Last Updated:
PM Modi: మధ్యప్రదేశ్‌లోని గ్వాలియర్ సమీపంలో శీత్లా మాత ఆలయం వద్ద చోటుచేసుకున్న ఘోర రోడ్డు ప్రమాదంపై ప్రధానమంత్రి నరేంద్ర మోదీ తీవ్ర విచారం వ్యక్తం చేశారు.
ఆదివారం తెల్లవారుజామున ఆలయం వద్ద వేచి ఉన్న భక్తులపైకి అనియంత్రిత లారీ దూసుకెళ్లిన దుర్ఘటనలో 13 మంది మృతి చెందగా, సుమారు 40 మంది తీవ్రంగా గాయపడిన విషయం తెలిసిందే. ఈ విషాద ఘటనపై ప్రధాని మోదీ సామాజిక మాధ్యమం ‘ఎక్స్’ వేదికగా స్పందిస్తూ సంతాపం తెలిపారు. “మధ్యప్రదేశ్‌లోని గ్వాలియర్‌లో జరిగిన ప్రమాదంలో అమాయక భక్తులు ప్రాణాలు కోల్పోవడం నన్ను తీవ్రంగా కలచివేసింది. మృతుల కుటుంబాలకు నా ప్రగాఢ సానుభూతి తెలియజేస్తున్నాను. ఈ ప్రమాదంలో గాయపడిన వారు త్వరగా కోలుకోవాలని ప్రార్థిస్తున్నాను” అని ప్రధాని పేర్కొన్నారు.
ఈ మేరకు బాధితులకు ఆర్థిక సహాయాన్ని కూడా ప్రధాని ప్రకటించారు. ప్రధానమంత్రి జాతీయ సహాయ నిధి (PMNRF) నుంచి మరణించిన వారి కుటుంబాలకు ₹2 లక్షల చొప్పున, అలాగే గాయపడిన వారికి ₹50,000 చొప్పున ఎక్స్‌గ్రేషియా (పరిహారం) అందజేయనున్నట్లు వెల్లడించారు. బాధితులకు తగిన వైద్య సహాయం అందేలా రాష్ట్ర ప్రభుత్వం అన్ని చర్యలు తీసుకుంటోందని అధికార వర్గాలు తెలిపాయి.
Distressed to learn about the loss of lives due to a mishap in Gwalior, Madhya Pradesh. My condolences to the bereaved families. Praying for the speedy recovery of the injured.
An ex-gratia of Rs. 2 lakh from PMNRF would be given to the next of kin of each of those who lost their lives. The injured would be given Rs. 50,000: PM @narendramodi— PMO India (@PMOIndia) October 18, 2026
నవరాత్రి రద్దీ దృష్ట్యా పోలీసు చెక్‌పోస్టులు, స్టాపర్లు ఏర్పాటు చేసి భారీ వాహనాలను నిషేధించినప్పటికీ, ఆ లారీ లోపలికి ఎలా ప్రవేశించిందనే అంశంపై ఉన్నత స్థాయి విచారణకు ఆదేశించారు. లారీలో సాంకేతిక లోపం తలెత్తిందా లేక బ్రేకులు ఫెయిల్ అయ్యాయా అనే విషయాన్ని తేల్చేందుకు ఆర్టీవో (RTO) సాంకేతిక బృందాన్ని రప్పించి వాహనాన్ని తనిఖీ చేయిస్తున్నారు. ప్రమాద స్థలంలో భక్తుల హాహాకారాలతో తీవ్ర గందరగోళ పరిస్థితి నెలకొంది.
