Last Updated:
కోల్‌కతా నుంచి ముంబై వెళ్లాల్సిన ఎయిరిండియా విమానంలో హైజాక్ బెదిరింపు కలకలం రేపింది. దీంతో 93 మంది ప్రయాణికులు, ఐదుగురు సిబ్బంది ఉన్న విమానాన్ని టేకాఫ్‌కు ముందే నిలిపివేసి ఐసోలేషన్ ప్రాంతానికి తరలించారు. అసలు ఆ బెదిరింపు సందేశం ఎవరు రాశారు? అధికారులు ఏం చర్యలు తీసుకున్నారు?
పశ్చిమ బెంగాల్‌లోని కోల్‌కతా విమానాశ్రయంలో బుధవారం ఉదయం కలకలం చోటుచేసుకుంది. కోల్‌కతా నుంచి ముంబై వెళ్లేందుకు సిద్ధమైన ఎయిరిండియా విమానంలో హైజాక్ బెదిరింపు సందేశం కనిపించడం ఆందోళనకు దారితీసింది. విమానం టాయిలెట్‌లోని అద్దంపై ఈ హెచ్చరిక రాసి ఉండటాన్ని సిబ్బంది గుర్తించారు. దీంతో అప్రమత్తమైన అధికారులు విమానం టేకాఫ్‌ను నిలిపివేసి, భద్రతా చర్యలు చేపట్టారు. విమానంలో మొత్తం 93 మంది ప్రయాణికులతో పాటు ఐదుగురు సిబ్బంది ఉన్నట్లు సమాచారం.
#BreakingNews | Air India flight AI 772 has been moved to an isolation bay following a suspected hijack threat
UPDATE: Passengers evacuated from Air India flight AI 772. News18’s Anoop, @shawansen, @KamalikaSengupt with details https://t.co/x67p8GtkIj— News18 (@CNNnews18) November 11, 2026
కోల్‌కతాలోని నేతాజీ సుభాష్ చంద్రబోస్ అంతర్జాతీయ విమానాశ్రయం నుంచి ముంబై వెళ్లాల్సిన ఎయిరిండియా విమానం AI 772 బుధవారం ఉదయం బయలుదేరేందుకు సిద్ధమైంది. విమానం టేకాఫ్‌కు ముందు తనిఖీలు జరుగుతున్న సమయంలో ఓ టాయిలెట్ అద్దంపై హైజాక్ చేస్తామంటూ రాసిన సందేశాన్ని గుర్తించినట్లు సమాచారం. ఆ నోట్‌లో ఉదయం 11.10 గంటలకు విమానాన్ని హైజాక్ చేస్తామని పేర్కొన్నట్లు కోల్‌కతా విమానాశ్రయ డైరెక్టర్ విక్రమ్ సింగ్ వెల్లడించారు.
ఈ బెదిరింపు విషయం తెలిసిన వెంటనే పైలట్ ఎయిర్ ట్రాఫిక్ కంట్రోల్ (ఏటీసీ)కి సమాచారం అందించారు. దీంతో విమానాశ్రయ అధికారులు వెంటనే స్పందించారు. షెడ్యూల్ ప్రకారం విమానం ఉదయం 10.20 గంటలకు ముంబైకి బయలుదేరాల్సి ఉంది. అయితే భద్రతా కారణాలతో టేకాఫ్‌ను నిలిపివేశారు.
అధికారులు విమానాన్ని సాధారణ పార్కింగ్ ప్రాంతం నుంచి దూరంగా ఉన్న ఐసోలేషన్ బేకు తరలించారు. అనంతరం అందులోని ప్రయాణికులను కిందకు దించి, విమానంలో క్షుణ్ణంగా తనిఖీలు ప్రారంభించారు. కేంద్ర పారిశ్రామిక భద్రతా దళం (సీఐఎస్ఎఫ్), విమానాశ్రయ భద్రతా సిబ్బంది విమానం చుట్టూ మోహరించారు. అనుమానాస్పద వస్తువులు ఏమైనా ఉన్నాయా అనే కోణంలో ప్రతి భాగాన్ని పరిశీలించారు.
ఈ సందేశం ఎవరు రాశారు? దీని వెనుక ఎవరైనా ఉన్నారా? లేక సాంకేతిక కారణంతో హెచ్చరిక వచ్చిందా? అనే అంశాలపై పోలీసులు, భద్రతా సంస్థలు దర్యాప్తు చేపట్టాయి. విమానంలో ఎలాంటి అనుమానాస్పద వస్తువులు ఉన్నాయనే విషయాన్ని తనిఖీల ద్వారా నిర్ధారించే ప్రయత్నం చేశారు. ఈ ఘటనతో విమానాశ్రయంలో కొంతసేపు ఆందోళన నెలకొంది. ఘటనపై ఎయిరిండియా నుంచి అధికారిక ప్రకటన వెలువడలేదు. దర్యాప్తు వివరాలు, తనిఖీల ఫలితాలపై మరింత సమాచారం తెలియాల్సి ఉంది.
