బంగారం ధర తగ్గడం వల్ల LTV పరిమితిపై ఒత్తిడి ఏర్పడినప్పుడు, అదనపు నగదు అవసరం రావడం రుణగ్రహీతకు పెద్ద సమస్యగా మారొచ్చు. ఇప్పటికే రుణం తీర్చడానికి డబ్బు లేకపోవడంతో రెన్యూవల్ చేసుకున్న వ్యక్తి వద్ద వెంటనే అదనపు మొత్తం అందుబాటులో లేకపోవచ్చు. అటువంటి పరిస్థితుల్లో రుణదాత నిబంధనలకు అనుగుణంగా బకాయి రుణాన్ని తగ్గించాలని లేదా అదనపు అర్హత కలిగిన భద్రతను సమకూర్చాలని కోరవచ్చు. అందుకే బంగారం ధరలు తగ్గుతున్న సమయంలో రుణాన్ని కేవలం పొడిగించుకుంటూ వెళ్లడం వల్ల భవిష్యత్తులో నగదు ఒత్తిడి పెరగకుండా ముందుగానే లెక్కలు వేసుకోవాలి. రుణగ్రహీత బకాయిలను చెల్లించలేకపోతే, రుణదాతకు తాకట్టు పెట్టిన బంగారంపై తదుపరి చర్యలు తీసుకునే పరిస్థితి రావచ్చు. అయితే బంగారం వేలం ప్రక్రియకు సంబంధించి రుణదాతలు వర్తించే RBI నిబంధనలు, తమ పాలసీ, రుణ ఒప్పందంలోని షరతులను పాటించాలి. రుణ ఒప్పందంలో వేలం ఎప్పుడు జరగవచ్చు, ముందస్తు నోటీసు ఎంతకాలం ఇవ్వాలి వంటి వివరాలు ఉండాలి. ప్రస్తుత నిబంధనల ప్రకారం వేలం సమయంలో తాకట్టు బంగారానికి రిజర్వ్ ధరను నిర్ణయించాలి. మొదటి దశలో అది ప్రస్తుత విలువలో కనీసం 90 శాతానికి తక్కువగా ఉండకూడదు. వరుసగా రెండు వేలాలు విఫలమైతే, తదుపరి వేలానికి కనీసం 85 శాతం వరకు రిజర్వ్ ధరను నిర్ణయించే అవకాశం ఉంది.
