Last Updated:
Gyanesh Kumar: కేంద్ర ఎన్నికల సంఘం తీరుపై విపక్ష ‘ఇండియా’ (INDIA) కూటమి పోరుబాటను మరింత తీవ్రతరం చేసింది.
ఓటర్ల జాబితాలో భారీగా పేర్ల తొలగింపు, నిబంధనల మార్పులపై కేంద్ర ఎన్నికల ప్రధాన కమిషనర్ (సీఈసీ) జ్ఞానేష్ కుమార్‌ను లక్ష్యంగా చేసుకుంటూ అక్టోబర్ 30న ప్రతీకాత్మకంగా ‘ప్రజా మహాభియోగం’ (పబ్లిక్ ఇంపీచ్‌మెంట్) నిర్వహించనున్నట్లు విపక్ష కూటమి ప్రకటించింది. ఎన్నికల సంఘం పనితీరుపై పోరాటంలో భాగంగా ఇది కీలక ముందడుగుగా మారింది. ఈ మేరకు న్యూఢిల్లీలో ఒక నమూనా సభ (మాక్ అసెంబ్లీ)ను ఏర్పాటు చేసి, అగ్రశ్రేణి విపక్ష ఎంపీలు, కూటమి నేతల సమక్షంలో సీఈసీని పదవి నుంచి తప్పించాలంటూ ప్రజా తీర్పును వెలువరించనున్నట్లు ఏఐసీసీ ప్రధాన కార్యదర్శి కేసీ వేణుగోపాల్ వెల్లడించారు.
ఓటర్ల ప్రత్యేక సమగ్ర సవరణ (SIR) ప్రక్రియలో పెద్దఎత్తున ఓటర్ల పేర్లను అక్రమంగా తొలగించారని, ఓటర్ల జాబితాల్లో ఏకపక్ష మార్పులు చేశారని విపక్షాలు ఆరోపిస్తున్నాయి. దీనిని వ్యవస్థాగతమైన “ఓట్ల దొంగతనం”గా పేర్కొంటూ, కాంగ్రెస్ అధ్యక్షుడు మల్లికార్జున ఖర్గే, లోక్‌సభ ప్రతిపక్ష నేత రాహుల్ గాంధీ సహా పలువురు నేతలు ఇప్పటికే జ్ఞానేష్ కుమార్ రాజీనామా చేయాలని డిమాండ్ చేశారు.
దీనికితోడు, ప్రధాన ఎన్నికల కమిషనర్, ఇతర ఎన్నికల కమిషనర్ల చట్టం, 2023లోని ‘సెక్షన్ 16’ వివాదాస్పదంగా మారింది. అధికారిక విధుల్లో ఉన్న కమిషనర్లకు న్యాయపరమైన రక్షణ (లీగల్ ఇమ్యూనిటీ) కల్పించే ఈ నిబంధనను వెంటనే రద్దు చేయాలని విపక్షాలు పట్టుబడుతున్నాయి. ఈ నిబంధన ఎన్నికల ఉన్నతాధికారులు జవాబుదారీతనం నుంచి తప్పించుకునేందుకు రక్షణ కవచంలా మారిందని విమర్శిస్తున్నాయి.
ప్రతిపక్షాలు తలపెట్టిన ఈ ప్రజా విచారణను అధికార భారతీయ జనతా పార్టీ (బీజేపీ) తీవ్రంగా ఖండించింది. ప్రజాస్వామ్య వ్యవస్థలను అణగదొక్కేందుకే ఇలాంటి ఆందోళనలు చేస్తున్నారని మండిపడింది. వాస్తవాలను, ఓటమిని అంగీకరించలేక రాహుల్ గాంధీ, ‘ఇండియా’ కూటమి అయోమయాన్ని, అబద్ధాలను ప్రచారం చేస్తున్నారని బీజేపీ జాతీయ అధికార ప్రతినిధి సంబిత్ పాత్ర ఆరోపించారు.
గతంలో న్యాయవ్యవస్థ, సాయుధ దళాలు, ఇప్పుడు ఎన్నికల సంఘం వంటి రాజ్యాంగబద్ధ సంస్థలపై వరుస దాడులు చేస్తూ ప్రతిపక్షాలు కావాలనే అరాచకాన్ని సృష్టిస్తున్నాయని ఆయన విమర్శించారు. ఎన్నికల సంఘం రాజ్యాంగ పరిధిలోనే స్వతంత్రంగా పనిచేస్తోందని, కాంగ్రెస్ పార్టీ తమ నాయకత్వాన్ని ఉనికిలో ఉంచుకునేందుకే ఇలాంటి రాజకీయ విన్యాసాలు చేస్తోందని బీజేపీ పేర్కొంది.
అక్టోబర్ 30న నిర్వహించే ఈ నమూనా మహాభియోగం.. దేశవ్యాప్తంగా విపక్షాలు చేపట్టనున్న భారీ ఉద్యమానికి నాందిగా నిలవనుంది. దీనికి కొనసాగింపుగా నవంబర్ 1న ‘దిల్లీ చలో’ పేరుతో రాంలీలా మైదానానికి భారీ కవాతు నిర్వహించేందుకు ‘ఇండియా’ కూటమి సన్నాహాలు చేస్తోంది. ఈ బహిరంగ సభకు దేశవ్యాప్తంగా దాదాపు 10 లక్షల మందిని తరలించాలని లక్ష్యంగా పెట్టుకుంది.
రాజ్యాంగబద్ధంగా చూస్తే.. పార్లమెంటులోని ఉభయసభల్లో మూడింట రెండొంతుల మెజారిటీతో మాత్రమే సీఈసీని అభిశంసించే అధికారం ఉండటంతో, విపక్షాల ఈ ‘ప్రజా మహాభియోగం’ కేవలం ప్రతీకాత్మకమైనది మాత్రమే. అయినప్పటికీ ఈ చర్య దేశంలో రాజ్యాంగ సంస్థలు, ప్రతిపక్షాల మధ్య పెరుగుతున్న తీవ్ర విభేదాలను స్పష్టంగా ప్రతిబింబిస్తోంది. కాగా, ఓటర్ల జాబితా సవరణ అనేది నిబంధనల ప్రకారం జరిగే సాధారణ ప్రక్రియ అని, నకిలీ ఓట్లు, మరణించిన వారి పేర్లను తొలగించడమే తమ లక్ష్యమని పేర్కొంటూ విపక్షాల ఆరోపణలను ఎన్నికల సంఘం ఇప్పటికే కొట్టిపారేసింది.
