Last Updated:
Murder Investigation: హైదరాబాద్‌లోని జూబ్లీహిల్స్ ప్రశాసన్‌నగర్‌లో సంచలనం సృష్టించిన విశ్రాంత ఐపీఎస్ అధికారి వినయ్‌రంజన్‌రే భార్య తనూజ రంజన్ (60) హత్య కేసులో పోలీసులు కీలక పురోగతి సాధించారు.
గత ఆరు నెలలుగా ప్రత్యేక బృందాలతో దేశంలోని ప్రధాన నగరాలతో పాటు నేపాల్‌లోనూ ముమ్మరంగా గాలింపు చేపట్టిన అధికారులు, తాజాగా ఈ హత్య కేసులో ప్రధాన నిందితురాలైన కల్పన ఆచూకీని గుర్తించినట్లు సమాచారం.
విశ్రాంత ఐపీఎస్ అధికారి తన వృద్ధ తల్లికి సంరక్షకురాలిగా సహాయం చేసేందుకు నేపాల్‌కు చెందిన కల్పన అనే మహిళను ఇంట్లో పనిలోకి చేర్చుకున్నారు. అయితే, ఇంట్లోని విలువైన నగదు, బంగారు ఆభరణాలను కొట్టేసేందుకు నిందితులు కల్పనను ఒక పావుగా వాడుకున్నారు. మే 7వ తేదీన వినయ్‌రంజన్‌రే వ్యక్తిగత పనిపై బెంగళూరు వెళ్లిన సమయాన్ని నిందితులు అనుకూలంగా మార్చుకున్నారు. ఆ రోజు అర్ధరాత్రి దాటిన తర్వాత నిందితులు ఇంట్లోకి చొరబడి, నిద్రిస్తున్న తనూజ ముఖంపై దిండు అదిమి ఊపిరాడకుండా చేసి దారుణంగా ప్రాణం తీశారు. అనంతరం ఇంట్లోని విలువైన బంగారు నగలన్నింటినీ దోచుకుని అక్కడి నుంచి పరారయ్యారు.
ఈ అమానుష ఘటనపై కేసు నమోదు చేసుకున్న నగర పోలీసులు విచారణను అత్యంత ప్రతిష్టాత్మకంగా తీసుకున్నారు. దర్యాప్తు ప్రారంభించిన అధికారులు ఇప్పటివరకు ఈ కేసుతో సంబంధం ఉన్న ఇద్దరు నిందితులను అరెస్ట్ చేశారు. వారిలో కీలక పాత్ర పోషించిన సునీల్ బహదూర్‌జాజీ (29) అనే నిందితుడిపై నగర పోలీసులు కఠినమైన పీడీయాక్ట్‌ను ప్రయోగించి జైలుకు పంపించారు. కాగా, దర్యాప్తు ప్రారంభంలో నిర్లక్ష్యం వహించిన పలువురు పోలీసు సిబ్బందికి ఉన్నతాధికారులు చార్జ్ మెమోలు కూడా జారీ చేశారు.
పథకం ప్రకారం హత్యకు పాల్పడిన నేపాలీ ముఠా సభ్యులు, పోలీసులను చాకచక్యంగా ఏమారుస్తూ బీహార్ సరిహద్దుల మీదుగా తమ స్వదేశమైన నేపాల్‌లోకి పారిపోయారు. ప్రధాన నిందితురాలు కల్పన నేపాల్‌కు చేరినట్లు పక్కా ఆధారాలు సేకరించిన నగర పోలీసు విభాగం, ఒక ప్రత్యేక దర్యాప్తు బృందాన్ని నేపాల్‌కు పంపింది. గత రెండు నెలలుగా అక్కడే మకాం వేసిన ప్రత్యేక బృందాలు విస్తృతంగా గాలింపు చర్యలు చేపట్టి ఎట్టకేలకు ఆమె ఆచూకీని కనిపెట్టాయి. అయితే, అక్కడ తీవ్ర ప్రతికూల వాతావరణ పరిస్థితులు నెలకొని ఉండటంతో ఆమెను అదుపులోకి తీసుకోవడం పోలీసులకు పెద్ద సవాల్‌గా మారింది.
ఇదిలా ఉండగా, కల్పనను పోలీసులు ఇప్పటికే అరెస్ట్ చేశారంటూ సామాజిక మాధ్యమాల్లో వస్తున్న వార్తలను పోలీస్ అధికారులు ఖండించారు. సోషల్ మీడియాలో జరుగుతున్న ఆ ప్రచారం పూర్తిగా అవాస్తవమని, ఆమెను త్వరలోనే చట్టపరంగా అదుపులోకి తీసుకుని నగరానికి తీసుకువస్తామని స్పష్టం చేశారు.
