చికెన్ లేదా మటన్: అర కిలో (మీడియం సైజు ముక్కలు)
బాస్మతి బియ్యం : 2 కప్పులు (అరగంట నానబెట్టినవి)
నూనె: 3 పెద్ద చెంచాలు
నెయ్యి: 2 పెద్ద చెంచాలు
ఉల్లిపాయలు: 2 (సన్నగా తరిగినవి)
టమోటాలు: 2 (సన్నగా తరిగినవి)
పచ్చిమిరపకాయలు: 5-6 (నిలువుగా చీల్చినవి)
పుదీనా తరుగు: అర కప్పు
కొత్తిమీర తరుగు: అర కప్పు
చిక్కటి పెరుగు: పావు కప్పు
నిమ్మరసం: 1 పెద్ద చెంచా
పసుపు: పావు చిన్న చెంచా
ఉప్పు: రుచికి సరిపడా
నీళ్లు: 3 కప్పులు
తాడిపత్రి స్పెషల్ గ్రీన్ మసాలా పేస్ట్ కోసం:
అల్లం: 2 అంగుళాల ముక్క
వెల్లుల్లి రెబ్బలు: 15
ధనియాలు: 1 పెద్ద చెంచా
సోంపు: 1 చిన్న చెంచా
మిరియాలు: 1 చిన్న చెంచా
దాల్చిన చెక్క: 2 ముక్కలు
లవంగాలు: 5
యాలకులు: 3
కొద్దిగా కొత్తిమీర, పుదీనా
మొదట మిక్సీ జార్‌లో అల్లం, వెల్లుల్లి, ధనియాలు, సోంపు, మిరియాలు, చెక్క, లవంగాలు, యాలకులు, కొద్దిగా కొత్తిమీర, పుదీనా వేసి కొద్దిగా నీళ్లు పోసి మెత్తటి పేస్ట్‌లా రుబ్బుకోండి. ఇప్పుడు ఒక కుక్కర్ లేదా మందపాటి బిర్యానీ పాత్రలో నూనె, నెయ్యి వేసి వేడి చేయండి. అందులో సన్నగా తరిగిన ఉల్లిపాయ ముక్కలు, పచ్చిమిర్చి వేసి దోరగా, బంగారు రంగు వచ్చేవరకు వేయించండి. ఆ తర్వాత రుబ్బుకున్న స్పెషల్ గ్రీన్ మసాలా పేస్ట్ వేసి పచ్చివాసన పోయేలా నూనె పైకి తేలేవరకు 2-3 నిమిషాలు వేపండి. ఇప్పుడు టమోటా ముక్కలు, పసుపు, కొద్దిగా ఉప్పు వేసి టమోటాలు మెత్తబడేవరకు మగ్గనివ్వండి. తర్వాత పెరుగు, శుభ్రం చేసిన చికెన్ ముక్కలు వేసి మసాలా అంతా ముక్కలకు పట్టేలా పెద్ద మంటపై 3-4 నిమిషాలు బాగా కలపండి. ముక్కలు కాస్త మగ్గిన తర్వాత 3 కప్పుల నీళ్లు పోసి, రుచికి సరిపడా ఉప్పు, నిమ్మరసం వేసి నీటిని బాగా మరిగించండి. నీళ్లు మరుగుతున్నప్పుడు నానబెట్టి నీరు వార్చిన బియ్యాన్ని వేసి, సగం కొత్తిమీర, పుదీనా తరుగు చల్లండి. ఒకసారి నెమ్మదిగా కలిపి మూతపెట్టి, మీడియం మంటపై 2 విజిల్స్ రానిచ్చి స్టవ్ కట్టేయండి (సాధారణ పాత్రలో అయితే మూతపెట్టి చిన్న మంటపై దమ్ చేయండి). ఆవిరి మొత్తం పోయాక మూతతీసి పైనుంచి కాస్త నెయ్యి వేసి సున్నితంగా కలపండి. ఘుమఘుమలాడే తాడిపత్రి బిర్యానీ సిద్ధం. రాయలసీమ స్పెషల్ గోంగూర పచ్చడి, ఉల్లిపాయ పెరుగు పచ్చడితో సర్వ్ చేసుకుంటే రుచి అమోఘం.
