Last Updated:
తెలంగాణలో డబుల్ ఇంజిన్ సర్కార్ ఏర్పడితేనే రాష్ట్ర సమగ్రాభివృద్ధి సాధ్యమవుతుందని బీజేపీ జాతీయ అధ్యక్షుడు నితిన్ నబిన్ అన్నారు. వరంగల్, భువనగిరి పర్యటనలో పాల్గొన్న ఆయన, కాంగ్రెస్ ప్రభుత్వం యువతకు ఇచ్చిన ఉపాధి, అభివృద్ధి హామీలను అమలు చేయడంలో విఫలమైందని విమర్శించారు. రానున్న ఎన్నికల్లో బీజేపీ అధికారంలోకి వస్తుందని ధీమా వ్యక్తం చేస్తూ పార్టీ శ్రేణులకు దిశానిర్దేశం చేశారు.
తెలంగాణ రాష్ట్ర సమగ్రాభివృద్ధి భారతీయ జనతా పార్టీతోనే సాధ్యమవుతుందని, కేంద్రం-రాష్ట్రంలో ఒకే పార్టీ ప్రభుత్వం ఉండే ‘డబుల్ ఇంజిన్ సర్కార్’ ఏర్పడితేనే రాష్ట్ర భవిష్యత్తు మరింత వేగంగా మారుతుందని బీజేపీ జాతీయ అధ్యక్షుడు నితిన్ నబీన్ అన్నారు. రాబోయే ఎన్నికల్లో తెలంగాణలో బీజేపీ అధికారంలోకి రావడం ఖాయమని ఆయన విశ్వాసం వ్యక్తం చేశారు.
తెలంగాణ పర్యటనలో భాగంగా నితిన్ నబీన్ వరంగల్ జిల్లాలో పర్యటించి పార్టీ కార్యక్రమాల్లో పాల్గొన్నారు. ఈ సందర్భంగా జిల్లాలో కేంద్ర ప్రభుత్వం అమలు చేసిన అభివృద్ధి కార్యక్రమాలు, చేపట్టిన పనుల గురించి పార్టీ నాయకులు, కార్యకర్తలకు వివరించారు. రానున్న ఎన్నికలను దృష్టిలో పెట్టుకుని నాయకులు, కార్యకర్తలు ఇప్పటి నుంచే సమన్వయంతో పనిచేయాలని సూచిస్తూ, బీజేపీ ప్రభుత్వాన్ని రాష్ట్రంలో ఏర్పాటు చేయడమే లక్ష్యంగా ముందుకు సాగాలని పిలుపునిచ్చారు.
ఈ కార్యక్రమంలో కేంద్ర మంత్రులు కిషన్ రెడ్డి, బండి సంజయ్తో పాటు పలువురు బీజేపీ ముఖ్య నాయకులు పాల్గొన్నారు. పార్టీ శ్రేణులను ఉద్దేశించి మాట్లాడిన నితిన్ నబిన్, తెలంగాణలో బీజేపీకి ప్రజల మద్దతు రోజురోజుకూ పెరుగుతోందని, వచ్చే ఎన్నికల్లో ఆ మద్దతు అధికారంగా మారుతుందని ధీమా వ్యక్తం చేశారు.
అంతకుముందు తెలంగాణ పర్యటనలో భాగంగా భువనగిరి చేరుకున్న నితిన్ నబిన్కు పార్టీ పదాధికారులు, కార్యకర్తలు, స్థానిక ప్రజలు ఘన స్వాగతం పలికారు. తనకు లభించిన ఆత్మీయ ఆదరణ పట్ల ఆయన కృతజ్ఞతలు తెలిపారు. పార్టీ కోసం అంకితభావంతో పనిచేస్తున్న కార్యకర్తల అభిమానానికి తాను ఎంతో ఆనందించానని పేర్కొన్నారు.
అదే పర్యటనలో నిర్వహించిన ‘వికసిత్ భారత్ స్టూడెంట్ కాంక్లేవ్’ కార్యక్రమంలో కూడా నితిన్ నబిన్ విద్యార్థులు, యువతతో ప్రత్యేకంగా సమావేశమయ్యారు. యువతతో నేరుగా సంభాషిస్తూ వారి అభిప్రాయాలు తెలుసుకున్నారు. తెలంగాణ యువతలో అపారమైన ప్రతిభ, సృజనాత్మకత, నైపుణ్యం, అభివృద్ధికి అవసరమైన సామర్థ్యం ఉన్నాయని ఆయన కొనియాడారు. భారతదేశ అభివృద్ధిలో తెలంగాణ యువత కీలక పాత్ర పోషించే శక్తి కలిగి ఉందని అభిప్రాయపడ్డారు.
అయితే రాష్ట్రంలోని కాంగ్రెస్ ప్రభుత్వం యువతకు ఇచ్చిన ముఖ్య హామీలను అమలు చేయడంలో విఫలమైందని నితిన్ నబిన్ ఆరోపించారు. ముఖ్యంగా ఉపాధి అవకాశాలు కల్పించడం, అభివృద్ధికి సంబంధించిన హామీలను నెరవేర్చడంలో ప్రభుత్వం ఆశించిన ఫలితాలు ఇవ్వలేదని విమర్శించారు. ప్రతిభ ఉన్నప్పటికీ ప్రభుత్వ విధానాల కారణంగా యువత ఇబ్బందులు ఎదుర్కొంటోందని పేర్కొన్నారు.
తెలంగాణలో అభివృద్ధి, ఉపాధి, మౌలిక వసతుల విస్తరణ వంటి అంశాల్లో వేగవంతమైన మార్పులు తీసుకురావాలంటే బీజేపీ ప్రభుత్వమే ప్రత్యామ్నాయమని ఆయన స్పష్టం చేశారు. కేంద్ర ప్రభుత్వ సహకారంతో రాష్ట్రంలో అభివృద్ధి కార్యక్రమాలను మరింత సమర్థవంతంగా అమలు చేయడానికి డబుల్ ఇంజిన్ సర్కార్ అవసరమని అన్నారు.
రాష్ట్రవ్యాప్తంగా పార్టీ బలోపేతానికి నాయకులు, కార్యకర్తలు ప్రజల్లోకి వెళ్లి కేంద్ర ప్రభుత్వ సంక్షేమ, అభివృద్ధి కార్యక్రమాలను విస్తృతంగా వివరించాలని నితిన్ నబిన్ సూచించారు. రాబోయే ఎన్నికల్లో బీజేపీ విజయానికి ప్రతి కార్యకర్త కృషి చేయాలని పిలుపునిస్తూ తన తెలంగాణ పర్యటనను కొనసాగించారు.
Hyderabad,Telangana
