ఒకవేళ బ్యాంకు బంగారం ఇవ్వడానికి నిరాకరిస్తే ఏం చేయాలి?
గోల్డ్ లోన్ పూర్తిగా చెల్లించిన తర్వాత కూడా బ్యాంకు మీ ఆభరణాలను తిరిగి ఇవ్వకపోతే, ముందుగా ఆందోళన చెందకుండా దానికి గల స్పష్టమైన కారణాలను లిఖితపూర్వకంగా వివరించమని బ్యాంకు యాజమాన్యాన్ని కోరాలి. ఏ అప్పు బకాయి కింద, ఏ నిబంధన ప్రకారం (Lien or Set-off clause) బంగారాన్ని నిలిపివేశారో తెలిపే వివరాలను సేకరించాలి. ఒకవేళ బ్యాంకు ఇచ్చే వివరణ సహేతుకంగా లేకపోతే, మొదట సదరు బ్యాంకులోని ‘ఫిర్యాదుల పరిష్కార విభాగాన్ని’ (Grievance Redressal Mechanism) ఆశ్రయించాలి. అధిల్ శెట్టి తెలిపిన వివరాల ప్రకారం, ఫిర్యాదు చేసిన 30 రోజుల్లోగా బ్యాంకు నుండి సరైన స్పందన రాకపోయినా, లేదా వారి సమాధానం సంతృప్తికరంగా లేకపోయినా, కస్టమర్లు నేరుగా ‘ఆర్‌బిఐ ఇంటిగ్రేటెడ్ ఓంబుడ్స్‌మన్ పథకాన్ని’ (RBI Integrated Ombudsman Scheme) ఆశ్రయించవచ్చు. ఈ ప్రక్రియలో లోన్ క్లోజర్ స్టేట్‌మెంట్, నిధులు చెల్లించినట్లు ఉన్న రశీదులు, తాకట్టు రశీదు మరియు బ్యాంకుతో జరిపిన ఉత్తర ప్రత్యుత్తరాలన్నింటినీ భద్రంగా ఉంచుకోవడం చాలా ముఖ్యమని అమిత్‌రాజ్ కౌశల్ సూచించారు. నియంత్రణ సంస్థలకు ఫిర్యాదు చేసే సమయంలో ఈ ఆధారాలు కీలకమైన పాత్ర పోషిస్తాయి.
