Last Updated:
Tamil Nadu: తమిళనాడు రాష్ట్రంలో అత్యంత దిగ్భ్రాంతికరమైన భద్రతా వైఫల్యం వెలుగుచూసింది.
పకడ్బందీ భద్రత మధ్య ఉండాల్సిన సబ్‌జైలు నుంచి ఒకేసారి ఏకంగా 17 మంది ఖైదీలు తప్పించుకుని పారిపోయిన ఉదంతం పోలీసు శాఖను ఉలిక్కిపడేలా చేసింది. సినిమా స్క్రిప్ట్‌ను తలపించేలా పక్కా స్కెచ్ వేసిన ఖైదీలు.. అనారోగ్యం పేరుతో నాటకమాడి జైలు సిబ్బందిని గదిలోకి రప్పించి, వారిపై విచక్షణారహితంగా దాడి చేసి పరారయ్యారు. తేని జిల్లాలో సోమవారం అర్ధరాత్రి చోటుచేసుకున్న ఈ జైలు బ్రేక్ ఘటన రాష్ట్రవ్యాప్తంగా పెను సంచలనం సృష్టిస్తోంది.
పోలీసులు వెల్లడించిన ప్రాథమిక సమాచారం ప్రకారం.. తేని జిల్లా పరిధిలోని సబ్‌జైలులో పలు కేసుల్లో రిమాండ్‌లో ఉన్న ఖైదీలను ప్రత్యేక బ్యారక్లలో ఉంచారు. సోమవారం అర్ధరాత్రి వేళ అంతా నిద్రపోతున్న సమయంలో ఒక సెల్‌లో ఉన్న ఖైదీలలో ఒకడు అకస్మాత్తుగా తీవ్ర అస్వస్థతకు గురైనట్లు, మూర్ఛ (ఫిట్స్) వచ్చినట్లు పెద్దగా కేకలు వేస్తూ గిలగిలా కొట్టుకున్నాడు. అతడితో ఉన్న మిగతా ఖైదీలు కూడా తోటి ఖైదీకి ప్రాణాపాయం సంభవించినట్లు నటిస్తూ జైలు సిబ్బందిని కాపాడాలంటూ కేకలు వేశారు.
ఖైదీ పరిస్థితి విషమించిందని నిజంగానే నమ్మిన జైలు వార్డర్లు, సెక్యూరిటీ సిబ్బంది ఆదరాబాదరాగా తాళాలు తీసి సెల్ లోపలికి ప్రవేశించారు. సిబ్బంది లోపలికి అడుగుపెట్టడమే ఆలస్యం.. అప్పటివరకు అనారోగ్యంతో ఉన్నట్లు నటించిన ఖైదీతో పాటు మిగిలిన వారంతా ఒక్కసారిగా సిబ్బందిపై విరుచుకుపడ్డారు. జైలు సిబ్బంది తేరుకునేలోపే వారిపై భౌతిక దాడికి పాల్పడి, తీవ్రంగా కొట్టి బంధించారు. అనంతరం తాళాలు లాక్కుని ప్రధాన ద్వారాల వైపు పరుగులు తీసి, మొత్తం 17 మంది ఖైదీలు గోడలు దూకి చీకట్లోకి పరారయ్యారు.
ఖైదీల దాడిలో గాయపడిన జైలు సిబ్బందిని అత్యవసర చికిత్స నిమిత్తం సమీపంలోని ప్రభుత్వ ఆసుపత్రికి తరలించారు. ఖైదీలు జైలు వెనుక భాగంలో దట్టంగా విస్తరించి ఉన్న అటవీ ప్రాంతంలోకి ప్రవేశించినట్లు అధికారులు భావిస్తున్నారు. ఈ సమాచారం అందుకున్న వెంటనే జిల్లా పోలీసు యంత్రాంగం అప్రమత్తమై రంగంలోకి దిగింది. ఉన్నతాధికారులు ఘటనా స్థలానికి చేరుకుని భద్రతా ఏర్పాట్లను సమీక్షించారు.
ఒకేసారి 17 మంది తప్పించుకోవడంతో పోలీసులు యుద్ధప్రాతిపదికన కూంబింగ్ ప్రారంభించారు. తేని నుంచి పక్కనే ఉన్న దిండిగల్ జిల్లా సరిహద్దుల వరకు విస్తృతంగా హైఅలర్ట్ ప్రకటించారు. ఖైదీలు ఇతర ప్రాంతాలకు లేదా పొరుగు రాష్ట్రాలకు పారిపోకుండా ఉండేందుకు ప్రధాన మార్గాలు, జాతీయ రహదారులపై దాదాపు 16 ప్రత్యేక చెక్‌పోస్టులు ఏర్పాటు చేశారు. ప్రతి వాహనాన్ని క్షుణ్ణంగా తనిఖీ చేస్తున్నారు. అటవీ ప్రాంతంలోకి ప్రత్యేక పోలీసు బలగాలను, డాగ్ స్క్వాడ్‌లను రంగంలోకి దించి జల్లెడ పడుతున్నారు.
పోలీసుల ముమ్మర గాలింపు చర్యల ఫలితంగా పరారైన 17 మందిలో ఒక ఖైదీని మంగళవారం ఉదయానికి పోలీసులు చాకచక్యంగా పట్టుకుని తిరిగి అరెస్ట్ చేశారు. మిగిలిన 16 మంది ఖైదీల ఆచూకీ కోసం గాలింపు ముమ్మరంగా సాగుతోంది. భద్రతా లోపాలపై సమగ్ర విచారణకు ఉన్నతాధికారులు ఆదేశించారు.
