మీకు ఫిష్ ఇష్టమా.. ఎప్పటిలాగా ఫ్రై, పులుసు కాదు.. చేప పచ్చడి ఇలా చేస్తే నోరూరుతుంది! |

చేపల పచ్చడికి కావాల్సిన పదార్థాలు: చేపల పచ్చడి తయారు చేసేందుకు ముళ్లు తక్కువగా ఉండే చేపలు 500 గ్రాములు, పసుపు ఒక టీస్పూన్, కారం పొడి 3–4 టీస్పూన్లు, అల్లం వెల్లుల్లి పేస్ట్ రెండు టేబుల్ స్పూన్లు, ఆవాలు ఒక టీస్పూన్, మెంతులు అర టీస్పూన్, వెనిగర్ లేదా నిమ్మరసం 3–4 టేబుల్ స్పూన్లు, తగినంత ఉప్పు, కరివేపాకు 10–12 ఆకులు అవసరం. అలాగే ఆవ నూనె, నువ్వుల నూనె లేదా వేరుశెనగ నూనెలో ఏదైనా ఒక కప్పు తీసుకోవాలి.

చేపల పచ్చడి తయారీ విధానం: ముందుగా చేప ముక్కలను శుభ్రంగా కడిగి, అర టీస్పూన్ పసుపు, కొద్దిగా ఉప్పు కలపాలి. ఆ తర్వాత 3–4 గంటల పాటు ఎండలో ఉంచి అదనపు తేమను తగ్గించాలి. అయితే చేపలను ఎండబెట్టే సమయంలో దుమ్ము, ఈగలు పడకుండా జాగ్రత్త తీసుకోవాలి.

తర్వాత బాణలిలో నూనె వేడి చేసి, చేప ముక్కలను మధ్యస్థ మంటపై బంగారు రంగు వచ్చి బాగా ఉడికే వరకు వేయించాలి. అనంతరం వాటిని పక్కన పెట్టాలి. అదే నూనెలో ఆవాలు, మెంతులు, కరివేపాకు వేసి వేయించాలి. అల్లం వెల్లుల్లి పేస్ట్ వేసి పచ్చి వాసన పోయే వరకు వేయించాలి.

ఇప్పుడు మంట తగ్గించి కారం పొడి, పసుపు, ఉప్పు వేసి కలపాలి. వేయించిన చేప ముక్కలను అందులో వేసి సుమారు రెండు నిమిషాలు మసాలా పట్టేలా కలపాలి. ఆపై స్టవ్ ఆపి మిశ్రమాన్ని పూర్తిగా చల్లారనివ్వాలి. చల్లారిన తర్వాత వెనిగర్ లేదా నిమ్మరసం కలిపి శుభ్రమైన, పూర్తిగా పొడిగా ఉన్న గాజు సీసాలో భద్రపరచాలి.

నిల్వ చేసే సమయంలో ఈ జాగ్రత్తలు తప్పనిసరి: చేపల పచ్చడి ఎక్కువకాలం నిల్వ ఉంటుందని భావించి నిర్లక్ష్యం చేయకూడదు. చేపలు పూర్తిగా ఉడికాయో లేదో చూసుకోవాలి. తేమ, కలుషితం వల్ల పచ్చడి త్వరగా పాడయ్యే ప్రమాదం ఉంది. ఇంట్లో తయారు చేసిన చేపల పచ్చడిని సురక్షితంగా నిల్వ చేయడానికి ఫ్రిజ్‌లో ఉంచడం మంచిది. వాసన, రంగు మారడం లేదా బూజు కనిపిస్తే తినకూడదు. వెనిగర్ లేదా నిమ్మరసం కలిపినంత మాత్రాన పచ్చడి నెలల తరబడి సురక్షితంగా ఉంటుందని భావించకూడదు. సరైన శుభ్రత, వంటలో తగిన జాగ్రత్తలు పాటిస్తే ఇంట్లోనే రుచికరమైన చేపల పచ్చడిని తయారు చేసుకోవచ్చు.