Last Updated:
Weather update: తెలుగు రాష్ట్రాల్లో వర్షాకాలం సీజన్ ప్రారంభమైనప్పటికీ ఆశించిన స్థాయిలో వర్షాలు కురవకపోవడంతో ప్రజలు తీవ్ర ఇబ్బందులు పడుతున్నారు.
గత కొన్ని రోజులుగా ఎండ తీవ్రత ఎక్కువగా ఉండటంతో పాటు గాలిలో తేమ శాతం పెరగడం వల్ల వేసవిని తలపించేలా తీవ్రమైన ఉక్కపోత (Humidity) కొనసాగుతోంది. సోమవారం కూడా వాతావరణంలో పెద్దగా మార్పులు ఉండకపోవచ్చని, ఇదే రకమైన పొడి వాతావరణం మరికొద్ది రోజులు కొనసాగుతుందని వాతావరణ నిపుణులు వెల్లడించారు.
తెలంగాణవ్యాప్తంగా వాతావరణం పొడిగా ఉండనుంది. ఆకాశం అప్పుడప్పుడు పాక్షికంగా మబ్బు పట్టి ఉన్నప్పటికీ, వర్షాలు పడే సూచనలు చాలా తక్కువగా ఉన్నాయి. రాజధాని హైదరాబాద్‌లో సోమవారం సాధారణ వాతావరణం ఉంటుంది. ఎండ తీవ్రతతో పాటు గాలిలో తేమ ఎక్కువగా ఉండటం వల్ల ఉదయం నుంచి రాత్రి వరకు తీవ్రమైన ఉక్కపోత వేధించనుంది. నగరంలో వర్షాలు పడే అవకాశం ప్రస్తుతానికి లేదు. గరిష్ట ఉష్ణోగ్రతలు 34 నుండి 35 డిగ్రీల సెల్సియస్ వరకు నమోదయ్యే అవకాశం ఉంది. ఉత్తర, మధ్య తెలంగాణ జిల్లాల్లో ఎండలు సాధారణం కంటే 2 నుండి 3 డిగ్రీలు ఎక్కువగా నమోదవుతున్నాయి. వర్షాలు లేకపోవడంతో ఖరీఫ్ సీజన్ ప్రారంభించిన రైతులు ఆందోళన చెందుతున్నారు.
ఆంధ్రప్రదేశ్‌లోని కోస్తాంధ్ర, రాయలసీమ ప్రాంతాల్లో కూడా ఇదే విధమైన పొడి వాతావరణం (Dry Weather) కొనసాగనుంది. విశాఖపట్నం, కాకినాడ, విజయవాడ, నెల్లూరు వంటి తీర ప్రాంతాల్లో సముద్రపు గాలుల వల్ల తేమ శాతం పెరిగి ఉక్కపోత అత్యధికంగా ఉంటుంది. ఉరుములతో కూడిన తాత్కాలిక చిరుజల్లులు మినహా ఎక్కడా భారీ వర్ష సూచన లేదు. కడప, అనంతపురం, కర్నూలు జిల్లాల్లో మధ్యాహ్నం వేళల్లో ఎండలు తీవ్రంగా ఉండనున్నాయి.
ప్రస్తుతం తెలుగు రాష్ట్రాల్లో వర్షాలు పడకపోవడానికి బంగాళాఖాతంలో ఎలాంటి అల్పపీడనాలు లేదా ద్రోణులు యాక్టివ్‌గా లేకపోవడమే ప్రధాన కారణమని వాతావరణ నిపుణులు తెలిపారు. అయితే, ఈ ఉక్కపోత నుంచి ప్రజలకు త్వరలోనే ఉపశమనం లభించనుంది.
ఈ నెల 16వ తేదీ (గురువారం) నుండి వాతావరణంలో కీలక మార్పులు రానున్నాయి. జులై 16 నుంచి 19 మధ్య వేడి వాతావరణం వల్ల వచ్చే తాత్కాలిక వానలు అక్కడక్కడా కురుస్తాయి. ఆ తర్వాత, అంటే జులై 19వ తేదీ నుంచి రుతుపవనాలు దేశవ్యాప్తంగా ఊపందుకుని, రెండు తెలుగు రాష్ట్రాల్లో విస్తారంగా వర్షాలు కురిసే అవకాశం ఉందని, అప్పటివరకు ఈ ఉక్కపోత భరించక తప్పదని అధికారులు స్పష్టం చేశారు.
Hyderabad,Telangana
