Last Updated:
తిరుమల తిరుపతి దేవస్థానానికి భారీ ఎత్తును విరాళాలు వచ్చాయి. మంగళవారం ఒక్కరోజే మొత్తం 2,460 మంది దాతలు శ్రీవారి ట్రస్టులకు విరాళాలు సమకూర్చారు.
TTD: తిరుమల తిరుపతి దేవస్థానం (తితిదే) చరిత్రలో సరికొత్త రికార్డు నమోదైంది. శ్రీవారి అనుబంధ ట్రస్టులకు మంగళవారం ఒక్కరోజే భక్తులు అపూర్వ రీతిలో స్పందించి ఏకంగా రూ. 96.98 కోట్ల విరాళాలను అందజేశారు. దాతల ప్రత్యేక సదుపాయాల (ప్రివిలేజెస్) నిబంధనలలో తితిదే మార్పులు తీసుకురావడమే ఈ భారీ స్పందనకు ప్రధాన కారణమైంది.
ఈనాడు కథనం ప్రకారం.. సామాన్య భక్తుల దర్శనాలకు ఎలాంటి ఇబ్బందులు కలగకూడదనే ఉద్దేశంతో దాతలకు కల్పించే సదుపాయాలను కొంతమేర తగ్గిస్తూ బుధవారం నుంచి తితిదే నూతన పాలసీని అమలులోకి తెచ్చింది. అయితే, అంతకుముందు వరకు (మంగళవారం లోపు) విరాళాలు ఇచ్చిన వారికి పాత నిబంధనల ప్రకారమే సదుపాయాలు కొనసాగిస్తామని తితిదే ప్రకటించింది. దీంతో పాత విధానం ద్వారా లబ్ధి పొందేందుకు దాతలు ఒక్కసారిగా భారీగా తరలివచ్చారు.
మంగళవారం ఒక్కరోజే మొత్తం 2,460 మంది దాతలు శ్రీవారి ట్రస్టులకు విరాళాలు సమకూర్చారు. సాంకేతికతను ఉపయోగించుకుంటూ అత్యధికంగా 2,354 మంది ఆన్లైన్ ద్వారా విరాళాలు పంపగా, మరో 106 మంది నేరుగా ఆఫ్లైన్ ద్వారా నగదును అందజేశారు.
రూ. లక్ష నుండి రూ. 10 లక్షల వరకు: 1,212 మంది దాతలు అందించారు.
రూ. 10 లక్షల నుండి రూ. 25 లక్షల వరకు: 1,246 మంది దాతలు విరాళాలు ఇచ్చారు.
రూ. కోటి అంతకంటే పైగా: ఇద్దరు పెద్ద దాతలు భారీ మొత్తాన్ని సమకూర్చారు.
ఇటీవలి గణాంకాల ప్రకారం (జూన్ 26 నాటికి) తితిదేలో మొత్తం దాతల సంఖ్య 1,97,888 మందికి చేరింది. వీరిలో రూ. లక్ష విరాళం ఇచ్చిన సాధారణ దాతలు సుమారు 1.50 లక్షల మంది వరకు ఉండగా, రూ. 10 లక్షలకు పైగా విరాళాలు ఇచ్చిన పెద్ద దాతలు 22 వేల మంది వరకు ఉన్నారని అధికారులు వెల్లడించారు.
Hyderabad,Telangana
