Last Updated:
లోక్‌సభ ప్రతిపక్ష నేత రాహుల్ గాంధీ శనివారం హైదరాబాద్‌లో పర్యటించనున్నారు. ఉదయం జయభేరి గ్రౌండ్‌లో గిగ్ వర్కర్ల సంక్షేమ పథకాన్ని ప్రారంభించి, మధ్యాహ్నం నోవోటెల్ వేదికగా భారత్ సమ్మిట్ ముగింపు సమావేశంలో ప్రసంగిస్తారు.
లోక్‌సభ ప్రధాన ప్రతిపక్ష నేత రాహుల్ గాంధీ శనివారం నవంబర్ 14న హైదరాబాద్‌లో పర్యటించనున్నారు. ముఖ్యమంత్రి రేవంత్ రెడ్డి నేతృత్వంలోని తెలంగాణ ప్రభుత్వం ప్రతిష్టాత్మకంగా నిర్వహిస్తున్న అంతర్జాతీయ ‘భారత్ సమ్మిట్-2026’ తో పాటు గిగ్ వర్కర్ల సంక్షేమ కార్యక్రమంలో ఆయన పాల్గొంటారు. ముందుగా ఉదయం 10:30 గంటలకు హైటెక్ సిటీలోని జయభేరి గ్రౌండ్‌లో ఏర్పాటు చేసిన సభలో తెలంగాణ గిగ్ వర్కర్ల సామాజిక భద్రత, సంక్షేమ పథకాన్ని రాహుల్ గాంధీ లాంఛనంగా ప్రారంభిస్తారు.
అనంతరం మధ్యాహ్నం 2:30 గంటలకు మాదాపూర్‌లోని నోవోటెల్ (హెచ్ఐసీసీ) వేదికగా జరిగే భారత్ సమ్మిట్ ముగింపు సమావేశంలో ఆయన కీలక ఉపన్యాసం చేయనున్నారు. దాదాపు 70 దేశాల నుంచి వచ్చిన వెయ్యి మంది ప్రతినిధులను ఉద్దేశించి ప్రసంగించనున్న రాహుల్, విదేశాంగ విధానంలో ప్రజాస్వామ్య విలువలు, మారుతున్న ప్రపంచ క్రమంపై దిశానిర్దేశం చేయనున్నారు.
రాష్ట్రంలోని సుమారు ఆరు లక్షల మంది గిగ్, ప్లాట్‌ఫారమ్ కార్మికుల కోసం తెలంగాణ ప్రభుత్వం రూపొందించిన నూతన సంక్షేమ చట్టం నిబంధనలను రాహుల్ గాంధీ ఆవిష్కరిస్తారు. శిల్పకళా వేదిక నుంచి నిర్వహించే గిగ్ వర్కర్ల ర్యాలీలోనూ ఆయన పాల్గొని, భారత్ జోడో యాత్రలో ఇచ్చిన హామీ మేరకు కార్మికులతో ముఖాముఖి మాట్లాడనున్నారు.
రాహుల్ గాంధీ పర్యటన, అలాగే నవంబర్ 15న కేంద్ర రక్షణ మంత్రి రాజ్‌నాథ్ సింగ్ హైటెక్స్ పర్యటన నేపథ్యంలో సైబరాబాద్ పోలీసులు కట్టుదిట్టమైన భద్రతా ఏర్పాట్లు చేశారు. నవంబర్ 13 రాత్రి 7 గంటల నుంచి నవంబర్ 15 సాయంత్రం 6 గంటల వరకు మాదాపూర్ పోలీస్ స్టేషన్ పరిధిలో డ్రోన్లు, పారాగ్లైడర్లు, మైక్రోలైట్ విమానాల ఎగురవేతను నిషేధిస్తూ సీపీ డాక్టర్ ఎం. రమేష్ ఉత్తర్వులు జారీ చేశారు.
