Last Updated:
మురసు తుఫాను కారణంగా విజయవాడ డివిజన్‌లో రైలు కార్యకలాపాలలో మార్పులు చేశారు. అధిక గాలుల వేగం వల్ల రైళ్ల రాకపోకలను తాత్కాలికంగా నిలిపివేశారు.
బంగాళాఖాతంలో ఏర్పడిన మురసు తుపాను ఏపీ తీరాన్ని వణికిస్తోంది. ప్రళయ గర్జనలు చేస్తూ దూసుకొస్తున్న ఈ గాలివాన దెబ్బకు రవాణా వ్యవస్థ పూర్తిగా స్తంభించిపోయింది. ముఖ్యంగా రైల్వే నెట్‌వర్క్‌పై తుపాను తీవ్ర ప్రభావం చూపుతోంది. భారీ ఈదురు గాలులతో ప్రకృతి సృష్టిస్తున్న బీభత్సానికి భయపడి రైళ్లు ఎక్కడికక్కడ నిలిచిపోయాయి. ప్రయాణికుల ప్రాణ భద్రతకు అత్యధిక ప్రాధాన్యం ఇస్తూ దక్షిణ మధ్య రైల్వే పలు కీలక నిర్ణయాలు తీసుకుంది. విజయవాడ డివిజన్ పరిధిలో నడిచే ఎక్స్‌ప్రెస్, ప్యాసింజర్ రైళ్లను రద్దు చేయడంతో పాటు పలు రైళ్లను దారి మళ్లించినట్లు అధికారులు అధికారికంగా ప్రకటించారు.
విజయవాడ, గూడూరు ప్రాంతాల మధ్య వాతావరణం అత్యంత భయానకంగా మారింది. ఈ రెండు స్టేషన్ల మధ్య ఊహించని స్థాయిలో కళ్లు బైర్లు కమ్మేలా ఈదురు గాలులు వీస్తుండటంతో రైళ్ల రాకపోకలకు తీవ్ర అంతరాయం ఏర్పడింది. పరిస్థితి తీవ్రతను ఎప్పటికప్పుడు సమీక్షిస్తున్న ఉన్నతాధికారులు విజయవాడ – ఒంగోలు – గూడూరు రూట్‌లో ప్రయాణాలను అత్యవసరంగా తాత్కాలికంగా నిలిపివేశారు. సౌత్ సెంట్రల్ రైల్వే సీపీఆర్ఓ బాలాజీ కిరణ్ ఈ విపత్కర పరిస్థితులను మీడియాకు వివరిస్తూ.. వాతావరణం పూర్తిగా అనుకూలించే వరకు ఈ ప్రధాన మార్గంలో రైళ్లను నియంత్రించక తప్పదని స్పష్టం చేశారు. కరెంటు తీగలు తెగిపడే ప్రమాదం ఉన్నందున ఈ నిర్ణయం తీసుకున్నట్లు వెల్లడించారు.
తుపాను ముప్పు పొంచి ఉన్న నేపథ్యంలో నవంబర్ 3వ తేదీన నడవాల్సిన పలు ప్యాసింజర్, ఎక్స్‌ప్రెస్ రైళ్లను పూర్తిగా రద్దు చేస్తున్నట్లు రైల్వే శాఖ ఓ ప్రకటనలో వెల్లడించింది. ప్రయాణికులు ఎవరూ స్టేషన్లకు రావొద్దని కోరింది. ప్రధానంగా బిట్రగుంట నుంచి ప్రతిరోజూ విజయవాడ వెళ్లే రైలు నెంబర్ 67260 సర్వీసును క్యాన్సిల్ చేశారు. అదేవిధంగా విజయవాడ నుంచి గూడూరు వెళ్లాల్సిన రైలు నెంబర్ 17260 సేవలను నిలిపివేశారు. దక్షిణ ప్రాంతానికి వెళ్లే గూడూరు నుంచి రేణిగుంట ప్యాసింజర్ రైలు నెంబర్ 67203 సర్వీసు కూడా రద్దయింది. రేణిగుంట నుంచి నెల్లూరు వెళ్లే రైలు నెంబర్ 67204 ప్రయాణాన్ని అత్యవసరంగా రద్దు చేస్తూ అధికారులు ఉత్తర్వులు జారీ చేశారు.
పైన పేర్కొన్న రైళ్లతో పాటే వాతావరణం ఏమాత్రం సహకరించకపోవడంతో నెల్లూరు నుంచి విజయవాడ వెళ్లే రైలు నెంబర్ 17259 సేవలను సైతం రైల్వే రద్దు చేసింది. కోస్తా జిల్లాలకు అనుసంధానంగా ఉండే విజయవాడ – నరసాపూర్ రైలు నెంబర్ 67258 క్యాన్సిల్ అయింది. నరసాపూర్ నుంచి రాజమండ్రి వెళ్లే రైలు నెంబర్ 67246 ప్రయాణాన్ని కూడా నిలిపివేశారు. రద్దు చేసిన సర్వీసులతో పాటు కొన్ని రైళ్ల సమయాల్లో భారీ మార్పులు చేశారు. ప్రతిరోజూ విజయవాడ నుంచి చెన్నై సెంట్రల్ వెళ్లే పినాకిని ఎక్స్‌ప్రెస్ రైలు నెంబర్ 12711 సమయాన్ని అధికారులు పునః షెడ్యూల్ చేశారు. వాస్తవానికి ఉదయం 06:10 గంటలకు బయలుదేరాల్సిన ఈ రైలు రెండు గంటలు ఆలస్యంగా అంటే ఉదయం 08:10 గంటలకు బయలుదేరుతుందని పీఆర్వో వివరించారు.
భయానక వర్షాలు ముంచెత్తుతున్న క్రమంలో దూరప్రాంతాలకు వెళ్లే కొన్ని రైళ్లను అధికారులు సురక్షిత మార్గాల్లోకి దారి మళ్లించారు. కేరళలోని తిరువనంతపురం సెంట్రల్ నుంచి దేశ రాజధాని న్యూఢిల్లీ వెళ్లే కేరళ ఎక్స్‌ప్రెస్ రైలు నెంబర్ 12625 సాధారణ రూట్ మార్చారు. బెంగళూరులోని సర్ ఎం. విశ్వేశ్వరయ్య టెర్మినల్ నుంచి ప్రతిరోజూ హతియా వెళ్లే ఎక్స్‌ప్రెస్ రైలు నెంబర్ 18638 మార్గాన్ని కూడా మార్చేశారు. ఈ రెండు ప్రతిష్టాత్మక రైళ్లు తమ రెగ్యులర్ రూట్‌ను వదిలేసి రేణిగుంట, యర్రగుంట్ల, నంద్యాల, గుంటూరు మీదుగా విజయవాడ చేరుకుని తమ గమ్యస్థానాలకు పయనిస్తాయని అధికారులు స్పష్టం చేశారు. ప్రయాణికులు ఇంటి నుంచి బయలుదేరే ముందే ఎన్టీఈఎస్ యాప్‌లో స్టేటస్ చెక్ చేసుకోవాలని కోరారు.
