Last Updated:
Seemantham: గర్భిణులకు సీమంతం 5, 7 లేదా 9వ నెలల్లో ఏది బెస్ట్? తల్లి, బిడ్డ ఆరోగ్యానికి భద్రతనిస్తూ శాస్త్రం, మెడికల్ సైన్స్ ఏం చెబుతుందో ఇప్పుడు చూద్దాం..
హిందూ సంస్కృతిలో గర్భవతిగా ఉన్న స్త్రీకి చేసే పదహారు సంస్కారాలలో సీమంతం ఒకటి. గర్భంలో పెరుగుతున్న బిడ్డకు, తల్లికి శారీరక, మానసిక ఉల్లాసాన్ని అందించడం ఈ వేడుక ప్రధాన ఉద్దేశం. అయితే సీమంతం ఏ నెలలో చేస్తే శుభకరం? ఏ నెలలో చేస్తే గర్భిణీకి, బిడ్డకు పూర్తి భద్రత లభిస్తుంది? అనే సందేహాలు చాలామందికి ఉంటాయి. శాస్త్ర నియమాలు, వైద్య నిపుణుల సలహాల ప్రకారం సీమంతం చేయడానికి అత్యంత అనుకూలమైన సమయాల పూర్తి వివరాలను ప్రముఖ జ్యోతిష్య నిపుణులు ప్రశాంత్ స్పష్టంగా వివరించారు. ఆ పక్కా సమాచారం ఇప్పుడు క్లియర్ గా తెలుసుకుందాం.
1. శాస్త్రం ప్రకారం ఏ నెలలో చేయాలి? మన ధర్మశాస్త్రాలు, పండితుల సూచనల ప్రకారం సీమంతం చేయడానికి కొన్ని ప్రత్యేక నెలలను పవిత్రమైనవిగా పరిగణిస్తారని ప్రశాంత్ తెలిపారు.
7వ నెల: అత్యధిక శాతం ఇళ్లల్లో సీమంతం చేయడానికి 7వ నెల అత్యంత శుభకరమైనదిగా భావిస్తారు. ఈ సమయంలో గర్భంలో బిడ్డ అవయవ నిర్మాణం పూర్తికావడంతో పాటు తల్లి ఆరోగ్యం కూడా స్థిరంగా ఉంటుంది.
5వ నెల: కొన్ని ప్రాంతాల సాంప్రదాయాల ప్రకారం 5వ నెలలో కూడా శ్రీమంతం లేదా గాజుల వేడుక నిర్వహిస్తుంటారు.
9వ నెల: 7వ నెలలో అనుకూలించని వారు 9వ నెల ప్రారంభంలో (ప్రసవానికి కాస్త ముందు) సీమంతం జరుపుకుంటారని ప్రశాంత్ పేర్కొన్నారు.
2. వైద్య నిపుణుల విశ్లేషణ – 7వ నెల ఎందుకు బెస్ట్? కేవలం శాస్త్రం మాత్రమే కాకుండా.. గైనకాలజిస్టులు కూడా 7వ నెలను సీమంతానికి సరైన సమయంగా సూచిస్తున్నారు. మొదటి మూడు నాలుగు నెలల్లో ఉండే వాంతులు, అలసట, నీరసం 7వ నెల నాటికి తగ్గుతాయి. తల్లి చురుగ్గా ఉండి వేడుకను ఆస్వాదించగలుగుతుంది. 9వ నెల దాటితే కాన్పు సమయం దగ్గరపడటం వల్ల ప్రయాణాలు చేయడం, ఎక్కువ సేపు కూర్చోవడం కష్టమవుతుంది. 7వ నెలలో అయితే పుట్టింటికి వెళ్లడానికి, ప్రయాణాలు చేయడానికి ఎలాంటి ఇబ్బందులు ఉండవు.
7వ నెల నుండి గర్భంలో ఉన్న బిడ్డకు బయటి శబ్దాలు, సంగీతం, స్పర్శ స్పష్టంగా తెలుస్తాయి. ఈ సమయంలో నిర్వహించే వేడుక, మంగళ వాయిద్యాలు, బంధువుల ఆశీర్వచనాలు బిడ్డ మానసిక వికాసానికి ఎంతో దోహదపడతాయని జ్యోతిష్య నిపుణులు ప్రశాంత్ వివరించారు.
3. సీమంతం చేయడానికి అనుకూలమైన రోజులు – సమయం… తిథుల విషయానికి వస్తే తదియ, పంచమి, సప్తమి, దశమి, ఏకాదశి, త్రయోదశి తిథులు సీమంతానికి చాలా మంచివి. వారాలు అయితే బుధవారం, గురువారం, శుక్రవారం రోజులలో సుముహూర్తం చూసుకుని ఈ వేడుకను జరుపుకోవడం శుభ పరిణామం. విశాఖ, శ్రవణం, రోహిణి, మృగశిర, హస్త, ఉత్తర, ఉత్తరాషాఢ, ఉత్తరాభాద్ర నక్షత్రాలలో సీమంతం ముహూర్తం నిర్ణయించడం విశేషమైన ఫలితాలను ఇస్తుందని ప్రశాంత్ స్పష్టం చేశారు.
తల్లి సంతోషమే ప్రథమ కర్తవ్యం… గర్భవతిగా ఉన్న స్త్రీ మనస్సు ప్రశాంతంగా, సంతోషంగా ఉండటమే సీమంతం అసలైన లక్ష్యం. కాబట్టి గర్భిణీ ఆరోగ్య పరిస్థితిని బట్టి, వైద్యుల సలహాలు తీసుకుని 7వ నెలలో మంచి ముహూర్తాన ఈ వేడుకను జరుపుకోవడం వంద శాతం శ్రేయస్కరం అని జ్యోతిష్య నిపుణులు ప్రశాంత్ సూచిస్తున్నారు.
Location :
Hyderabad,Telangana
