Last Updated:
కార్తీక్ వర్మ దండు దర్శకత్వంలో నాగచైతన్య నటిస్తున్న తాజా చిత్రం ‘వృషకర్మ’ (వృషాకర్మ). తాజాగా ఈ సినిమాకు సంబంధించిన థియేట్రికల్ బిజినెస్ వివరాలు బయటకొచ్చాయి.
‘తండేల్’ సినిమాతో అక్కినేని నాగచైతన్య కెరీర్ సరికొత్త మలుపు తిరిగింది. భారీ అంచనాల నడుమ విడుదలైన ఈ సినిమాతో బాక్సాఫీస్ వద్ద ఘన విజయాన్ని అందుకున్న చైతన్య, అదే జోష్‌లో తన తదుపరి చిత్రాన్ని ప్రేక్షకుల ముందుకు తీసుకురావడానికి సన్నాహాలు చేస్తున్నారు. ‘విరూపాక్ష’ లాంటి బ్లాక్ బస్టర్ మిస్టిక్ థ్రిల్లర్‌ను అందించిన టాలెంటెడ్ డైరెక్టర్ కార్తీక్ వర్మ దండు దర్శకత్వంలో నాగచైతన్య నటిస్తున్న తాజా చిత్రం ‘వృషకర్మ’ (Vrushakarma). పూర్తి స్థాయి మిస్టరీ, అతీంద్రియ అంశాలతో అత్యంత ప్రతిష్టాత్మకంగా ఈ థ్రిల్లర్ మూవీ తెరకెక్కుతోంది. ఇప్పటికే విడుదలైన ఫస్ట్ లుక్ పోస్టర్లు, సినిమా కాన్సెప్ట్ వీడియోలు ప్రేక్షకుల్లో విపరీతమైన ఆసక్తిని రేకెత్తించాయి.
ఈ సినిమా కంటెంట్ పై ఉన్న నమ్మకంతో ట్రేడ్ వర్గాల్లో క్రేజ్ అమాంతం పెరిగిపోయింది. తాజాగా ఈ సినిమా పంపిణీ హక్కులకు సంబంధించి ఫిల్మ్ నగర్‌లో ఓ క్రేజీ న్యూస్ వైరల్ అవుతోంది. ప్రముఖ అగ్ర నిర్మాత దిల్ రాజుకు చెందిన శ్రీ వెంకటేశ్వర క్రియేషన్స్ (SVC Releases) సంస్థ ‘వృషకర్మ’ పంపిణీ హక్కులను భారీ ధరకు సొంతం చేసుకున్నట్లు చిత్రబృందం అధికారికంగా ప్రకటించింది. ట్రేడ్ వర్గాల సమాచారం ప్రకారం, ఈ థియేట్రికల్ రైట్స్ కోసం దిల్ రాజు ఏకంగా రూ.45 కోట్లు వెచ్చించినట్లు తెలుస్తోంది. ఇందులో రూ.40 కోట్లు నాన్-రిఫండబుల్ మొత్తంగా డీల్ కుదిరినట్లు టాక్ వినిపిస్తోంది. ఇదే గనుక నిజమైతే, నాగచైతన్య సినీ కెరీర్‌లోనే అత్యధిక ధరకు అమ్ముడైన థియేట్రికల్ బిజినెస్‌గా ఇది రికార్డు సృష్టిస్తుంది. థియేట్రికల్ హక్కులతో పాటే డిజిటల్, శాటిలైట్ హక్కులు కూడా అగ్రశ్రేణి ఓటీటీ సంస్థకు కళ్లుచెదిరే ధరకు అమ్ముడుపోయినట్లు సమాచారం.
శ్రీ వెంకటేశ్వర సినీ చిత్ర (SVCC) బ్యానర్‌పై ప్రముఖ నిర్మాత బి.వి.ఎస్.ఎన్ ప్రసాద్ ఈ చిత్రాన్ని అత్యంత భారీ బడ్జెట్‌తో నిర్మిస్తున్నారు. క్రియేటివ్ డైరెక్టర్ సుకుమార్‌కు చెందిన ‘సుకుమార్ రైటింగ్స్’ ఈ ప్రాజెక్టుకు భాగస్వామిగా వ్యవహరిస్తుండగా, బాపినీడు సమర్పకుడిగా ఉన్నారు. ‘కాంతార’, ‘విరూపాక్ష’ ఫేమ్ అజనీష్ లోక్‌నాథ్ ఈ సస్పెన్స్ థ్రిల్లర్‌కు సంగీతం అందిస్తుండటం సినిమాపై అంచనాలను మరింత పెంచుతోంది. ఇందులో చైతన్య సరసన గుంటూరు కారం బ్యూటీ మీనాక్షి చౌదరి కథానాయికగా నటిస్తుండగా, బాలీవుడ్ నటుడు స్పర్శ్ శ్రీవాస్తవ పవర్ ఫుల్ విలన్ పాత్రలో కనిపించనున్నారు. ప్రస్తుతం క్లైమాక్స్ షూటింగ్ దశలో ఉన్న ఈ చిత్రం, శరవేగంగా పోస్ట్ ప్రొడక్షన్ పనులను కూడా జరుపుకుంటోంది. డిసెంబర్ 4, 2026న ఈ చిత్రాన్ని ప్రపంచవ్యాప్తంగా గ్రాండ్‌గా విడుదల చేయాలని మేకర్స్ సన్నాహాలు చేస్తున్నారు.
