Mrunal Thakur: అస్సలు సహించేదే లేదు.. అల్లు అర్జున్ రాకా హీరోయిన్ స్ట్రాంగ్ వార్నింగ్ | తెలుగు సినిమా వార్తలు

తన ఇమేజ్‌ను డ్యామేజ్ చేసేలా డీప్‌ఫేక్ కంటెంట్ సృష్టిస్తున్న వారిపై మృణాల్ సోషల్ మీడియా వేదికగా తీవ్రస్థాయిలో విరుచుకుపడింది. “నా రూపం, పోలికలను ఉపయోగిస్తూ సోషల్ మీడియాలో డీప్‌ఫేక్ వీడియోలు, ఫొటోలు తయారు చేయడం, షేర్ చేయడం అత్యంత చట్టవిరుద్ధం. ఇలాంటి చర్యలను నేను ఏమాత్రం సహించను. దీన్ని నా నుంచి వస్తున్న ఆఖరి హెచ్చరికగా లేదా ‘ఫార్మల్ లీగల్ నోటీసు’గా భావించి వెంటనే ఈ పనులు ఆపేయండి. నా గుర్తింపును మళ్లీ దుర్వినియోగం చేస్తే మాత్రం కఠినమైన చట్టపరమైన చర్యలు ఎదుర్కోవాల్సి ఉంటుంది” అని ఆమె ఘాటుగా స్పందించింది.

భారతీయ చలనచిత్ర పరిశ్రమలో ఏఐ దుర్వినియోగంపై తారలు గళమెత్తడం ఇదే తొలిసారి కాదు. గతంలో నేషనల్ క్రష్ రష్మిక మందన్న డీప్‌ఫేక్ వీడియో నెట్టింట సృష్టించిన సంచలనం అంతా ఇంతా కాదు. ఆ ఘటన దేశవ్యాప్తంగా తీవ్రస్థాయిలో నిరసనలకు దారితీసింది. ఆ సమయంలో తాను తీవ్ర భయాందోళనలకు గురైనట్లు రష్మిక సైతం ఆవేదన వ్యక్తం చేసింది. ఈ నేపథ్యంలో తమ ‘పర్సనాలిటీ, వాయిస్ రైట్స్’ (వ్యక్తిగత, స్వర హక్కులు) కాపాడుకునేందుకు పలువురు బాలీవుడ్ అగ్ర తారలు న్యాయస్థానాలను ఆశ్రయించారు. అక్షయ్ కుమార్, అనిల్ కపూర్, వరుణ్ ధావన్, శిల్పా శెట్టి, ప్రీతి జింటా, కార్తిక్ ఆర్యన్, సునీల్ శెట్టి వంటి స్టార్లు తమ అనుమతి లేకుండా తమ వాయిస్, ఇమేజ్ వాడకుండా ముందస్తుగా చట్టపరమైన రక్షణ పొందారు.

కెరీర్ పరంగా చూసుకుంటే.. మృణాల్ ఠాకూర్ ఇటీవల నటించిన ‘డెకాయిట్’ (Dacoit) చిత్రం తెలుగులో మంచి విజయాన్ని సాధించింది. అయితే హిందీలో విడుదలైన ‘హై జవానీ తో ఇష్క్ హోనా హై’ సినిమాకు మాత్రం మిశ్రమ స్పందన లభించింది. ప్రస్తుతం ఆమె ఒక భారీ పాన్-ఇండియా ప్రాజెక్టులో భాగమైంది. ఐకాన్ స్టార్ అల్లు అర్జున్, సెన్సేషనల్ డైరెక్టర్ అట్లీ కాంబినేషన్‌లో సుమారు రూ. 1000 కోట్ల భారీ బడ్జెట్‌తో తెరకెక్కుతున్న ‘రాకా’ సినిమాలో మృణాల్ నటిస్తోంది. ఇది ఒక విజువల్ వండర్‌గా మైథలాజికల్ సైన్స్-ఫిక్షన్ యాక్షన్ డ్రామాగా ప్రేక్షకుల ముందుకు రానుంది.