Last Updated:
Railway News | కాచిగూడ రైల్వే స్టేషన్‌లో మరమ్మతు పనుల కారణంగా రెండు రైళ్ల టెర్మినల్ స్టేషన్లను దక్షిణ మధ్య రైల్వే తాత్కాలికంగా మార్చింది. అక్టోబర్ 30 నుంచి నవంబర్ 5 వరకు ఈ మార్పులు అమల్లో ఉంటాయి. ప్రయాణికులు ఈ వివరాలు తప్పనిసరిగా తెలుసుకోవాలి.
కాచిగూడ రైల్వే స్టేషన్‌లో మరమ్మతు పనులు కొనసాగుతున్న నేపథ్యంలో దక్షిణ మధ్య రైల్వే కీలక నిర్ణయం తీసుకుంది. రెండు రైళ్ల టెర్మినల్ స్టేషన్లను తాత్కాలికంగా మార్చింది. ఈ మార్పుల వల్ల ఆయా రైళ్లలో ప్రయాణించే ప్రయాణికులు తమ ప్రయాణాన్ని ముందుగానే ప్లాన్ చేసుకోవాల్సి ఉంటుంది. కాచిగూడ రైల్వే స్టేషన్‌లోని పిట్ లైన్ (రైళ్ల నిర్వహణ, మరమ్మతుల కోసం ఉపయోగించే లైన్) పనులు ఇంకా కొనసాగుతున్నాయి. ఈ పనులు అనుకున్న దానికంటే ఎక్కువ సమయం పడుతుండటంతో రైల్వే అధికారులు రెండు రైళ్ల రాకపోకల్లో మార్పులు చేశారు. దక్షిణ మధ్య రైల్వే విడుదల చేసిన ప్రకటన ప్రకారం.. ఈ మార్పులు 2026 అక్టోబర్ 30 నుంచి నవంబర్ 5 వరకు అమల్లో ఉంటాయి.
ఈ సమయంలో రైలు నంబర్ 57606 వికారాబాద్-కాచిగూడ ప్యాసింజర్ రైలు కాచిగూడకు బదులుగా చర్లపల్లి స్టేషన్‌లో తన ప్రయాణాన్ని ముగిస్తుంది. అంటే ఈ రైల్లో వచ్చే ప్రయాణికులు కాచిగూడకు కాకుండా చర్లపల్లిలో దిగాల్సి ఉంటుంది. అదే విధంగా రైలు నంబర్ 17625 కాచిగూడ-రేపల్లె ఎక్స్‌ప్రెస్ కూడా అక్టోబర్ 30 నుంచి నవంబర్ 5 వరకు కాచిగూడకు బదులుగా చర్లపల్లి స్టేషన్ నుంచే బయలుదేరుతుంది. ఈ రెండు రైళ్లలో ప్రయాణించే వాళ్లు స్టేషన్ మార్పులను గమనించాలని రైల్వే అధికారులు సూచించారు.
ప్రయాణానికి బయలుదేరే ముందు కొత్త టెర్మినల్ స్టేషన్ వివరాలను తెలుసుకుని, అందుకు తగ్గట్టుగా తమ ప్రయాణాన్ని ప్లాన్ చేసుకోవాలని కోరారు. లేదంటే చివరి నిమిషంలో ఇబ్బందులు ఎదురయ్యే అవకాశం ఉంది. కాచిగూడ రైల్వే స్టేషన్‌లో కొనసాగుతున్న నిర్వహణ, మరమ్మతు పనులు సజావుగా పూర్తి చేసేందుకు రైల్వే శాఖ ఈ తాత్కాలిక మార్పులు చేసింది. కాబట్టి అక్టోబర్ 30 నుంచి నవంబర్ 5 మధ్య ఈ రైళ్లలో ప్రయాణించేవాళ్లు కాచిగూడకు బదులుగా చర్లపల్లి స్టేషన్‌ను దృష్టిలో పెట్టుకుని తమ ప్రయాణ ఏర్పాట్లు చేసుకోవాలి.
