆరుగురు పార్లమెంటేరియన్లు ఇకపై లోక్సభలో షిండే వర్గం సభ్యులుగా కొనసాగుతారు. అలాగే తృణమూల్ కాంగ్రెస్కు చెందిన 20 మంది రెబెల్ ఎంపీలను వేరుగా కూర్చోవడానికి ఓం బిర్లా అనుమతి ఇచ్చారు. వారి కోసం ప్రత్యేక స్థానాలను కేటాయించనున్నారు.
ఉద్ధవ్ థాక్రే శిబిరం నుంచి బయటకు వచ్చిన ఆరుగురు ఎంపీలు, షిండే నేతృత్వంలోని శివసేనలో తమను విలీనం చేయాలని కోరుతూ లోక్సభ సెక్రటేరియట్కు దరఖాస్తు సమర్పించారు. ఈ విజ్ఞప్తిని స్పీకర్ కార్యాలయం పరిశీలించి, అధికారికంగా ఆమోదించింది. ఈ ఆమోదంతో లోక్సభలో వీరి విలీనం ఇకపై అధికారికంగా అమల్లోకి వచ్చింది.
సంజయ్ జాదవ్
భావసాహెబ్ వాకచౌరే
ఓంప్రకాష్ రాజెనింబల్కర్
సంజయ్ దీనా పాటిల్
సంజయ్ దేశ్ముఖ్
నగేశ్ పాటిల్-అష్టికర్
సుమారు నెల రోజుల క్రితం వీరు ఉద్ధవ్ థాక్రే వర్గం నుంచి వైదొలగి, ఏక్నాథ్ షిండే శివసేనలో చేరారు. ఇప్పుడు స్పీకర్ గుర్తింపు రావడంతో, లోక్సభలో షిండే వర్గం బలం 13 మంది ఎంపీలకు పెరిగింది.
ఈ విలీనాన్ని ఉద్ధవ్ థాక్రే నేతృత్వంలోని శివసేన (యూబీటీ) తీవ్రంగా వ్యతిరేకించింది. పార్టీ సంస్థాగత నిర్మాణంలో నిబంధనల ప్రకారం మూడింట రెండు వంతుల (2/3rds) మెజారిటీ లేనిదే ఈ విలీనం చెల్లదని, ఇది చట్టవిరుద్ధమని వారు వాదించారు. అయితే, ఈ అంశంపై ఏక్నాథ్ షిండే స్పందిస్తూ.. ఇది లోక్సభ స్పీకర్ నిర్ణయించాల్సిన అంశమని, తాము నిబంధనల ప్రకారమే గుర్తింపు కోరామని పేర్కొన్నారు.
జూలై 20 నుంచి ప్రారంభం కానున్న పార్లమెంట్ వర్షాకాల సమావేశాల నేపథ్యంలో స్పీకర్ తీసుకున్న ఈ నిర్ణయం అత్యంత ప్రాధాన్యత సంతరించుకుంది. పార్టీలో చీలిక తర్వాత అంతర్గత విభేదాలతో సతమతమవుతున్న ఉద్ధవ్ థాక్రే వర్గానికి ఇది రాజకీయంగా పెద్ద దెబ్బ కాగా, షిండే వర్గానికి తన స్థానాన్ని లోక్సభలో మరింత బలోపేతం చేసుకునే అవకాశం లభించింది. స్పీకర్ ఆమోదంతో ఆరుగురు ఎంపీల విలీన ప్రక్రియ అధికారికంగా ముగిసింది.
Click here to add News18 as your preferred news source on Google. బ్రేకింగ్ న్యూస్, రాజకీయాలు, దేశంలోని అన్ని రాష్ట్రాల్లోని ముఖ్యమైన వార్తలు, విశ్లేషణ, కేంద్ర ప్రభుత్వ పథకాలకు సంబంధించిన స్టోరీలను న్యూస్18 తెలుగు నేషనల్ కేటగిరీలో చదవండి. మరిన్ని వార్తల కోసం న్యూస్ 18 తెలుగు ఫాలో అవండి.
Hyderabad,Telangana
