Last Updated:
మనిషిని శారీరక లోపాలు కాదు.. ఆత్మవిశ్వాసం, పట్టుదలే ఉన్నత శిఖరాలకు తీసుకెళ్తాయి. కొందరు చిన్న చిన్న సమస్యలకే జీవితంపై ఆశలు వదులుకుంటారు. కానీ మరికొందరు మాత్రం తమ జీవితంలో ఎదురైన ప్రతి సవాలునూ విజయానికి మెట్టుగా మార్చుకుంటారు.
మనిషిని శారీరక లోపాలు కాదు.. ఆత్మవిశ్వాసం, పట్టుదలే ఉన్నత శిఖరాలకు తీసుకెళ్తాయి. కొందరు చిన్న చిన్న సమస్యలకే జీవితంపై ఆశలు వదులుకుంటారు. కానీ మరికొందరు మాత్రం తమ జీవితంలో ఎదురైన ప్రతి సవాలునూ విజయానికి మెట్టుగా మార్చుకుంటారు. పుట్టుకతోనే వినికిడి, మాటల లోపం ఉన్నా.. ఆ లోపాన్ని తన కలలకు అడ్డుకానివ్వలేదు ఓ యువతి. వినిపించకపోయినా, మాట్లాడలేకపోయినా తన ప్రతిభతో ప్రపంచాన్ని మాట్లాడేలా చేసింది. రైతు కుటుంబంలో జన్మించి.. మారుమూల గ్రామం నుంచి అంతర్జాతీయ క్రికెట్ వేదిక వరకు ఎదిగిన ఆమె ప్రయాణం ఎందరికో స్ఫూర్తి. కష్టపడితే అసాధ్యం అనేది ఏదీ లేదని తన జీవితంతో నిరూపించింది. ఇప్పుడు భారత్-శ్రీలంక మధ్య జరగనున్న బధిరుల మహిళల టీ20 క్రికెట్ సిరీస్లో భారత జట్టు తరఫున ఆడే అవకాశాన్ని దక్కించుకుని తన గ్రామానికే కాదు.. ఆంధ్రప్రదేశ్కే గర్వకారణంగా నిలిచింది. ఆమెనే అనకాపల్లి జిల్లా చీడికాడ మండలం ఖండివరం గ్రామానికి చెందిన జ్యోత్స్న.
ఖండివరం గ్రామానికి చెందిన రైతు దంపతులు రెడ్డి మోదినాయుడు, శ్యామసుందరి కుమార్తె జ్యోత్స్న పుట్టుకతోనే చెవిటి, మూగ. సాధారణంగా ఇలాంటి పరిస్థితుల్లో చాలామంది తల్లిదండ్రులు ఆందోళన చెందుతారు. కానీ జ్యోత్స్న తల్లిదండ్రులు మాత్రం ఆమెను ఎప్పుడూ భారంగా భావించలేదు. తమ కుమార్తెను అందరిలాగే ఉన్నత స్థాయికి తీసుకెళ్లాలని కలలు కన్నారు. ఆ కలలను నిజం చేయాలనే సంకల్పంతో ఆమెకు ప్రతి అడుగులో అండగా నిలిచారు. జ్యోత్స్న కూడా తల్లిదండ్రుల నమ్మకాన్ని నిలబెట్టింది. చదువులో ప్రతిభ కనబరుస్తూనే క్రీడల్లోనూ తనదైన ముద్ర వేసింది. కష్టపడి చదివి గత ఏడాది కంప్యూటర్ సైన్స్ విభాగంలో బీటెక్ పూర్తి చేసింది. విద్యతో పాటు క్రీడలను కూడా సమానంగా కొనసాగిస్తూ ప్రతి అవకాశాన్ని విజయంగా మలుచుకుంది.
చిన్నప్పటి నుంచే జ్యోత్స్నకు క్రీడలంటే అమితమైన ఆసక్తి. కేవలం 12 ఏళ్ల వయసులోనే పాఠశాల స్థాయి క్రీడా పోటీల్లో పాల్గొనడం ప్రారంభించింది. మొదట లాంగ్ జంప్, 100 మీటర్లు, 200 మీటర్ల పరుగుపందేలు, జావెలిన్ త్రో, డిస్కస్ త్రో, వాలీబాల్ వంటి విభాగాల్లో తన ప్రతిభను చాటింది. అనంతరం క్రికెట్పై ప్రత్యేక ఆసక్తి పెంచుకుని బధిరుల మహిళల క్రికెట్లో తనకంటూ ప్రత్యేక గుర్తింపు తెచ్చుకుంది.
జిల్లా, రాష్ట్ర, జాతీయ స్థాయి పోటీల్లో పాల్గొని పదుల సంఖ్యలో పతకాలు సాధించింది. ప్రతి టోర్నీలో తన ఆటతీరుతో ఆకట్టుకుంటూ క్రమంగా ఉన్నత స్థాయికి చేరుకుంది. ప్రస్తుతం ఆంధ్రప్రదేశ్ బధిరుల మహిళల క్రికెట్ జట్టుకు కెప్టెన్గా బాధ్యతలు నిర్వర్తిస్తూ తన నాయకత్వ ప్రతిభను కూడా చాటుతోంది.
