భక్తులకు కళ్లుచెదిరే శుభవార్త.. ఇకపై ఆ గుడికి వెళ్లాలంటే జేబులోంచి రూ.1 తీయాల్సిన పనిలేదు! | ఆంధ్రప్రదేశ్ వార్తలు

తాజాగా పలమనేరు మండలం దేవలంపేటలో కొలువుదీరిన ప్రసిద్ధ శ్రీ వందన మల్లేశ్వర స్వామి భక్తుల కష్టాలను తీర్చేందుకు మురుగన్ దేవుడిలా ముందుకొచ్చారు. ఈ ప్రాచీన ఆలయానికి అమావాస్య, పౌర్ణమి, సోమవారాల్లో భక్తులు విశేషంగా తరలివస్తుంటారు. అయితే అక్కడికి వెళ్లేందుకు సరైన రవాణా సౌకర్యం లేక వృద్ధులు, మహిళలు తీవ్ర ఇబ్బందులు పడుతున్నారు. ఈ రవాణా సమస్యను కొంతమంది భక్తులు నేరుగా మురుగన్ దృష్టికి తీసుకెళ్లారు. ఆ భక్తుల కష్టాన్ని అర్థం చేసుకున్న ఆయన తక్షణమే స్పందించి, స్వామివారి దర్శనానికి వెళ్లేవారి కోసం తన సొంత ఖర్చులతో పూర్తి ఉచిత వాహన సౌకర్యాన్ని ఏర్పాటు చేయడానికి శ్రీకారం చుట్టారు.

వచ్చే వారం నుంచి ప్రతి సోమవారంతో పాటు పౌర్ణమి రోజుల్లో ఉచిత ఆటో సేవలు అందుబాటులోకి రానున్నాయి. పలమనేరు పట్టణంలోని సరస్వతి కేఫ్ ఎదురుగా ఉదయం నుంచి సాయంత్రం వరకు ఈ ఆటోలు భక్తుల కోసం నిరంతరాయంగా నడుస్తాయి. ఈ మేరకు ఇటీవల వందన మల్లేశ్వర స్వామిని దర్శించుకున్న మురుగన్‌కు ఆలయ కమిటీ సభ్యులు ఘన స్వాగతం పలికి తీర్థప్రసాదాలు అందించారు. గత మహాశివరాత్రి పర్వదినాన కూడా ఆయన సుమారు 15 ఉచిత ఆటోలను నడిపించి వేలాది మందికి దర్శన భాగ్యం కల్పించారని ఆలయ అర్చకులు ఈ సందర్భంగా గుర్తుచేశారు. ఆ రోజు మూగజీవాలకు పశుగ్రాసం అందించడం, రోజంతా అన్నదానం నిర్వహించడం ఎంతో అభినందనీయమని ప్రశంసించారు.