మీరు తీసుకున్న లోన్ మాటేమిటి? అది రద్దవుతుందా?
దొంగతనం జరిగినంత మాత్రాన మీ పేరు మీద ఉన్న లోన్ దానంతట అదే రద్దు కాదని గుర్తుంచుకోండి. మీరు తీసుకున్న రుణం, దానికి పూచీకత్తుగా పెట్టిన బంగారం.. ఈ రెండూ వేర్వేరు ఒప్పంద బాధ్యతలు. అంటే, బ్యాంకు మీ బంగారాన్ని పోగొట్టుకున్నప్పటికీ, మీరు తీసుకున్న అప్పు బాధ్యత అలాగే ఉంటుంది. అయితే, దానికి బదులుగా బ్యాంకు మీకు చెల్లించే పరిహారం లేదా బీమా సంస్థ ఇచ్చే మొత్తాన్ని.. మీరు కట్టాల్సిన లోన్ బకాయికి ఎలా సర్దుబాటు చేస్తున్నారు అనే దానిపై బ్యాంకు నుండి రాతపూర్వక నిర్ధారణ అడగండి. ఆస్తి పోయింది కాబట్టి అప్పు తీరిపోయిందని పొరబడకండి, దాన్ని చట్టబద్ధంగా సెటిల్ చేసుకోవాలి. రుణం చెల్లించకపోవడం వల్ల బ్యాంకు వారు మీ ఆభరణాలను జప్తు చేసి కోల్పోవడానికి, దొంగల పాలై కోల్పోవడానికి మధ్య ఉన్న స్పష్టమైన వ్యత్యాసాన్ని రుణగ్రహీతలు గ్రహించాలి. ఒకవేళ మీరు తీసుకున్న అప్పును వడ్డీతో సహా తిరిగి చెల్లించడంలో విఫలమైతే, మీ బంగారాన్ని వేలం వేసే హక్కు బ్యాంకుకు ఉంటుంది. కానీ, ఆర్బీఐ నిబంధనల ప్రకారం ఆ వేలం ప్రక్రియ కూడా అత్యంత పారదర్శకంగా జరగాలి మరియు మీకు ముందుగానే నోటీసులు పంపాలి. ఒకవేళ వేలంలో మీ బాకీ కంటే ఎక్కువ డబ్బులు వస్తే, ఆ మిగులు మొత్తాన్ని మీకు తిరిగి ఇచ్చేయాలి. కానీ దొంగతనం అనేది పూర్తిగా భద్రతా వైఫల్యం, దీనికి వందశాతం రుణదాతదే బాధ్యత.
