Last Updated:
అటుకులు తేలికగా ఉండటంతో పాటు త్వరగా వంట కూడా అవుతాయి. వేరుశెనగలు, ఉల్లిపాయలు, పచ్చిమిర్చి, నిమ్మరసం కలపడం వల్ల ఉప్మాకు మంచి రుచి వస్తుంది. కావాలంటే ఇందులో కొన్ని కూరగాయలు కూడా వేసుకోవచ్చు. మరి ఈ రుచికరమైన అటుకుల ఉప్మాను ఎలా తయారు చేసుకోవాలో తెలుసుకుందాం.
అటుకుల ఉప్మా చాలా సులభంగా, తక్కువ సమయంలో తయారు చేసుకోగలిగే రుచికరమైన అల్పాహారం. ఉదయం ఆఫీసులకు వెళ్లేవారు, పిల్లలను స్కూల్‌కు పంపించే హడావుడిలో ఉండేవారు తక్కువ సమయంలో చేసుకునే మంచి బ్రేక్‌ఫాస్ట్ ఇది. ఇంట్లో సాధారణంగా ఉండే పదార్థాలతోనే ఈ ఉప్మాను తయారు చేసుకోవచ్చు. అటుకులు తేలికగా ఉండటంతో పాటు త్వరగా వంట కూడా అవుతాయి. వేరుశెనగలు, ఉల్లిపాయలు, పచ్చిమిర్చి, నిమ్మరసం కలపడం వల్ల ఉప్మాకు మంచి రుచి వస్తుంది. కావాలంటే ఇందులో కొన్ని కూరగాయలు కూడా వేసుకోవచ్చు. మరి ఈ రుచికరమైన అటుకుల ఉప్మాను ఎలా తయారు చేసుకోవాలో తెలుసుకుందాం.
అటుకుల ఉప్మా తయారీకి కావాల్సిన పదార్థాలు
ఈ ఉప్మా చేయడానికి రెండు కప్పుల అటుకులు, అర కప్పు వేరుశెనగలు, ఒక ఉల్లిపాయ, రెండు పచ్చిమిర్చి, కొద్దిగా కరివేపాకు తీసుకోవాలి. అలాగే అర టీ స్పూన్ ఆవాలు, అర టీ స్పూన్ జీలకర్ర, చిటికెడు పసుపు, తగినంత ఉప్పు, రెండు టీ స్పూన్ల నూనె, ఒక టీ స్పూన్ నిమ్మరసం, కొద్దిగా కొత్తిమీర సిద్ధం చేసుకోవాలి. ఇవి ఉంటే చాలు.. ఎంతో రుచికరమైన అటుకుల ఉప్మా తయారవుతుంది.
అటుకుల ఉప్మా తయారీ విధానం
ముందుగా అటుకులను ఒక గిన్నెలోకి తీసుకుని నీటితో ఒకసారి త్వరగా కడగాలి. వెంటనే నీటిని పూర్తిగా వంపేసి ఐదు నిమిషాల పాటు పక్కన పెట్టాలి. ఇలా చేయడం వల్ల అటుకులు కొద్దిగా మెత్తగా మారతాయి. ఎక్కువసేపు నీటిలో ఉంచితే అవి ముద్దగా మారే అవకాశం ఉంటుంది. ఈలోపు ఉల్లిపాయను సన్నగా తరిగి, పచ్చిమిర్చిని చిన్న ముక్కలుగా కోసుకోవాలి.
ఇప్పుడు స్టవ్‌పై కడాయి పెట్టి నూనె వేయాలి. నూనె వేడయ్యాక ఆవాలు, జీలకర్ర వేసి చిటపటలాడించాలి. తర్వాత కరివేపాకు, పచ్చిమిర్చి వేసి కొద్దిసేపు వేయించాలి. అనంతరం తరిగిన ఉల్లిపాయలు వేసి మెత్తగా, బంగారు రంగులోకి వచ్చే వరకు వేయించాలి. ఇప్పుడు పసుపు, ఉప్పు వేసి కలపాలి. ఆ తర్వాత వేరుశెనగలు వేసి మంచి వాసన వచ్చే వరకు వేయించాలి. చివరగా నానబెట్టిన అటుకులను వేసి మెత్తగా కలపాలి. అటుకులు పగలకుండా జాగ్రత్తగా కలుపుతూ తక్కువ మంటపై రెండు నుంచి మూడు నిమిషాలు ఉడికించాలి. చివరగా నిమ్మరసం, కొత్తిమీర చల్లి మరోసారి కలిపితే వేడివేడి అటుకుల ఉప్మా సిద్ధం.
రుచిగా రావాలంటే ఈ చిట్కాలు పాటించండి
అటుకులను ఎక్కువసేపు నానబెట్టకూడదు. ఉప్మా తయారుచేసేటప్పుడు అటుకులు మెత్తగా ఉండాలి కానీ ముద్దగా మారకూడదు. మరింత పోషకాలు, రుచి కోసం క్యారెట్, బఠాణీ, బీన్స్ వంటి కూరగాయలను కూడా జోడించవచ్చు. వేరుశెనగలకు బదులుగా జీడిపప్పు కూడా వేసుకోవచ్చు. నిమ్మరసం చివర్లో కలిపితే పులుపు రుచి బాగా తెలుస్తుంది.
ఇలా తక్కువ సమయంలో ఇంట్లోనే రుచికరమైన అటుకుల ఉప్మా తయారు చేసుకోవచ్చు. అటుకుల్లో కార్బోహైడ్రేట్లు ఉండటం వల్ల శరీరానికి శక్తి అందుతుంది. వేరుశెనగలు కొంత ప్రోటీన్, ఆరోగ్యకరమైన కొవ్వులను అందిస్తాయి. కూరగాయలు జోడిస్తే ఆహారంలో పీచు కూడా పెరుగుతుంది. అందుకే ఉదయం అల్పాహారంగా దీన్ని సమతుల్యమైన ఆహారంలో భాగంగా తీసుకోవచ్చు.
