Last Updated:
GST Collections: దేశంలో జీఎస్‌టీ వసూళ్లు మరోసారి భారీగా పెరిగాయి. అక్టోబర్ నెలలో గత ఏడాదితో పోలిస్తే 22.9 శాతం వృద్ధి నమోదైంది. తెలుగు రాష్ట్రాలైన తెలంగాణ, ఆంధ్రప్రదేశ్‌లోనూ పన్ను ఆదాయం పెరిగింది. మరి దేశవ్యాప్తంగా ఎక్కడ ఎంత వసూలైంది? తెలంగాణ, ఏపీ గణాంకాలు ఎలా ఉన్నాయో తెలుసుకుందాం.
దేశంలో వస్తు, సేవల పన్ను (GST) వసూళ్లు మరోసారి భారీ వృద్ధిని నమోదు చేశాయి. అక్టోబర్ నెలలో జీఎస్‌టీ ఆదాయం గత ఏడాది ఇదే నెలతో పోలిస్తే 22.9 శాతం పెరిగి రూ.2.31 లక్షల కోట్లకు చేరుకుంది. ఆదివారం విడుదలైన అధికారిక గణాంకాలు ఈ విషయాన్ని వెల్లడించాయి. ముఖ్యంగా దిగుమతులపై వచ్చిన పన్ను ఆదాయం భారీగా పెరగడం మొత్తం వసూళ్ల వృద్ధికి ప్రధానంగా దోహదపడింది.
అధికారిక వివరాల ప్రకారం.. అక్టోబర్‌లో దిగుమతులపై స్థూల జీఎస్‌టీ వసూళ్లు 42.2 శాతం పెరిగి రూ.72,246 కోట్లకు చేరుకున్నాయి. దేశీయ లావాదేవీల ద్వారా వచ్చిన ఆదాయం కూడా 15.8 శాతం వృద్ధితో రూ.1.59 లక్షల కోట్లుగా నమోదైంది. అంటే దేశంలో వస్తువుల కొనుగోళ్లు, అమ్మకాలు, సేవల వినియోగం ద్వారా పన్ను ఆదాయం పెరుగుతుండటంతో పాటు విదేశాల నుంచి దిగుమతి చేసుకునే వస్తువులపై కూడా ఎక్కువ ఆదాయం సమకూరింది.
రీఫండ్లను మినహాయించి చూస్తే దిగుమతులపై నికర జీఎస్‌టీ ఆదాయం 56.2 శాతం పెరిగి రూ.58,319 కోట్లకు చేరింది. దేశీయ నికర ఆదాయం 16.4 శాతం వృద్ధితో రూ.1.45 లక్షల కోట్లుగా నమోదైంది. మొత్తంగా రీఫండ్లను సర్దుబాటు చేసిన తర్వాత అక్టోబర్ నెల నికర జీఎస్‌టీ వసూళ్లు 25.6 శాతం పెరిగి రూ.2.03 లక్షల కోట్లకు చేరుకున్నాయి. ఈ నెలలో మొత్తం రీఫండ్లు 6.5 శాతం పెరిగి రూ.27,934 కోట్లుగా ఉన్నాయి.
ప్రస్తుత ఆర్థిక సంవత్సరం మొదటి ఏడు నెలల్లో అంటే ఏప్రిల్ నుంచి అక్టోబర్ వరకు స్థూల జీఎస్‌టీ వసూళ్లు రూ.14.78 లక్షల కోట్లకు చేరాయి. గత ఏడాది ఇదే కాలంతో పోలిస్తే ఇది 13.2 శాతం ఎక్కువ. నికర జీఎస్‌టీ ఆదాయం కూడా 12.6 శాతం పెరిగి రూ.12.69 లక్షల కోట్లుగా నమోదైంది. అక్టోబర్ నెలలో CGST ద్వారా రూ.42,935 కోట్లు, SGST ద్వారా రూ.51,340 కోట్లు, IGST ద్వారా రూ.1.37 లక్షల కోట్ల ఆదాయం వచ్చింది.
రాష్ట్రాల వారీగా చూస్తే అస్సాం 47 శాతం వృద్ధితో అగ్రస్థానంలో నిలిచింది. అక్కడ జీఎస్‌టీ ఆదాయం రూ.1,315 కోట్ల నుంచి రూ.1,934 కోట్లకు పెరిగింది. జార్ఖండ్‌లో 31 శాతం, మధ్యప్రదేశ్‌లో 29 శాతం వృద్ధి నమోదైంది. మహారాష్ట్ర అత్యధికంగా రూ.35,150 కోట్ల వసూళ్లతో మొదటి స్థానంలో కొనసాగింది. కర్ణాటకలో రూ.15,922 కోట్లు, గుజరాత్‌లో రూ.13,516 కోట్ల ఆదాయం వచ్చింది.
అయితే అన్ని ప్రాంతాల్లోనూ వసూళ్లు పెరగలేదు. సిక్కింలో 28 శాతం, లద్దాఖ్‌లో 20 శాతం, పుదుచ్చేరిలో 7 శాతం తగ్గుదల నమోదైంది. హిమాచల్ ప్రదేశ్‌లోనూ 2 శాతం క్షీణత కనిపించింది. మొత్తంగా దేశవ్యాప్తంగా జీఎస్‌టీ ఆదాయం బలంగా పెరిగినప్పటికీ, రాష్ట్రాల మధ్య వృద్ధి రేట్లలో తేడాలు స్పష్టంగా కనిపిస్తున్నాయి. ప్రభుత్వం విడుదల చేసిన గణాంకాలు తాత్కాలికమైనవి కావడంతో తుది లెక్కల్లో స్వల్ప మార్పులు ఉండవచ్చు.
