Last Updated:
బద్రీనాథ్ ధామ్ నుంచి ఆరుగురితో బయలుదేరిన ఓ హెలికాప్టర్ కొద్దిసేపటికే అదృశ్యమైంది. ఆచూకీ కోసం అధికారులు గాలింపు చేపట్టగా.. చివరకు కనిపించిన దృశ్యాలు అందరినీ కలచివేశాయి.
ఉత్తరాఖండ్‌లో ఘోర విమాన ప్రమాదం చోటుచేసుకుంది. బద్రీనాథ్ ధామ్ నుంచి ప్రయాణికులతో బయలుదేరిన ఓ హెలికాప్టర్ ప్రతికూల వాతావరణం కారణంగా ప్రమాదానికి గురైంది. చమోలి జిల్లాలోని పర్వత ప్రాంతంలో ఈ ఘటన జరిగింది. ఈ ప్రమాదంలో హెలికాప్టర్‌లో ప్రయాణిస్తున్న ఆరుగురూ ప్రాణాలు కోల్పోయినట్లు సమాచారం వెలువడింది. తొలుత హెలికాప్టర్ అదృశ్యమైనట్లు వార్తలు రావడంతో అధికారులు గాలింపు చర్యలు చేపట్టారు. ఆ తర్వాత ప్రమాదం జరిగినట్లు నిర్ధారించారు.
అక్టోబర్ 30న బద్రీనాథ్ ధామ్ నుంచి ఆరుగురితో ఓ ప్రైవేట్ సంస్థకు చెందిన హెలికాప్టర్ బయలుదేరింది. ఇందులో ఐదుగురు ప్రయాణికులతో పాటు ఒక పైలట్ ఉన్నారు. ఈ హెలికాప్టర్ రిషికేశ్ వైపు వెళ్తున్నట్లు సమాచారం. అయితే ప్రయాణ సమయంలో చమోలి జిల్లాలోని ప్రాంతంలో వాతావరణం ఒక్కసారిగా ప్రతికూలంగా మారింది. ఈ క్రమంలో చాంయి, థైంగ్ గ్రామాల సమీపంలో హెలికాప్టర్ ప్రమాదానికి గురైనట్లు తెలుస్తోంది.
HELICOPTER CRASH REPORTED NEAR JOSHIMATH; WRECKAGE YET TO BE FOUND
A helicopter flying from Badrinath to Phata has reportedly crashed in Chayi village, behind Hathi Pahad near Joshimath. However, the wreckage has not yet been located.Earlier in October, two Char Dham helicopters made emergency landings — one in Rudraprayag due to bad weather and another in Tehri due to a technical issue.
— Subodh Kumar (@kumarsubodh_) October 30, 2026
హెలికాప్టర్‌తో సంబంధాలు తెగిపోవడంతో తొలుత అది గల్లంతైనట్లు అధికారులు గుర్తించారు. బద్రీనాథ్ నుంచి బయలుదేరిన విమానం నిర్ణీత ప్రాంతానికి చేరుకోకపోవడంతో ఆందోళన నెలకొంది. వెంటనే జిల్లా యంత్రాంగం, పోలీసులు అప్రమత్తమయ్యారు. అదృశ్యమైన హెలికాప్టర్ ఆచూకీ కోసం గాలింపు చర్యలు ప్రారంభించారు. మరో హెలికాప్టర్ ద్వారా గగనతలంలో నుంచి కూడా అన్వేషణ చేపట్టారు.
ఈ క్రమంలో గాలింపు బృందాలకు ప్రమాద ప్రాంతంలో హెలికాప్టర్ శిథిలాలు కనిపించినట్లు సమాచారం అందింది. దీంతో చాపర్ కూలిపోయి ఉంటుందన్న అనుమానాలు బలపడ్డాయి. అయితే తొలుత ప్రమాదం జరిగిన ప్రదేశం, అందులో ఉన్నవారి పరిస్థితిపై స్పష్టత కోసం అధికారులు ఎదురుచూశారు.
భారత సైన్యం అందించిన సమాచారంతో అధికారులు హెలికాప్టర్ ప్రమాదానికి గురైన ప్రాంతాన్ని గుర్తించారు. అనంతరం ప్రమాదం జరిగినట్లు జిల్లా యంత్రాంగం ధ్రువీకరించింది. ఈ ఘటనలో హెలికాప్టర్‌లో ఉన్న ఆరుగురూ మరణించినట్లు తాజా సమాచారం వెల్లడైంది. చమోలి జిల్లా కలెక్టర్ గౌరవ్ కుమార్ కూడా సైన్యం నుంచి అందిన సమాచారంతో ప్రమాద ప్రాంతాన్ని గుర్తించినట్లు తెలిపారు.
ప్రమాదం జరిగినట్లు నిర్ధారణ కావడంతో జాతీయ విపత్తు స్పందన దళం (NDRF), రాష్ట్ర విపత్తు స్పందన దళం (SDRF), ఉత్తరాఖండ్ పోలీసులు సంఘటనా స్థలానికి బయలుదేరారు. సహాయక చర్యలు చేపట్టేందుకు అధికారులు ఏర్పాట్లు చేశారు. కొండ ప్రాంతం కావడం, ప్రతికూల వాతావరణ పరిస్థితులు ఉండటంతో గాలింపు, సహాయక చర్యలకు ఇబ్బందులు ఎదురయ్యే అవకాశం ఉంది. ఈ ప్రమాదానికి సంబంధించి మరిన్ని వివరాలు తెలియాల్సి ఉంది.