ఈ ఏడాది మార్చిలో హరియాణాలో జరిగిన జాతీయ స్థాయి బధిరుల మహిళల క్రికెట్ ఛాంపియన్షిప్లో ఆంధ్రప్రదేశ్ జట్టుకు కెప్టెన్గా జ్యోత్స్న నాయకత్వం వహించింది. జట్టు మొత్తాన్ని సమన్వయం చేస్తూ అద్భుత ప్రదర్శన కనబరిచింది. ఫైనల్ మ్యాచ్లో ఢిల్లీ జట్టుపై ఆంధ్రప్రదేశ్ ఘన విజయం సాధించడంలో ఆమె కీలక పాత్ర పోషించింది. ఈ టోర్నీలో ఆమె ప్రదర్శనను నిశితంగా పరిశీలించిన సెలక్షన్ కమిటీ జ్యోత్స్నను భారత బధిరుల మహిళల క్రికెట్ జట్టుకు ఎంపిక చేసింది. ఇది ఆమె ఎన్నో ఏళ్ల కృషికి దక్కిన గొప్ప గుర్తింపు.
జూలై 7 నుంచి 13 వరకు భారత్-శ్రీలంక మధ్య జరగనున్న బధిరుల మహిళల టీ20 క్రికెట్ సిరీస్లో జ్యోత్స్న భారత జట్టు తరఫున బరిలోకి దిగనుంది. తొలిసారిగా దేశం తరఫున అంతర్జాతీయ మ్యాచ్ ఆడే అవకాశం రావడం ఆమె జీవితంలో అత్యంత విలువైన ఘట్టంగా మారింది. ఈ వార్త బయటకు రావడంతో ఖండివరం గ్రామంలో ఆనందం వెల్లివిరిసింది. గ్రామస్థులు, బంధువులు, స్నేహితులు, ఉపాధ్యాయులు, కోచ్లు ఆమెకు శుభాకాంక్షలు తెలుపుతున్నారు. రైతు కుటుంబంలో పుట్టిన ఓ అమ్మాయి అంతర్జాతీయ స్థాయికి చేరుకోవడం గ్రామానికి గర్వకారణమని స్థానికులు హర్షం వ్యక్తం చేస్తున్నారు.
జ్యోత్స్న విజయానికి ప్రధాన కారణం ఆమె తల్లిదండ్రుల ప్రోత్సాహమే. ఆర్థికంగా సాధారణ కుటుంబమైనప్పటికీ కుమార్తె కలలను ఎప్పుడూ అడ్డుకోలేదు. అవసరమైన ప్రతి సహాయాన్ని అందిస్తూ ఆమెను ముందుకు నడిపించారు. క్రీడా శిక్షణ, చదువు, పోటీల్లో పాల్గొనే అవకాశాలు కల్పిస్తూ ఆమెకు బలమైన మద్దతుగా నిలిచారు. ఆ త్యాగాలకు నేడు భారత జట్టులో స్థానం రూపంలో గొప్ప ఫలితం దక్కింది.
“వైకల్యం ఉందని ఎవరూ అధైర్యపడాల్సిన అవసరం లేదు. మనసులో లక్ష్యం ఉండాలి.. దాన్ని సాధించాలనే పట్టుదల ఉండాలి. ఇష్టమైన రంగంలో కష్టపడి పనిచేస్తే విజయం తప్పకుండా లభిస్తుంది. భారత జట్టు తరఫున తొలిసారి అంతర్జాతీయ పోటీలో పాల్గొనడం చాలా ఆనందంగా ఉంది. ఈ అవకాశాన్ని సద్వినియోగం చేసుకుని మంచి ప్రదర్శన చేస్తాను. నేను పుట్టిన ఖండివరం గ్రామానికి, ఆంధ్రప్రదేశ్ రాష్ట్రానికి, దేశానికి మంచి పేరు తీసుకురావడమే నా లక్ష్యం. భవిష్యత్తులో అంతర్జాతీయ బధిరుల మహిళల క్రికెట్లో అత్యున్నత స్థాయికి చేరుకోవాలని కోరుకుంటున్నాను” అని తెలిపింది.
జ్యోత్స్న కథ కేవలం ఓ క్రీడాకారిణి విజయగాథ మాత్రమే కాదు. శారీరక వైకల్యం ఉన్నప్పటికీ ఆత్మవిశ్వాసం, కృషి, పట్టుదల ఉంటే ఏ లక్ష్యాన్నైనా చేరుకోవచ్చని నిరూపించిన స్ఫూర్తిదాయక ప్రయాణం. మాటలు లేకపోయినా తన ఆటతో ప్రపంచాన్ని ఆకట్టుకుంది. వినిపించకపోయినా తన విజయంతో దేశం మొత్తం చప్పట్లు కొట్టేలా చేసింది. నేటి యువతకు, ముఖ్యంగా దివ్యాంగులకు జ్యోత్స్న జీవితం గొప్ప ప్రేరణ. ఆమె భారత జట్టు తరఫున మరెన్నో విజయాలు సాధించి దేశానికి కీర్తి తీసుకురావాలని ప్రతి ఒక్కరూ ఆకాంక్షిస్తున్నారు.
Hyderabad,Telangana
Jun 29, 2026 11:24 AM IST
