Last Updated:
గత ఏడాది కరూర్లో జరిగిన తొక్కిసలాటలో 41 మంది మృతి చెందిన ఘటనపై తమిళనాడు సీఎం విజయ్ మరోసారి స్పందించారు. పోలీసుల పాత్రపై ప్రశ్నలు లేవనెత్తడంతో పాటు, డీఎంకే ప్రభుత్వం ఈ విషాదాన్ని రాజకీయాలకు ఉపయోగించుకుందని ఆరోపించారు.
గత ఏడాది కరూర్లో జరిగిన ఘోర తొక్కిసలాటలో 41 మంది ప్రాణాలు కోల్పోయిన ఘటన తర్వాత తొలిసారిగా శుక్రవారం అక్కడికి వెళ్లిన తమిళనాడు ముఖ్యమంత్రి విజయ్ ఆ విషాద ఘటనపై మరోసారి వివాదాస్పద వ్యాఖ్యలు చేశారు. ఈ ఘటనలో పోలీసుల పాత్రపై ప్రశ్నలు లేవనెత్తడంతో పాటు, అధికార డీఎంకే ప్రభుత్వం ఈ విషాదాన్ని రాజకీయ ప్రయోజనాల కోసం ఉపయోగించుకుందని ఆరోపించారు.
కరూర్లో నిర్వహించిన బహిరంగ సభలో టీవీకే (TVK) అధినేత విజయ్ మాట్లాడుతూ, ఆ ఘటన ఇప్పటికీ తనను తీవ్రంగా కలిచివేస్తోందని చెప్పారు. తొక్కిసలాట ఘటనకు సంబంధించిన అనేక ప్రశ్నలకు ఇప్పటికీ సమాధానాలు లభించలేదని అన్నారు. అధికారుల పేర్లు ప్రస్తావించకుండా, ఆ రోజు పోలీసులపై ఒత్తిడి ఉన్నట్లు సంకేతాలు ఇచ్చారు. అలాగే, ఈ ఘటనకు తమ పార్టీనే బాధ్యురాలిగా చూపించే ప్రయత్నం డీఎంకే చేసిందని విమర్శించారు.
తొక్కిసలాట జరిగే పరిస్థితులు కనిపించిన వెంటనే సమావేశాన్ని రద్దు చేసే పూర్తి అధికారం పోలీసులకు ఉందని విజయ్ పేర్కొన్నారు. “నామక్కల్ కార్యక్రమం పూర్తయ్యాక కరూర్ పోలీసులు మాకు ముందుగానే సమాచారం ఇవ్వొచ్చు. జనసమ్మర్థం ఎక్కువగా ఉందని చెప్పి సమావేశాన్ని రద్దు చేయొచ్చు. అలా చేసే హక్కు వారికి పూర్తిగా ఉంది,” అని అన్నారు. అయితే, ఆ రోజు పోలీసులు అలాంటి చర్యలు తీసుకోలేదని ఆరోపించారు. “ఆ రోజు వారు ఏమీ చేయలేదు. పైగా సమావేశం కొనసాగేందుకు సహకరించారు. అప్పుడే ఏదో తేడా ఉందని నేను గుర్తించాల్సింది,” అని విజయ్ వ్యాఖ్యానించారు.
ఈ సందర్భంగా ఘటన జరిగిన రోజు ఆదేశాలు ఎవరు ఇచ్చారు? పోలీసులపై ఒత్తిడి ఎవరు తీసుకొచ్చారు? అసలు బాధ్యత ఎవరిది? అంటూ విజయ్ వరుస ప్రశ్నలు సంధించారు. ఈ ఘటనలో అమాయక చిన్నారులు, మహిళలు సహా పలువురు ప్రాణాలు కోల్పోయారని గుర్తు చేశారు. అంతేకాకుండా, మాజీ ముఖ్యమంత్రి ఎంకే స్టాలిన్, డీఎంకే నేతలు ఈ ఘటనకు తమ పార్టీనే కారణమని ప్రచారం చేస్తున్నారని ఆరోపించారు. “స్టాలిన్ గారు ఈ విషయంలో రాజకీయాలు చేస్తున్నారు. ఈ ఘటనకు మమ్మల్నే బాధ్యులుగా చూపించే ప్రయత్నం చేస్తున్నారు,” అని విజయ్ అన్నారు.
“నేను పారిపోలేదు” తొక్కిసలాట జరిగిన తర్వాత తాను అక్కడి నుంచి పారిపోయానని ప్రత్యర్థులు చేసిన ఆరోపణలను విజయ్ ఖండించారు. “నేను అక్కడి నుంచి పారిపోయానని కొందరు ప్రచారం చేశారు. కానీ ప్రజలకు సేవ చేయడానికే నేను రాజకీయాల్లోకి వచ్చాను. ఈ రాష్ట్ర ప్రజలను వదిలి నేను ఎప్పటికీ పారిపోను,” అని స్పష్టం చేశారు.
కరూర్ తొక్కిసలాట ఘటన నిర్వహణలో పోలీసుల వైఫల్యం ఉందని, అలాగే ఆ రోజు జరిగిన పరిణామాల వెనుక రాజకీయ ఆదేశాలు కూడా ఉండొచ్చని విజయ్ చేసిన ఈ వ్యాఖ్యలు తమిళనాడు రాజకీయాల్లో మరోసారి చర్చనీయాంశంగా మారాయి.
Click here to add News18 as your preferred news source on Google. బ్రేకింగ్ న్యూస్, రాజకీయాలు, దేశంలోని అన్ని రాష్ట్రాల్లోని ముఖ్యమైన వార్తలు, విశ్లేషణ, కేంద్ర ప్రభుత్వ పథకాలకు సంబంధించిన స్టోరీలను న్యూస్18 తెలుగు నేషనల్ కేటగిరీలో చదవండి. మరిన్ని వార్తల కోసం న్యూస్ 18 తెలుగు ఫాలో అవండి.
Hyderabad,Telangana
